MATHI 2

Aniakhiuklimnü Mükheahmudurü Arükhi

1Kiulongthsüpuh Herod kim ching, Judea ching lakhi Bethlehem ching Jisu zübe dunglim, aniakhiuklimnü mükheahmudurübo Jirusalem ching arü 2tüsho keokhi, “Jihudarü kiulongthsüpuh zübekhi ju küching la? Isanü api chining aniakhiuklim ngüdo tüsho api kingaünpü arükheah.” 3Küyimki kiulongthsüpuh Herodnü harübo sokhea, api tüsho api lung Jirusalem ching alala müyinsah. 4Tüsho küyimki apinü mihtsürübo amükeam putungrübo tüsho yakzan thsangyurübo bemukhungkhea, Khrista ju küching zübepü lanü apinü arü ki keokhi. 5Jumonü arünü api ki alo, “Judea ching lakhi Bethlehem ching ah, tümütüsho wukihrübonü ha thrüta lah:

6‘Tüshe nü, Juda lomi ching lakhi Bethlehem,

Juda yakzanshuhrü bolung aninibe yung;

tümüde nü kheaknü I mihtsürü Israel neakpü yakzanshuhrü khülang arübah.’ ”

7Judüki Herodnü mükheahmudurübo ju ramde ji tüsho arü kheaknü dükde chining akhiukkhi kim mütsana lu. 8Apinü arü ki hade thabah Bethlehem lim yüshih, “Yübah ju düshihde yimang, tüsho küyimki nüsanü api yimkhitbanü I kilim bede arang, junangde inü she api kingaünbah.” 9Arünü kiulongthsüpuh yu sobah chamachihde yü; tüsho kheahang, arünü aniakhiuklim ngükhi chining ju azürü lakhi kumung yübah müzhipyi khiungde arü müngüh yü. 10Küyimki arünü chining ju angükhea, arünü khide tode asühachih. 11Tüsho küyimki arü thüyam ching yüzahkhea, arünü azürü ju abe Mari lung ngü, tüsho mükhümbah api kingaün. Tüsho arünü thsambah düm trünbah api kilim suna, jinjinlak, tüsho rhümthüneabe thsambahbo jih. 12Milim ching Herod kilim alode düyü de athakhi hode, arünü püpü limronü arü lomi lim alode yü.

Ijip lim Tsokhi

13Küyimki arü chamachihkhea, Atungpuh yunirü khülang milim ching Josep ki akhiukbah tha, “Asürang, azürü le abe büne bebah Ijip lim tsoang. Inü nü ki müthayi khiungde ju ching laang, tümüde Herodnü azübuh laksahpü yimbah.” 14Küyimki api asürükhea, apinü azübuh le abe büne azhing ching bea lubah Ijip lim tso, 15tüsho Herod müsheyi khiungde ju ching la, junangde Atungpuhnü wukihrü hode, “Ijip chingnü inü I tsührü jikhit,” de athakhi dünjipü lakheah.

Azürübo Laksahkhi

16Küyimki mükheahmudurübonü api mülapyukdo de Herodnü amükheahkhea, api khide bukakhiuk; tüsho apinü mükheahmudurübo kheaknü anikhitkhi kim ayannü Bethlehem tüsho ju mühi athrürü nunu kam mahnenü abukkhüp alala laksahpü thiyukhüm jih. 17Judüki Jeremia wukihrünü athakhi dünji:

18“Rama ching mitripkhi tüsho tode tüzhokhi düsheak so,

Rachelnü atsührübo thsungkheak tripchoh tüsho mulong shukheampü thsunglochoh,

tümütüsho arübo kheaküa müla.”

Ijip limnü Arülokhi

19Tüshe küyimki Herod sheabahkhea, Ijip ching Atungpuh yunirü milim ching Josep ki akhiuk 20tüsho tha, “Asürang, azürü le abe büne bebah Israel lomi lim yüang, tümütüsho sherünü azürü rhangdung yimkheanü sheabahdo.” 21Judüki apinü wusubah azürü le abe büne bea lu tüsho Israel lomi lim yü. 22Tüshe küyimki apinü abuh müthri Arkelausnü Judea kurungkheak kiulongthsüchoh de asokhea, apinü ju ching yüpü tre. Tüsho Thrünpuhnü milim ching thamonü apinü Galilee lomi lim alode yü. 23#Mk 1.24; Lk 2.39; Jhn 1.45Tüsho apinü yübah Nazareth kiuto ching la, junangde wukihrübonü, “Api Nazarethrü de ajibah,” de athakhi dünjipü lakheah.

Currently Selected:

MATHI 2: YIMCBSI

Highlight

Copy