LUK 9

Jingyanrü Thürükheak Mahne Yüshihkhi

(Mt 10.5-15; Mk 6.7-13)

1Judüki apinü jingyanrü thürükheak mahne rukhüh jimukhung tüsho arü kilim amünean mebo alala kurungkheak tüsho tukthsürübo thsüngupü wu tüsho thiyukhümsühmüh jih. 2Apinü arübo Thrünpuh kiulongthsü thsangyuthsangrapü tüsho tukthsü thsüngupü yüshih. 3Tüsho apinü arü ki tha, “Hantsah thsungkheak tsobo yungsho qiuqiu yungsho yikhap yungsho sho tümü dühan; pangkhümpü she alü dühan. 4Nüsa thüyam kürü ching yüzahbanü ju ching binang tüsho ju chingnü chamachihang. 5#Yunir 13.51#Lk 10.4-11Tüsho sherünü nüsa müleangkhibanü, ju kiuto chingnü nüsa wukhiukchoki arü azhihkhi amütsan nüsa jing kheak yo asungthulung adankhia bahang.” 6Jumonü arünü chamachih tüsho kiutobo hode thiyusheak-atsü thsangyuthsangrade tüsho alala ching thsüngude yü.

Herod Yingyingkhi

(Mt 14.1-12; Mk 6.14-29)

7 # Mt 16.14; Mk 8.28; Lk 9.19 Kheakü Galilee yakzanshuhbuh Herodnü apinü arhimokhi alala so; api yingyingde alakheah, tümütüsho Johan ashekhi chingnü arhang kamloa lah de khürünü tha, 8khürünü Elija akhiuka lah de tha, tüsho püpürünü adüso wukihrü bolung khülang arhang kamloa lah de tha. 9Tüsho Herodnü tha, “Inü Johan ku lipshakdo, tüshe inü harü sobuh ha she a?” Tüsho apinü anihbuh shorupü mürang.

Chithürü Phüngü Yimkipkhi

(Mt 14.13-21; Mk 6.30-44; Jhn 6.1-14)

10Küyimki amüsüh-thsangyurübonü alode arükheanü arünü arhimokhi alala api ki thaa huh. Tüsho apinü arü bea lubah Bethsaida kiuto yo azhik dangpung ching mükhingde yü. 11Tüshe küyimki botonü ju mükheahkhea, arünü api dunglim yan; apinü arü leangkhi tüsho Thrünpuh kiulongthsü dünkheak thade athsüngupü yihnüpü larü thsüngujih. 12Küyimki arelim kamkhea, jingyanrü thürükheak mahne arübah api ki tha, “Arübo mühi kiutobo tüsho lomi ching yübah binkheamde tsühyungbe ngüshihpü thsüde boto thiyia tsoshang; tümüde isa ha azhik dangpung ching lah.” 13Tüshe apinü arü ki tha, “Nüsanü arü kilim atsühpü tümükhüh jihang.” Tüsho arünü tha, “Isanü yübah harü mihtsürü alala thsungkheak tsühyungbe muthulosho, yikhap 5 tüsho thüngüh 2 kheak hode müla.” 14Tümüde ju ching athrürü 5000 bande alakheah. Tüsho apinü ajingyanrübo ki tha, “Khunung thünim thünimnü thsübah arü binshang.” 15Arünü junangde thsü, tüsho arü alala binshih. 16Judüki apinü yikhap 5 tüsho thüngüh 2 ju lubah thüning lim abinkih-a kheahde makshe jih tüsho yihnakbah boto ahiuhshihpü jingyanrübo kilim jih. 17Junangde arü alala tsühbah bukthsü, tüsho arünü adütre aningkhi muluk 12 hanmukhung.

Peternü Jisu dünkheak Khipkhitkhi

(Mt 16.13-19; Mk 8.27-29)

18Api alangzü tamkhüntamnüde alachoki, ajingyanrübonü api lung arü, tüsho apinü arü ki keokhide tha, “I she ah de botobonü thacho?” 19#Mt 14.1,2; Mk 6.14,15; Lk 9.7,8Jumonü arünü api ki alojihde tha, “Johan Baptijihbuh, tüshe khürünü Elija de thachoh; tüsho püpürünü adüso wukihrü bolung khülang arhang kamloa lah de thachoh.” 20#Jhn 6.68,69Apinü arü ki tha, “Tüshe I she ah de nüsanü thacho?” Peternü alode tha, “Thrünpuh yo Khrista ah.”

