MATHI 13

Müjih-hiurü Shihdanglimyu

(Mk 4.1-9; Lk 8.4-8)

1Ju nimung Jisu thüyam chingnü wukhiuk tüsho keto yean bin. 2#Lk 5.1-3Yimto ato api ki mukhungde arü, jumonü apinü sangkung ching yüzahbah bin; tüsho yimto alala ke mungyean zhip. 3Judüki apinü arü ki shihdanglimyu ahihdo tha: “Kheahang, müjih-hiurü khülang müjih hiupü yü. 4Tüsho apinü ahiuchoki, khürü limmungyean hiuyuk, tüsho wuhnubo arübah jurü tsühabah. 5Khürü alo hihde mülapung lungmibo kheak hiukih; tüsho alo kheahde mülamonü jurü nahde mukhuh. 6Tüshe küyimki ani akhiukkhea, arü kheak thsahkih, tüsho arü ying mülamonü yiuhabah. 7Khürü ayangrungbo ching hiuyuk, tüsho ayangbo mukhuhbah jurü khüpsahabah. 8Tüshe khürü alo atsü kheak hiuyuk tüsho khürünü chi, khürünü rukrü, khürünü samrü bande asojih. 9Nüsa nükhün kihlasho aniang!”

Shihdanglimyubo Amütsan

(Mk 4.10-12; Lk 8.9-10)

10Tüsho jingyanrübonü arübah api ki tha, “Tümü thsükhi nünü arü ki shihdanglimyu chingnü thacho le?” 11Apinü alo, “Tümütüsho yinmi kiulongthsü aramyubo mükheahpü nüsa kilim jih, tüshe arü kilim a müjih. 12#Mt 25.29; Mk 4.25; Lk 8.18; 19.26Tümütüsho shepü lanü api kilim alü jihbah, tüsho api suhdahde alabah; tüshe shepü mülanü, api anikhüh lakhi ju she anihbuh kheaknü lude atsobah. 13Jumonü inü arü ki shihdanglimyubo chingnü asukchoh, tümütüsho kheahkheah she arünü müngü, tüsho anini she arünü muso, yungsho arünü manikhit. 14Tüsho Isaianü müchitkhi arü kheak dünji:

‘Anini she nüsanü manikhit,

tüsho kheahkheah she nüsanü mükheahkhit;

15tümüde ha mihtsürü mulong makhaa lah,

asopü arü nükhünbo düngdünglah,

tüsho mükjibo tuka lah,

jude müthsükhülaa arü mükbonü angübah,

tüsho arü nükhünbonü asobah,

jude müthsükhülaa arü mulongnü anikhitbah arholobah

tüsho inü arü thsüngujihbah.’

16 # Lk 10.23,24 “Tüshe nüsa mükbo tüsho nüsa nükhünbo müngühmühi, tümüde arünü ngüchoh tüsho sochoh; 17tümüde inü nüsa ki tsükjide thachoh, nüsanü angükhi tüsho asokhi wukihrübo tüsho thiyuro-lungki mihtsürübo ahihdonü ngünelah tüsho sonelah, tüshe müngü tüsho muso.

Müjih-hiurü Shihdanglimyu Thanakkhi

(Mk 4.13-20; Lk 8.11-15)

18“Jumonü müjih-hiurü shihdanglimyu aniang: 19Küyimki khürünü kiulongthsü yu sobah ju manikhitba, Amütsü Khülang arübah api mulong ching hiua lakhi ju jangkhide tsochoh. Müjih limmungyean hiukhi ju api ah. 20Lungmi kheak hiukhi ju, shepünü thiyu sobah asühde nahnah leangkhichonü api ah; 21tütüshe api kheak aying mülakhinü anükhühkheak lang lachoh. Küyimki küpkhuk yungsho thsümüchi arübanü ju yu dünkheaknü api nahde lungabahchoh. 22Ayangrung ching hiukhi ju, shepünü thiyu sobah alomi mulong sansan tüsho lakhit asühkhinü thiyu ju khüpsahshihcho, tüsho aso masochonü api ah. 23Tüshe alo atsü kheak hiukhi ju shepünü thiyu sobah ju anikhitchonü api ah; apinü hidung akhiukshihbah khürünü chi, khürünü rukrü yungsho khürünü samrü bande asochoh.”

Muthsuaberim Shihdanglimyu

24Apinü arü ki shihdanglimyu püpü tha: “Yinmi kiulongthsü ju mihtsürü khülangnü api lu ching müjih atsü hiukhi kiphahlah; 25Tüshe küyimki mihtsürübo yapabahkheanü, api riri arübah hi bolung muthsuaberim hiuyuk tüsho tsoabah. 26Küyimki hi mukhuhbah aso asokhea, muthsuaberim she akhiuk. 27Jumonü atungrü yamlarübonü arübah api ki tha, ‘Atobuh, nünü nü lu ching müjih atsü hiukhi yung de? Dale küde thsah muthsuaberim küchingnü arüa la?’ 28Apinü arü ki tha, ‘Thiriri khülangnü ha rhimodo.’ Yamlarübonü api ki tha, ‘Nünü isa yübah jurü rukmukhungshihba shi?’ 29Tüshe apinü tha, ‘Düh, jude yungsho nüsanü muthsuaberimbo rukmukhungchoki jurü lung hi she rukmurhubah. 30Yimlupü khiungde ane rukhüh asürüshang, tüsho yimlupü kim ching inü yimlurübo ki thabah, “Akhuhde muthsuaberimbo hanmukhungang tüsho mo ching takpü athsün athsün thsang, tüshe hi a I jakam ching hanmukhungang.”’”

