MATHI 15

Jipü Yakli Thsangyukhi

(Mk 7.1-13)

1Judüki Pharisirü tüsho yakzan thsangyurü khürü Jirusalem chingnü arübah keokhi, 2“Tümü thsükhi nü jingyanrübonü jipü yakli thsümünimcho? Tümütüsho arünü yikhap tsühchoki arü khah mümütsak.” 3Tüshe apinü arü ki tha, “Tümüde nüsanü she nüsa jipürü yakli thsungkheaknü Thrünpuh yukhüm thsümünimcho? 4Tümütüsho Thrünpuhnü tha, ‘Nü buh tüsho nü be wüntreang’; tüsho, ‘Shepünü abuh yungsho abe athruajibanü api sheshang.’ 5Tüshe nüsanü thachoh, ‘Shepünü abuh yungsho abe ki, “Tümüpürü nünü I kilimnü alü thsükheanü, ju Thrünpuh kilim jihdo” de thasho, 6abuh yungsho abe wüntrepü yihnüpü müla.’ Junangde nüsa jipü yakli dünkheaknü nüsanü Thrünpuh yu akeangkeang kamshihchoh. 7Nüsa yiuhkhaprübo! Isaianü nüsa dünkheak müchitkhi dükdü ah:

8‘Harü mihtsürübonü arü münbonü I ki wüntre jihchoh,

tüshe arü mulongbo I kheaknü limshude lah.

9Arünü akeangkeang ching I kingaünchoh;

arünü mihtsürü yuzüngbo ju

kingaün yakzan nangde thsangyuchoh.’ ”

Mihtsürü Müneanshihkhi

(Mk 7.14-23)

10Jisunü mihtsürübo ju api kilim jibah tha, “Aniang tüsho anikhitang: 11Tümü mün ching yüzahchonü junü mihtsürü mümüneanjihchoh; tüshe tümü mün chingnü akhiukchonü junü mihtsürü müneanjihchoh.” 12Judüki jingyanrübonü arübah api ki tha, “Ha thade asochoki Pharisirü mulong yurido de nünü mükheahnah?” 13Tüshe apinü alo, “Yinmi ching I Buhnü mükhimkhi sangrung aban rukkhitbah. 14#Lk 6.39Arü küdah thsüshang. Arübo a müktukrü limberübo müktukrübo ah. Tüsho müktukrünü müktukrü limbesho, ane chido shingkung ching keamyukbah.” 15Judüki Peternü tha, “Ha shihdanglimyu isa ki thanaka huhang.” 16Jumonü Jisunü tha, “Nü she kheakü khiungde manikhityi de? 17Tümüpürü mün ching yüzahchonü buk ching yüzahchoh tüsho müsümülüa bahchoh de nünü manikhityi de? 18#Mt 12.34Tüshe tümü mün chingnü akhiukchonü mulong chingnü akhiukchoh, tüsho jurünü mihtsürü müneanjihchoh. 19Tümüde mulong chingnü amütsü lümkhibo, mihkhukpü, müzammüram, yüliyüra, ahühkhi, arükchih thiyumütsan, mükhemükimbo akhiukchoh. 20Harünü mihtsürü müneanjihchoh, tüshe khah mümütsakde yimtsühkhinü a mihtsürü mümüneanjihchoh.”

Aliberü Khülang Akin

(Mk 7.24-30)

21Judüki Jisunü ju chingnü wukhiuk tüsho chamachihbah Tair le Sidon lim yü. 22Tüsho kheahang, Kanan liberü khülang ju mükeak chingnü arü tüsho api ki zhide tha, “I kheak amüthsüm laang, O Atungpuh, David tsührü! I tsührübe khitode amünean me yüzah-a lah.” 23Tüshe apinü alibe ki thiyu bümkhüh she malo. Tüsho ajingyanrübo arübah api ki tha, “Alibe tsoshang, tümüde anihbenü isa dunglim zhichoh.” 24Tüshe apinü alo, “I adükheakkhi Israel namfimihnu kilim lang thiyia arüshihkheah.” 25Alibenü arübah api miki khukningde tha, “Atungpuh, I rungang!” 26Apinü alo, “Azürübo yo yikhap lubah khihnubo kilim jipa bahpü dükdü yung.” 27Tüsho alibenü tha, “Dükdü ah, Atungpuh, tüshe khihnubonü she arü putungrü dükhüm kheaknü adütre ayokhikhi a tsühchoh.” 28Judüki Jisunü alo tüsho alibe ki tha, “O aliberü, nü akin tolah! Nünü alunekhi mülüjihdo.” Tüsho atsührübe ju kim chingnü nguabah.

Jisunü Mihtsürü Ahihdo Thsüngukhi

29Jisunü ju chingnü chamachihbah Galilee keto yeande yü. Judüki awung düpheak kheak yükih tüsho bin. 30Api kilim yimto ato, jingkikrü, müktukrü, aduhrü, bishia larü tüsho püpü ahihdo bede arübah ajing ki zojih; tüsho apinü arü thsüngujih. 31Aduhrünü athakhi, bishia larü tsüde akamkhi, jingkikrü tsahkhi tüsho müktukrünü angükhi ngübah mihtsürübonü müyinsah. Tüsho arünü Israel Thrünpuh shijih.

Chithürü Phüyi Yimkipkhi

(Mk 8.1-10)

32Jisunü ajingyanrübo api kilim jibah tha, “Inü harü mihtsürübo kheah-a muzholah; arübo I lung nimung mahsam mungdo tüsho arü atsühpü tümü müla. Inü arü khümde muwulungshihne, jude yungsho arü limro ching angakbah.” 33Api jingyanrübonü alo, “Yimto hadükhüh kippü thsüde ha azhik dangpung ching isanü yikhap suhdahde küchingnü angüba?” 34Jisunü keo, “Nüsa yikhap küdükhüh la?” Arünü alo, “Yikhap 7 tüsho thüngüh anini anükhüh.” 35Apinü boto ju alo kheak binang de tha. 36Jushu apinü yikhap 7 tüsho thüngühbo ju lubah makshe jih tüsho yihnakbah api jingyanrübo kilim jih; tüsho jingyanrübonü mihtsürübo kilim ahiuh. 37Jumonü arünü tsühbah bukthsü, tüsho arünü aningkhi adütrebo muluk atoto 7 mide hanmukhung. 38Tsühyungrübo ju aliberübo le azürübo mükhede athrürü 4000 lakheah. 39Apinü mihtsürübo thiyia tsoshihbah sangkung ching yüzah, tüsho Magadan lomi ching yü.

Currently Selected:

MATHI 15: YIMCBSI

Highlight

Copy