Jisunü Api Thsünüpü tüsho Ashepü dünkheak Thakhi

(Mt 16.20-28; Mk 8.30—9.1)

21Tüsho apinü ha she ki müthapü müküpde tha. 22Tüsho apinü tha, “Mihtsürü Tsührü khide thsünübah, tüsho azothsürübo le amükeam putungrübo tüsho yakzan thsangyurübonü bahyukde alaksahbah tüsho nimung mahsam nipü arhang kamlobah.” 23#Mt 10.38; Lk 14.27Judüki apinü arü alala ki tha, “Khürünü I dunglim arünesho api küdah thsüde danyukbah nimung aban nihbuh sangkim shuh-a hanang, tüsho I dunglim yanang. 24#Mt 10.39; Lk 17.33; Jhn 12.25Tümütüsho shepünü nihbuh rhangdung khümkhitbanü ju adükheakbah, tüshe shepünü I dünkheaknü nihbuh rhangdung dükheakchonü ju akhümkhitbah. 25Tümütüsho mihtsürü khülangnü alomiküp athrünkhi alü thsüa lubah nihbuh thsümünima yungsho dükheaka lasho api tümü alü la? 26Tümüde shepünü I dünkheak achihchonü, Abuh, amüsüh yunirübo tüsho api müretahkhi ching arüchoki Mihtsürü Tsührünü api dünkheak achihbah. 27Tüshe inü nüsa ki atsütsünü thaanü, ha ching zhipde alarü khürü a arünü Thrünpuh kiulongthsü müngüyi khiungde müshede alabah.”

Jisu Jak Müthrikhi

(Mt 17.1-8; Mk 9.2-8)

28Tüsho harü thabah nimung tizheah dunglim, apinü Peter, Johan, tüsho Jakob bea lubah tamkhüntamnüpü awung lim yü. 29Tüsho api tamkhüntamnüde alachoki, miro müthriabah, tüsho api khimmihbo müyedo tüsho zhingzhing kam. 30Judüki mihtsürü mahne Mosa tüsho Elija nangde api ki asukachih, 31api müretahkhi ching akhiuk tüsho Jirusalem ching dünjipü api chamachihpü dünkheak asuk. 32Tüshe Peter tüsho api lung berübo yapshea lakheah; tüsho küyimki arü tsüde müsükhea, arünü api müretahkhi tüsho api lung zhipkhi mihtsürü mahne ngü. 33Tüsho arübo api kinü chamachihchoki, Peternü Jisu ki tha, “Atungpuh, isa ha ching lapü tsülah; tüsho isanü nü le Mosa tüsho Elija thsungkheak abande khimyam mahsam thsanü”–apinü tümü thachonü mümükheahde alakheah. 34Apinü ha thade alachoki, amo arübah arü liudo; tüsho arü amo ching yüzahchoki trede alakheah. 35#Mt 3.17; 12.18; Mk 1.11; Lk 3.22#2 Pet 1.17,18Judüki amo chingnü düsheak akhiukde tha, “Ha inü mokhitkhi I tsührü ah. Api ki aniang!” 36Tüsho küyimki düsheak arün thsükheanü Jisu zangrü ngü. Tüshe arünü zhikde la, tüsho ju khip arünü angükhi she ki mütha.

Amünean Me Yüzahkhi Azürü Thsüngukhi

(Mt 17.14-18; Mk 9.14-27)

37Ashidopü küyimki arü awung chingnü akikhea, yimto atonü api shoru. 38Zukleangnü boto chingnü mihtsürü khülangnü zhide tha, “Thsangyurü, inü nü ki mushuchoh, I tsührü kheak kheahang, tümüde api I tsührü lapkhiung ah. 39Tüsho kheahang, amünean menü api rama lah, tüsho zukleangnü arungchoh; junü api zünga adanchoh, junangde amün ching mükeke rhukrhukchoh. Hanü api arothsünnü bahkhichoh. 40Jumonü inü nü jingyanrübo ki ju yankhitpü mushu, tüshe arünü mukuk.” 41Judüki Jisunü alojihde tha, “O akin mülakhi tüsho lakshilim asahkhi lün, külokhüh I nüsa lung laba tüsho nüsa lung arümkheamba? Nü tsührü ju ha kheak bede arang.” 42Api arüde alachoki amünean menü api züngde shuh-a adan, judüki Jisunü amünean me thürühbah azübuh ju thsüngu, tüsho abuh kilim jihlo.

