MATHI 5

1Jisunü yimto ato ngü tüsho awung kheak yükihbah bin. Api jingyanrübo anihbuh mükamde arü, 2tüsho apinü arü thsangyupü tankih:

Atsütsü Asühpü

(Lk 6.20-23)

3“Me ching zholümde alarübo asühpü,

tümüde yinmi kiulongthsü arü yo.

4Mitriprübo asühpü, tümüde arübo mulong shukheambah.

5Tsüyihrübo asühpü, tümüde arünü alomi yamrüplurüp lubah.

6Thiyuro-lungki thsungkheak khümkethürirü asühpü,

tümüde arü bukthsübah.

7Mihmüthsümrü asühpü,

tümüde arü ki mihmüthsüm huhbah.

8Mulong müsühde alarübo asühpü,

tümüde arünü Thrünpuh ngübah.

9Mungtsü thsürübo asühpü,

tümüde arü ki Thrünpuh tsührübo de ajibah.

10 # 1 Pet 3.14 Thiyuro-lungki dünkheaknü thsümüchirübo asühpü,

tümüde yinmi kiulongthsü arü yo.

11 # 1 Pet 4.14 “I dünkheaknü arünü nüsa mükhemükimde thsümüchichoki tüsho arükchihnü nüsa azhihde amütsü alala thachoki nüsa asühpü. 12#Yunir 7.52Asühachihang tüsho asühang, tümütüsho yinmi ching nüsa thsambah ato lah, tümüde nüsa müngüh larü wukihrübo arünü hanangde thsümüchikheah.

Thimi tüsho Ayin

(Mk 9.50; Lk 14.34-35)

13 # Mk 9.50; Lk 14.34,35 “Nüsa alomi thimi ah; tüshe thimi ju amüsüpbe dükheakabahsho, ju küde thsah amüsüpshihba? Ju tümü thsungkheak she atsü müla, ju abahbah tüsho mihtsürübonü ajungbah. 14#Jhn 8.12; 9.5Nüsa alomi ayinatrüm. Awung kheak lakhi kiuto amüyimpü mukuk. 15#Mk 4.21; Lk 8.16; 11.33Yungsho shenü she tsün takkihbah muluknü hüpdoa muzochoh; tüshe adubopung kheak zochoh, tüsho junü thüyam ching larü alala kilim yinshihchoh. 16#1 Pet 2.12Mihtsürübo miki nüsa ayin tahshang, junangde arünü nüsa rhimo atsü ngübah tüsho yinmi ching nüsa Abuh müretahbah.

Yakzan dünkheak Thsangyukhi

17“I ju yakzan tüsho wukihrübo dükheakshihpü arükheah de dülüm. Adükheakshihpü yung tüshe adünjishihpü I arükheah. 18#Lk 16.17Inü nüsa ki thiyuro thachoh, thüning tüsho alomi la khiungde, yakzan ching lakhi thiyuji aninibe yungsho athrütkhi aninibe ju müdünjiyikia müdükheak. 19Shepünü harü thiyukhüm bolung aninibe thsümünimcho, tüsho jude athsüpü püpürü ki thsangyuchonü yinmi kiulongthsü ching aninibe de ajibah, tüshe shepünü rhimocho tüsho harü yukhümbo thsangyuchonü yinmi kiulongthsü ching atobe de ajibah. 20Tümüde nüsa thiyurolungkinü Pharisirü tüsho yakzan thsangyurü müzhihosho tsükjide yinmi kiulongthsü ching müyüzah de inü nüsa ki thachoh.

Bukakhiuk dünkheak Thsangyukhi

21“Mihtsürübo ki adüso ha thakhi nüsanü sodo, ‘Dülaksah, tüsho khürünü laksahsho mahkhap ching bedarübah.’ 22Tüshe shepünü nihbuh keoniorü ki bukakhiukbanü mahkhap ching bedarübah. Shepünü nihbuh keoniorü ki makharü de athabanü kiuthsü-binkiu miki bedarübah, tüshe shepünü aduhrü de athabanü thsümüchi motru ching atrebe labah. 23Jumonü nünü kingaün sadam ki thsambah lude arübah, ju ching nü keoniorünü nü azhihkhi tümükhüh lümkhitsho, 24nü thsambah ju kingaün sadam ki zoang, tüsho yübah nü keoniorü ki mungtsübah alode arang tüsho nü thsambah jihang.

25“Api lung limro lachoki nü azhihrü kheak nahde arihang, jude yungsho nü azhihrünü nü ju mahkhaprü kilim jihbah, mahkhaprünü atorü kilim jihbah, tüsho nü rihyam ching yukbah. 26Inü nüsa ki thiyuro thachoh, nünü akheamkhibe shonak khiungde müjihyikia nü ju chingnü makhiuk.

