MATHI 14

Johan Baptijihbuh Shekhi

(Mk 6.14-29; Lk 9.7-9)

1Ju kim ching Galilee yakzanshuhrü Herodnü Jisu dünkheak so, 2tüsho apinü ayamlarübo ki tha, “Ha Johan Baptijihbuh ah; api ashekhi chingnü arhang kamlode arüa lah, jumonü ju wunü apinü khinthiyinbebo rhimochoh.”

3 # Lk 3.19,20 Tümütüsho müngühlim aniurü Philip niube Herodia dünkheaknü Herodnü Johan rama rhükbah rihyam ching yuk. 4Tümüde Johannü api ki tha, “Nünü anihbe lupü yakzan müla.” 5Herodnü Johan laksahpü künde alakheah, tüshe apinü mihtsürübo tre, tümütüsho arünü api ju wukihrü khede alakheah. 6Tüshe Herod zübe nimung thünio ching Herodia tsührübenü arü miki tsün tüsho Herod asühshih. 7Jumonü alibenü tümü kheangbanü anihbe kilim jihpü apinü thiyuchihchim thsü. 8Abenü ajuhkhi yande alibenü tha, “Johan Baptijihbuh ku phuru chingnü I kilim jihang.” 9Kiulongthsüpuh lümthsünü; tüshe thiyuchihchimkhi tüsho api lung dükhüm ki binrü lakhinü, apinü ju alibe kilim jihpü thiyukhüm jih. 10Jumonü apinü yüshihbah rihyam chingnü Johan ku lipkhishih. 11Api ku ju phuru chingnü lude arübah anünübe kilim jih, tüsho alibenü ju abe kilim ludarü. 12Judüki api jingyanrübonü arübah apang lude yü tüsho kiuyukabah, tüsho yübah Jisu ki thaa huh.

Chithürü Phüngü Yimkipkhi

(Mk 6.30-44; Lk 9.10-17; Jhn 6.1-14)

13Küyimki ju dünjikhi Jisunü asokheanü, sangkung chingnü alangzü azhik dangpung ching yü. Ju sobah kiuto chingnü yimto ato api dunglim jingnü yü. 14Jisunü wukhiukbah yimto ato ngüchoki, apinü arü muzhode lüm tüsho arü tukthsü thsüngujih. 15Arelim jingyanrübo arübah api k i tha, “Ha azhikpung ah, tüsho ashuabahchoh. Kiulongbo ching yübah arü thsungkheak tsühyungbe thulopü thsüde mihtsürübo wulungshang.” 16Jisunü alo, “Arübo wulungshihpü yihnüpü müla. Nüsanü arü kilim atsühpü tümükhüh jihang.” 17Tüsho arünü api ki tha, “Isa khah ching yikhap 5 tüsho thüngüh 2 lang lah.” 18Apinü tha, “Jurü I kilim lubah arang.” 19Judüki apinü yimto ato ju rimkiu kheak binpü thiyukhüm jih. Apinü yikhap 5 tüsho thüngüh 2 ju lu, tüsho yinmi lim kheahde makshe jih, tüsho yihnakbah jingyanrübo kilim jih; tüsho jingyanrübonü mihtsürübo kilim ahiuh. 20Jumonü arü alalanü tsühbah bukthsü tüsho arünü aningkhi muluk 12 mide hanmukhung. 21Tüsho tsühyungrübo ju aliberü tüsho azürübo mükhede athrürü 5000 lakheah.

Jisunü Kemi kheak Tsahkhi

(Mk 6.45-52; Jhn 6.15-21)

22Apinü mihtsürübo müzütshihshu, Jisunü nahde api jingyanrübo sangkung ching yüzahbah amüngüh ke thripkhüh yüshih. 23Küyimki apinü arü müzütshihkhea, apinü tamkhüntamnüpü müzüng ching wutu. Tüsho küyimki arelim kamkhea, api alangzü lakheah. 24Tüshe sangkung ju kero phulung ke abükkhinü heande alakheah, tümüde apungnü thsunglode yün. 25Ayinkhipü tsangchoki Jisunü kemi kheaknü tsahde api jingyanrübo kilim arü. 26Küyimki api kemi kheak tsahkhi ajingyanrübonü angükheanü arünü müyinsahde tha, “Ha me khülang ah!” Tüsho arünü trede zhi. 27Tüshe Jisunü nahde arü ki tha, “Mulong toang! Ha I ah. Dütre.”

28Tüsho Peternü api ki tha, “Atungpuh, ju nü a sho I nü kilim kemi kheaknü arüpü thiyukhüm jihang.” 29Jumonü apinü tha, “Arang.” Tüsho küyimki Peter ju sangkung chingnü akikhea, apinü kemi kheaknü tsahde Jisu kilim yü. 30Tüshe küyimki apinü apung müküpkhi ngükhea, api trede alakheah; tüsho keamyukde alakhi apinü zhi, “Atungpuh, I khümkhitang!” 31Jisunü nahde khah chunga yüshihbah api tholo, tüsho api ki tha, “O nü akin ninikhi, tümüde nü dukiuhlokhea?” 32Tüsho küyimki ane sangkung ching yüzahkhea, apung tukloabah. 33Judüki sangkung ching larübo arü tüsho api kingaünde tha, “Tsükjide nü a Thrünpuh tsührü ah.”

Gennesaret ching Tukthsürü Thsüngukhi

(Mk 6.53-56)

34Küyimki arü hode ayükhea, arünü Gennesaret lomi ching arü. 35Ju dangpung ching lakhi mihtsürübonü Jisu mütsanbah arünü ju mühi lomi alala ching thiyusheak yüshih tüsho tukthsürü alala api kilim bedarü, 36tüsho arünü api khim müngam kheak lang she aqiupü api ki mushu. Tüsho ju qiurü alala nguabah.

Currently Selected:

MATHI 14: YIMCBSI

Highlight

Copy