MATHI 11

Johan Baptijihbuh kilimnü Yunithsürübo

(Lk 7.18-35)

1Jisunü api jingyanrü thürükheak mahne ki thsangdankham dunglim, apinü Galilee kiutobo ching thsangyupü tüsho thsangyuthsangrapü ju chingnü yü.

2Küyimki Johannü Khrista rhimobo dünkheak rihyam chingnü asokhea, apinü anihbuh jingyanrü khürü yüshih, 3tüsho api ki tha, “Arüpü lakhi ju nü a shi, dashi isanü khürü aleangba?” 4Jisunü arü ki alo, “Yüang tüsho nüsanü tümü socho tüsho ngüchonü Johan ki thaang: 5Müktukrünü ngüchoh tüsho jingkikrünü tsahchoh; apham kihrü müsühkhitdo tüsho nükhünpeangrünü sochoh; asherü arhang kamloshihdo tüsho zhochihrü ki thiyusheak atsü thsangyudo. 6Tüsho shepü I dünkheak müdukiuhlonü müngühmühi.”

7Arü chamachihshu, Jisunü Johan dünkheak botobo ki thapü tankih: “Sunglo ching nüsa tümü kheahpü yükhea? Apungnü sangrung yüna niungniungshihkhi a shi? 8Nüsa tümü kheahpü yükhea? Khimmih athünak yihkhi mihtsürü khülang a shi? Sherünü khimmih athünak yihchonü kiulongthsürü yambo ching lachoh. 9Tüshe nüsa tümü kheahpü yükhea? Wukihrü khülang a shi? Am, inü nüsa ki thachoh, tüsho wukihrü kheaknü alü ah. 10Tümüde api dünkheak ha thrüta lah: ‘Kheahang, nü limro thsakhamshihpü inü nü müngüh I yunithsürü yüshihchoh.’ 11Atsütsü inü nüsa ki thachoh, aliberübonü zübekhi bolung Johan Baptijihbuh kheaknü atobe masürüyi; tüshe shepü yinmi kiulongthsü ching aninibe lanü api kheaknü atobe ah. 12#Lk 16.16Tüsho Johan Baptijihbuh nimungbo chingnü kheakü khiungde yinmi kiulongthsü jangachihchoh, tüsho amüküprünü ju jangkhia luchoh. 13Tümüde wukihrübo alala tüsho yakzannü Johan khiungde müchit, 14#Mt 17.10-13; Mk 9.11-13tüsho nüsanü arü yusheak leangkhipü mulongsho, arüpü müchita lakhi Elija ju Johan ah. 15Shepü nükhün kihlanü aniang!

16“Inü ha lün tümü kheak akeba? Arübo yinzüyindo dangpung ching azürübo arü müyamrübo ki jide abinkhi nangde lah, 17‘Isanü nüsa thsungkheak khungpi khungdo, tüshe nüsanü mütsün; isanü nüsa ki mitrip khün thsü, tüshe nüsanü mütüzho.’ 18Tümüde Johan mütsühyungde arü, tüshe arünü thachoh, ‘Api kheak amünean me lah.’ 19Mihtsürü Tsührü tsühyungde arü, tüsho arünü thachoh, ‘Kheahang, ha ching bukchihrü tüsho amüshangrü, ruk-threrü tüsho aneakrübo müyamrü khülang lah.’ Tüshe Thrünpuh lümlung ju arhimonü alim mütsanchoh.”

Amükinkhi Kiutobo

(Lk 10.13-15)

20Judüki apinü khinthiyinbebo ahihbe thsüde arhimokhi kiutobo Jisunü athürühpü tankih, tümütüsho arünü mulong mümüthri. 21“Karazin, nü are! Bethsaida, nü are! Nüsa kheak rhimokhi khinthiyinbebo Tair tüsho Sidon ching rhimokhülaa, arünü müngühnü shungliukhim tüsho awah awuhde mulong müthria labah. 22Tüshe inü nüsa ki thachoh, mahkhap nimung nüsa kheaknü alü Tair tüsho Sidon thsungkheak arümkheam labah. 23Tüsho nü, Kapernaum, shepü thüning ching shuhkih-a lanü thsümüchi ching thokhibah; tümüde nü kheak rhimokhi wuto rhimobo Sodom ching rhimokhülaa, ju khihni khiungde laa labah. 24#Mt 10.15; Lk 10.12Tüshe mahkhap nimung nüsa kheaknü alü Sodom lomi thsungkheak arümkheam labah de inü nüsa ki thachoh.”

I kilim Arang tüsho Sühakhimang

(Lk 10.21-22)

25Ju kim ching Jisunü tha, “Inü nü shichoh, Abuh, thüning tüsho alomi Tungpuh, tümütüsho nünü harü lümlung larü tüsho anikhitrü kheaknü müyima zo, tüsho azürü aninibo ki akhiuka huh. 26Am, Abuh ha nü miki atsü lakheah. 27#Jhn 3.35; Jhn 1.18; 10.15I Buhnü lüpdükhi I kilim jihdo, tüsho Abuh kheak hode shenü she atsührü mümükheah. Yungsho atsührü tüsho atsührünü api amikheak akhiukshihpü mokhitrübo kheak hobah shenü she Abuh mümükheah. 28Nüsa rozhakrü tüsho hahmülang hanrübo alala I kilim arang, tüsho inü nüsa kilim sühakhim jihbah. 29I sangkap lubah nüsa kheak yihkihang tüsho I kheaknü anikhitang, tümüde I tsüyihrü tüsho mulong athünak, tüsho nüsa me sühakhim ngübah. 30Tümütüsho I sangkap amülü tüsho I hah hiphiplah.”

Currently Selected:

MATHI 11: YIMCBSI

Highlight

Copy