Müzammüram dünkheak Thsangyukhi

27“Nüsanü ha thakhi sodo, ‘Müzammüram düyihbeak.’ 28Tüshe khürünü aliberü kheak mürühde kheahsho api mulong chingnü anihbe kheak müzammüramdo de inü nüsa ki thachoh. 29#Mt 18.9; Mk 9.47Nü mük tsülimnü nü neak yihbeakshihsho, ju khünkhita bahang. Nü pang alala thsümüchipung ching jipyukpü dün a nü jingkhah khürü dükheakkhi atsübe ah. 30#Mt 18.8; Mk 9.43Tüsho nü khah tsülimnü nü neak yihbeakshihsho, ju lipkhia bahang. Nü pang alala thsümüchipung ching jipyukpü dün a nü jingkhah khürü dükheakkhi atsübe ah.

Niuberü Bahkhi dünkheak Thsangyukhi

(Mt 19.9; Mk 10.11-12; Lk 16.18)

31 # Mt 19.7; Mk 10.4 “Hade thade la, ‘Khürünü nihbuh niuberü bahsho achamachihkhi jingyan-hüm anihbe kilim jihbeah.’ 32#Mt 19.9; Mk 10.11,12; Lk 16.18; 1 Kor 7.10,11Tüshe inü nüsa ki thapü ju khürünü yamkhün ching thiyuro mülakhi kheak hode nihbuh niuberü bahsho alibe ju müzammüramrü kamshihchoh, tüsho shepünü abahkhi liberü lubanü müzammüram yihbeakchoh.

Thiyuchihchim dünkheak Thsangyukhi

33“Kheaküshe adüso mihtsürübo ki thakhi nüsanü sodo, ‘Nünü thiyuchihchimkhi düthsümünim, tüshe nünü Atungpuh ki thiyuchihchimkhi ju rhimoang.’ 34#Ja 5.12; Mt 23.22Tüshe inü nüsa ki thachoh, yinmi tamde thiyuchihchim düthsü, tümüde ju Thrünpuh kiulongthsü-binkiu ah; 35yungsho alomi dütam, tümüde ju api jing dubopung; yungsho Jirusalem dütam, tümüde ju ato kiulongthsürü kiuto ah. 36Tüsho nü ku tamde thiyuchihchim düthsü, tümüde nünü kuyü büm khülang she amüye yungsho amürak thsüthsü müthrünkhuk. 37Tüshe nünü am tüsho am dang, tüsho yung tüsho yung dang; tümükhüh ha hobah lasho ju amütsübe limnü arüchoh.

Royimkhi dünkheak Thsangyukhi

(Lk 6.29-30)

38“Hade athakhi nüsanü sodo, ‘Mük müthri mük, tüsho hü müthri hü.’ 39Tüshe amütsü mihtsürü ki dathrihlo de inü nüsa ki thachoh. Khürünü nü müchip tsülim damsho, api kilim khülim she leangjang. 40Khürünü nü mahkhappung ching bede yübah nü pangkhümpü alungbe lunesho, apinü nü pangkhümpüniuniu she lushang. 41Khürünü nü ki mail 1 tsahpü nimkihsho, api lung mail 2 tsahang. 42Khürünü nü ki tümükhüh kheangsho api kilim jihang; khürünü nü ki tümükhüh nipnesho, api ki nipjang.

Thiriribo Muzhopü

(Lk 6.27-28,32-36)

43“Hade athakhi nüsanü sodo, ‘Nü yamhingrü muzhoang tüshe nü riri thraneanang.’ 44Tüshe inü nüsa ki thachoh: Nü riribo muzhoang tüsho nü thsümüchirü thsungkheak tamkhüntamnüjang, 45junangde nüsa ju yinmi ching nüsa Abuh tsührübo thsübah. Apinü amütsü tüsho atsü kheak ani akhiuk-shihchoh, tüsho thiyuro-lungkirü le thiyuro-mülungkirü kheak tsüng arüshihchoh. 46Nüsa muzhorü ki nüsanü muzhosho, nüsa tümü thsambah ngüba? Ruk-threrübonü jude rhimochoh yung de? 47Nüsanü nüsa keoniorübo ki lang asukachihsho, püpürü kheaknü alü nüsanü tümü rhimocho? Amükinrübonü she ju rhimochoh yung de? 48Jumonü yinmi ching nüsa Abuh khiukdahkhi nangde nüsa khiukdahde laang.

Currently Selected:

MATHI 5: YIMCBSI

Highlight

Copy