MATHI 4

Jisu Rükakikhi

(Mk 1.12-13; Lk 4.1-13)

1 # Ibr 2.18; 4.15 Judüki arimrinü rükakishihpü Menü Jisu ju sunglo ching bede yü. 2Nimung yirü tüsho tsüngre yirü mütsühyung dunglim api khümabah. 3Küyimki rükakirü arükheanü api ki tha, “Nü Thrünpuh tsührü a sho, harü lungbo yikhap kampü thiyukhüm jihang.”

4Tüshe apinü alo, “Amüsühyunü thachoh, ‘Yikhap müthsünnü mihtsürü mülachoh, tüshe Thrünpuh mün chingnü akhiukkhi yu abannü lah.’” 5Judüki arimrinü api ju amüsüh kiuto ching bede yü tüsho arüngyam mün kheak binshih, 6tüsho api ki tha, “Nü Thrünpuh tsührü a sho, nü küdah thsüde ayoang, tümüde amüsühyunü thachoh:

‘Thrünpuhnü api yunirü nü thsungkheak jihbah,

tüsho nü jinglungnü alo müqiushihde arü khah ching nü shuhkihbah.’ ”

7Jisunü api ki tha, “Amüsühyunü ha she thachoh, ‘Nünü Atungpuh nü Thrünpuh rükdaki.’ ” 8Kheaküshe arimrinü awung khide achang kheak api bede yü, tüsho alomi kiulongthsübo alala tüsho arü müretahkhi huh. 9Tüsho apinü anihbuh ki tha, “Nünü mükhümbah I kingaünsho harü alala inü nü kilim jihbah.” 10Jisunü api ki tha, “Tsoabahang, arimri! Tümüde amüsühyunü thachoh, ‘Nünü Atungpuh nü Thrünpuh kingaünbah, tüsho api lang tankihbah.’ ” 11Judüki arimrinü api bahbah tso, tüsho yunirübo arübah api rung.

Jisunü Galilee ching Api Rhimo Tankihkhi

(Mk 1.14-15; Lk 4.14-15)

12 # Mt 14.3; Mk 6.17; Lk 3.19,20 Küyimki Jisunü Johan ju rihyam ching zokhi sokhea apinü Galilee lim alode yü. 13#Jhn 2.12Apinü Nazareth bahjihbah yü tüsho Zebulun le Naphtali ching lakhi keto ki Kapernaum ching la, 14junangde Isaia wukihrünü athakhi dünjipü lakheah:

15“Zebulun lomi tüsho Naphtali lomi,

Jordan yeande keto limro,

khiungkerü yo Galilee–

16amiting ching larü mihtsürübonü ayin ato khülang ngü;

ashe alamme lomi ching larü kheak ayin akhiuk.”

17 # Mt 3.2 Ju kim chingnü Jisunü thsangyuthsangrapü tankih, “Mulong müthriang, tümüde yinmi kiulongthsü thüninde lah.”

Jisunü Thüngüh-ramrü Phüyi Jikhi

(Mk 1.16-20; Lk 5.1-11)

18Jisu ju Galilee keto yean tsahde alachoki, apinü keoniorü mahne, Peter de ajikhi Simon tüsho aniurü Andria büne keto ching keang jipde ngü, tümüde ane thüngüh-ramrü lakheah. 19Jisunü tha, “I dunglim yanang, tüsho inü nüke mihtsürüramrü kamshihbah.” 20Anenü niokheamde keangbo bah tüsho api dunglim yan. 21Tüsho ju chingnü yübah, apinü keoniorü püpü mahne, Zebedee tsührübo Jakob tüsho aniurü Johan ane abuh lung sangkung ching keangbo thsülode ngü. Apinü ane ji, 22tüsho anenü niokheamde sangkung le ane abuh zojihbah api dunglim yan.

Jisunü Tukthsürü Thsüngukhi

(Lk 6.17-19)

23 # Mt 9.35; Mk 1.39 Jisunü Galilee alala ching yübah, arü yo sinagogbo ching thsangyu, kiulongthsü thiyusheak atsü thsangyuthsangra, tüsho mihtsürü bolung tukthsü tüsho phüthsüphüram mungji aban thsüngujih. 24Api dünkheak thiyusheak Siria alala ching soride yü, tüsho mihtsürübonü tukthsürü aphuaphu, thsünüthsüheanrü, amünean me yüzahkhi, zukleang-tukthsü tüsho thripshe-tukthsü larü api kilim bebah arü, tüsho apinü arübo thsüngujih. 25Galilee, Dekapoli,#kiuto 10 Jirusalem, Judea tüsho Jordan hobah püpü lomi chingnü yimto ato api dunglim yan.

Currently Selected:

MATHI 4: YIMCBSI

Highlight

Copy