Jisunü Api Shepü Müchitlokhi

(Mt 17.22-23; Mk 9.30-32)

43Tüsho Thrünpuh wüntremüretah dünkheaknü arü alalanü müyinsah. Tüshe Jisunü arhimokhi alala kheak mihbüm abannü müyinsahchoki, apinü ajingyanrübo ki tha, 44“Harü yubo nüsa nükhünbo ching yüzahshang, tümüde Mihtsürü Tsührü ju mihtsürübo khah ching yukjihpü thsüchoh.” 45Tüshe ha thakhi arünü manikhit, tüsho ha arü kheaknü rama lakheah, junangde arünü müramkhit; tüsho ha dünkheak api ki keopü arünü trede alakheah.

Shepü Atobe a?

(Mt 18.1-5; Mk 9.33-37)

46 # Lk 22.24 Judüki arü bolung shepü atobe a de atsangachih akhiuk. 47Tüsho Jisunü arü mulong ching lümkhi mükheahbah azürü nunu bea lubah api ki zhipshih, 48#Mt 10.40; Lk 10.16; Jhn 13.20tüsho arü ki tha, “Shepünü I mung chingnü ha azürü nunu leangkhichonü I leangkhichoh; tüsho shepünü I leangkhichonü I arüshihbuh leangkhichoh. Tümüde nüsa bolung shepü aninibeanü atobe ah.”

Shepünü Nüsa mazhihnü Nüsa kilim Lah

(Mk 9.38-40)

49Judüki Johannü alode tha, “Atungpuh, isanü khürü nü mung chingnü amünean mebo yankhitde ngü, tüsho isanü api yanlodo tümütüsho apinü isa lung yande marü.” 50Tüshe Jisunü api ki tha, “Api düyanlo, tümüde shepünü nüsa mazhihnü nüsa kilim lah.”

Samariarünü Jisu Mübeyukkhi

51Küyimki api yinmi lim bede yükihpü kim khiungkhea, apinü mulong pungkhibah Jirusalem lim yü, 52tüsho api müngüh yunithsürübo yüshih. Arü yüde alachoki, arünü api thsungkheak thsakhampü Samaria kiulong ching yüzah. 53Tüshe arünü api mübeyuk, tümütüsho api ju Jirusalem lim yüde alakheah. 54Küyimki api jingyanrübo Jakob tüsho Johannü ha ngükhea, anenü tha, “Atungpuh, Elijanü arhimokhi nangde isanü yinmi chingnü mo jikhibah arübo takabahshihpü mulongla shi?” 55Tüshe Jisunü rholobah arü thürüh. 56Tüsho arünü kiulong püpü ching yü.

Jingyanrü Thsüpü Athülün

(Mt 8.19-22)

57Arünü limro ching hantsahde alachoki, khürünü api ki tha, “Atungpuh, nü kürü ching yübanü inü nü yanbah.” 58Tüsho Jisunü api ki tha, “Rimrebo arü khünbo lah tüsho thüning wuhnubo arü sapbo lah, tüshe Mihtsürü Tsührü a küching she kurampung müla.” 59Judüki apinü püpürü ki tha, “I dunglim yanang.” Tüshe apinü tha, “Atungpuh, akhuhde inü yübah I buh kiuyuka bahanü.” 60Jisunü api ki tha, “Asherünü asherü kiuyuka bahshang, tüshe nünü yübah Thrünpuh kiulongthsü thsangyuthsangraang.” 61Tüsho püpürünü tha, “Atungpuh, inü nü yanbah, tüshe akhuhde yübah I yam ching larü ki chode thaanü.” 62Tüshe Jisunü api ki tha, “Shepünü khin ching wochakde zhipbah dunglim rholoa kheahchonü Thrünpuh kiulongthsü tankihpü müthülün.”

Currently Selected:

LUK 9: YIMCBSI

Highlight

Copy