MATHI 12

Amuni dünkheak Keokhikhi

(Mk 2.23-28; Lk 6.1-5)

1Ju kim ching Jisunü Amuni thulubo hode yü. Tüsho api jingyanrübonü akhümkhi hode manji rüta tsühpü tankih. 2Tüshe küyimki Pharisirünü ju ngükhea, arünü api ki tha, “Kheahang, Amuni tümü mürhimopü yakzan lanü nü jingyanrübonü rhimochoh!” 3Judüki apinü arü ki tha, “David tüsho api lung berünü khümde alachoki tümü rhimokheanü nüsanü mükhe de? 4Apinü Thrünpuh yam ching yüzah tüsho api le api lung berünü yikhap tsüh–amükeamrübo kheak hode arü thsungkheaknü ju rhimopü yakzannü mümülüde alakheah. 5Yungsho amükeamrübonü Amuni arüngyam münean tüshe arü amülim mülakhi nüsanü yakzan ching mükhe de? 6Arüngyam kheaknü atobe khülang ha ching lah de inü nüsa ki thachoh. 7#Mt 9.13Tüshe nüsanü, ‘Inü laksah-a kingaünkhi yungde mihmuzho lunelah,’ dükhi amütsan mükheahkhülaa, nüsanü amülim mülarü mübahyuk. 8Tümütüsho Mihtsürü Tsührü ju Amuni yo Atungpuh ah.”

Khah Thripshe Mihtsürü

(Mk 3.1-6; Lk 6.6-11)

9Küyimki api ju chingnü chamachihkhea, apinü arü yo sinagog ching yüzah. 10Tüsho ju ching khah thripshe mihtsürü khülang lakheah. Arünü api ki anihbuh müdampü thsüde keokhi, “Amuni thsüngupü yakzan la de?” 11#Lk 14.5Judüki apinü arü ki alo, “Amuni namfimihnu khülang shingkung ching keamyukbah thokhita mulupü thsüde nüsa bolung she mihtsürü la? 12Dale mihtsürü a küdükhüh she namfimihnu kheaknü adün labe a? Jumonü Amuni atsü rhimopü yakzan lah.” 13Judüki apinü mihtsürü ki tha, “Nü khah chungang.” Apinü chung, tüsho khülim nangde tsüabah. 14Tüshe Pharisirünü wukhiuk tüsho Jisu laksahpü rük yimmusu.

Thrünpuhnü Amokhitkhi Yamlarü

15Tüshe küyimki Jisunü ju mükheahkhea, apinü ju chingnü akhinabah; yimto atonü api dunglim yan, tüsho apinü arü alala thsüngujih. 16Tüsho api dünkheak püpürü ki müthapü arü ki thiyukhüm jih. 17Ha Isaia wukihrünü athakhi dünjipü lakheah:

18“Ha ching inü amokhitkhi I yamlarü,

inü amuzhokhi tüsho inü asühkhi lah;

inü api kheak I me lashihbah,

tüsho apinü trükshihbo ki thiyuro zhiyukbah.

19Apinü murukachih yungsho müzhi;

shenü she kiudunglimrobo ching api düsheak muso.

20Thiyuro akuk müngüyi khiungde,

apinü ayihrüpkhi khiukto mükhikshak,

tüsho trude alakhi tsünpung müyihmüt;

21tüsho mihtsürü alalanü api kheak mulonglam labah.”

Jisu tüsho Beelzebub

(Mk 3.20-30; Lk 11.14-23)

22Judüki amünean me yüzahkhi, müktukrü aduh-a api ki bedarü; tüsho apinü anihbuh thsüngu, junangde mihtsürü müktukrü aduh-a lakhinü thiyu tha tüsho ngü. 23Boto alalanü müyinsahde tha, “Ha David tsührü ju a shi?” 24#Mt 9.34; 10.25Tüshe Pharisirünü ju sobah tha, “Amünean me yakzanshuhbuh Beelzebub hodü lang habuhnü amünean me yankhita bahchoh.” 25Jisunü arü lümkhi mükheah tüsho arü ki tha, “Nihbuh azhihde achamnakkhi kiulongthsü aban thsümünimbah, tüsho nihbuh azhihde achamnakkhi kiuto yungsho yamkhün aban müzhipkhuk. 26Arimrinü Arimri yankhita bahsho, nihbuh azhihde api chamnaka lah. Dale küde thsah api kiulongthsü zhipkhukpü? 27Tüsho Beelzebub hode inü amünean me yankhitchosho, nüsa mihtsürübonü shepü hode arü yankhitcho? Jumonü arübo ju nüsa mütsanmükhirü thsübah. 28Tüshe Thrünpuh me hode inü amünean me yankhita lasho, Thrünpuh kiulongthsü nüsa kheak arüdo. 29Yungsho khürünü sühmüh lakhi mihtsürü ju akhuhde rhüka muzosho, küde thsah api yam ching yüzahbah akukrukbo lupü? Jushu apinü anihbuh yam yankhia lukhukbah. 30#Mk 9.40Shepü I lung mülanü I azhihde lah, tüsho shepü I lung mübenü hiumüzütshihchoh. 31Jumonü inü nüsa ki thachoh, neak tüsho mükhemükim thakhi alala mihtsürü ki neak bahjihbah, tüshe Amüsüh Me azhihde mükhemükimkhi a neak mübahjih. 32#Lk 12.10Khürünü Mihtsürü Tsührü azhihde athakhi neak bahjihbah; tüshe shepünü Amüsüh Me azhihde athabanü, ha lün yungsho arübe lün ching she api a neak mübahjih.