Woninji Shihdanglimyu

(Mk 4.30-32; Lk 13.18-19)

31Apinü arü ki shihdanglimyu püpü tha: “Yinmi kiulongthsü ju mihtsürü khülangnü api lu ching woninji hiukhi kiphahlah, 32küpü müjih alala bolung aninibe la; küyimki tode asürübanü sangrungbo kheaknü ju atobe tüsho sangdung khülang kamchoh, junangde thüning wuhnubonü arübah akhahbo kheak arü sapbo shuchoh.”

Phaüm Shihdanglimyu

(Lk 13.20-21)

33Apinü kheaküshe arü ki shihdanglimyu püpü tha: “Yinmi kiulongthsü ju, aliberü khülangnü phaüm lubah aümdungkhi pungdüchi 40 ching düsah-a mülamyi khiungde azokhi kiphahlah.”

Jisunü Shihdanglimyubo Ahorikhi

(Mk 4.33-34)

34Jisunü harü alala shihdanglimyubo chingnü boto ki asuk; tüsho shihdanglimyu mübedüa apinü arü ki masuk, 35junangde wukihrünü athakhi dünjipü lakheah:

“Inü shihdanglimyubo ching I mün khimshuhbah;

alomiküp khimtanchokinü rama lakhi inü athabah.”

Muthsuaberim Shihdanglimyu Thanakkhi

36Judüki Jisunü boto thiyia tsoshih tüsho thüyam ching yü. Tüsho api jingyanrübonü arübah tha, “Thulu ching muthsuaberimbo shihdanglimyu isa ki thanaka huhang.” 37Apinü arü ki alo tüsho tha, “Shepü müjih atsü hiuchonü Mihtsürü Tsührü ah. 38Thulu ju alomiküp, müjih atsübo ju kiulongthsü tsührübo, tüshe muthsuaberimbo a mihbukmuyuk tsührübo ah. 39Thiriri shepünü jurü hiukheanü arimri, yimlupü ju lün akheam, tüsho yimlurübo ju yunirübo. 40Jumonü muthsuaberimbo hanmukhungbah mo ching takkhi nangde, ha lün akheam ching dünjibah. 41Mihtsürü Tsührünü api yunirübo thiyibah, tüsho arünü api kiulongthsü chingnü neak yihbeakshihrü tüsho amütsü rhimorü alala bemukhungbah, 42tüsho arübo motru ching jipyukbah; ju ching mihtsürübonü atripbah tüsho arü hü mütrütbah. 43Judüki thiyurolungkirü arü Abuh kiulongthsü ching ani nangde atahbah. Nüsa nükhün kihlasho aniang.

Rama-lakhi Rahpung Shihdanglimyu

44“Yinmi kiulongthsü ju mihtsürü khülangnü ngübah thulu ching rama-lakhi rahpung kiphahlah; ju kheak asühkhinü apinü yüchoh tüsho api lakhi alala yinbah ju lu thulochoh.

Sünso Shihdanglimyu

45“Yinmi kiulongthsü ju shothsümolorünü ayimkhi atsüdak sünso kiphahlah, 46küyimki apinü amo achak sünso khülang ngübanü, yüchoh tüsho api lakhi alala yinbah ju thulochoh.

Keang Shihdanglimyu

47“Yinmi kiulongthsü ju keto ching jipyukbah thüngüh mungji aban wuhmukhungkhi keang khülang kiphahlah, 48küyimki ju mibanü, arünü kemungyean thode arüchoh; arünü binbah atsübo hah ching yukchoh, tüshe amütsübo a bahchoh. 49Lün akheam ching junangde alabah. Yunirübo arübah thiyuro chingnü mihbukmuyuk büthsübah, 50tüsho arübo motru ching jipyukbah. Ju ching atripkhi tüsho hü mütrütkhi labah.”

Thiyuro Aso tüsho Awün

51Jisunü arü ki tha, “Nüsanü harü alala anikhitdü shi?” Arünü api ki alo, “Am, Atungpuh.” 52Judüki apinü arü ki tha, “Jumonü yakzan thsangyurü yinmi kiulongthsü ching jingyanrü kamrü ju thüyam putungrünü anihbuh rahpung chingnü aso tüsho awün kukrukbo lude akhiukkhi kiphahlah.”

Nazareth ching Jisu Bahyukkhi

(Mk 6.1-6; Lk 4.16-30)

53Küyimki Jisunü harü shihdanglimyubo thakhamkhea, apinü ju chingnü chamachih. 54Tüsho küyimki api nihbuh lomi lim arükhea, apinü arü sinagog ching thsangyu, junangde arübo müyinsah tüsho tha, “Ha mihtsürü lümlung tüsho khinthiyinbebo küchingnü ngüa la? 55Ha sangrhimosorü tsührü yung de? Abe ju Mari yung de? Tüsho api keoniorübo Jakob, Josep, Simon, tüsho Juda yung de? 56Tüsho api niurü aliberübo alala isa lung lah yung de? Dale tüsho apinü harü alala küchingnü angükhea?” 57#Jhn 4.44Jumonü arünü api bahyuk. Tüshe Jisunü arü ki tha, “Wukihrü khülang ju nihbuh kiuto tüsho nihbuh yamkhün ching düna alala ching wüntre jihchoh.” 58Tüsho arünü amükinmonü apinü ju ching khinthiyinbebo hihde mürhimo.

Currently Selected:

MATHI 13: YIMCBSI

Highlight

Copy