Sangdung tüsho Ju Sangaso

(Lk 6.43-45)

33 # Mt 7.20; Lk 6.44 “Sangdung ju atsü thsüsho aso atsü labah, yungsho sangdung ju amütsü thsüsho aso amütsü labah; tümüde sangdung khülang ju asonü mütsanchoh. 34#Mt 3.7; 23.33; Lk 3.7; Mt 15.18; Lk 6.45Nüsa phurutobo, nüsa amütsübonü küde thsah atsü thakhukpü? Tümütüsho tümünü mulong mide lanü ju münnü asukchoh. 35Mihtsürü atsünü api kheak lakhi atsü chingnü atsü akhiukshihchoh, tüsho mihtsürü amütsünü api kheak lakhi amütsü chingnü amütsü akhiukshihchoh. 36Tüshe mihtsürünü mükümkang yu thakhi aban dünkheak mahkhap nimung arünü thiyusheak jihbah de inü nüsa ki thachoh. 37Tümütüsho nü yubo hode nü alim mütsanbah, tüsho nü yubo hode nü abahyukbah.”

Khinthiyinbe Khülang Kheangkhi

(Mk 8.11-12; Lk 11.29-32)

38 # Mt 16.1; Mk 8.11; Lk 11.16 Judüki yakzan thsangyurü tüsho Pharisirü khürünü api ki tha, “Thsangyurü, isanü amütsan khülang nü kilimnü ngünelah.” 39#Mt 16.4; Mk 8.12Tüshe apinü arü ki alo, “Amütsü tüsho müzammüram lünnü amütsan yimchoh, tüsho wukihrü Jona amütsan kheak hobah tümü amütsan müjihde alabah. 40Nimung mahsam tüsho tsüngre mahsam Jona thüngüh buk ching lakhi nangde, Mihtsürü Tsührü nimung mahsam tüsho tsüngre mahsam alo alunglim labah. 41Mahkhap nimung Nineve mihtsürübonü ha lün lung zhibah tüsho amülim jihbah, tümütüsho Jonanü thsangyuthsangrakhi hode arü mulong müthri, tüsho kheakü Jona kheaknü atobe khülang ha kheak lah. 42Sheba kiulongthsübenü ha lün lung mahkhap ching zhipbah tüsho amülim jihbah, tümüde alibenü Solomon lümlung anipü alomi akheambo chingnü arü; tüsho atsütsü Solomon kheaknü atobe ha kheak lah.

Amünean Me Alodarükhi

(Lk 11.24-26)

43“Küyimki amünean me mihtsürü kheaknü awukhiukbanü sühakhimpü akung dangpungbo hode yimde yüchoh, tüsho ju müyimkhitchoh. 44Jumonü apinü thachoh, ‘I arükhi I yam lim alode ayübah.’ Tüsho küyimki api arübanü ju akeangkeang, phüta, tüsho tsanglunga ngüchoh. 45Judüki apinü yübah api kheaknü alü mihbukmuyuk mebo püpü thüne anihbuh lung bebah ju ching yüzahchoh tüsho lachoh; tüsho mihtsürü kuhi ju atan kheaknü ashube amütsübe kamchoh. Junangde mihbukmuyuk lün kheak she jude alabah.”

Jisu Abe tüsho Keoniorübo

(Mk 3.31-35; Lk 8.19-21)

46Küyimki api boto ki asukachihde alakheanü, abe le akeoniorübo api ki asukachihpü künde wungdo zhipde alakheah. 47Judüki khülangnü api ki tha, “Kheahang, nü be le nü keoniorübo nü ki asukachihpü künde wungdo zhiplah.” 48Tüshe apinü alo, “I be she a tüsho I keoniorübo ju sherü a?” 49Tüsho apinü ajingyanrübo kilim akhah chungbah tha, “I be le I keoniorübo ha kheak lah! 50Tümütüsho sherünü yinmi ching I Buh lümkhi rhimochonü I khiung, I chi tüsho I be ah.”

Currently Selected:

MATHI 12: YIMCBSI

Highlight

Copy