LUK 10

Jisunü Nerükheak Mahne Yüshihkhi

1Harü dunglim Atungpuhnü püpürü 72#Hüm khürü ching a 70 lah. mokhit, tüsho mahne mahnenü api yüpü lakhibo ching amüngühnü yüshih. 2#Mt 9.37,38Judüki apinü arü ki tha, “Yimlupü tode lah, tüshe rhimorü nüklah; jumonü yimlupü ching rhimorü thiyishihpü yimlu putungpuh ki tamkhüntamnüang. 3#Mt 10.16Nüsa limro yüang; kheahang, inü nüsa rimre bolung namfimihnunubo nangde yüshihchoh. 4Shoyukpung, qiuqiu yungsho jingkhümpü tümü dühan; tüsho limro ching she ki she salüm düjih. 5Tüshe nüsa thüyam kürü ching yüzahbanü, akhuhde thaang, ‘Ha yam ching mungtsü lashang.’ 6Tüsho ju ching mungtsü mihtsürü lasho, nüsa mungtsü ju ching labah; jude yungsho ju nüsa kilim rholobah. 7#1 Kor 9.14; 1 Tim 5.18Tüsho arünü ajihkhi tsühyungde ju yam ching binang, tümüde rhimorü a nihbuh mihkhah dün ngüpü thülünlah. Thüyam khülang chingnü püpü ching düyü. 8Kiuto kürü ching nüsa yüzahbah arünü nüsa leangkhibanü nüsa miki zojihkhibo tsühang. 9Ju ching tukthsüde alarü thsüngujang, tüsho arü ki thaang, ‘Thrünpuh kiulongthsü nüsa thüninde arüdo.’ 10#Yunir 13.51Tüshe kiuto kürü ching yüzahbah arünü nüsa müleangkhibanü kiudunglimrobo ching wukhiukang tüsho thaang, 11#Mt 10.7-14; Mk 6.8-11; Lk 9.3-5‘Nüsa kiuto asungthulung isa kheak yükihkhi nüsa azhihde phütkhia bahchoh. Tütüshe ha mükheang, Thrünpuh kiulongthsü nüsa thüninde arüdo.’ 12#Mt 11.24; Mt 10.15Tüshe ju nimung ju kiuto kheaknü Sodom thsungkheak alü arümkheam labah de inü nüsa ki thachoh.

Amükinkhi Kiutobo

(Mt 11.20-24)

13“Korazin, nü are! Bethsaida, nü are! Tümütüsho nü kheak khinthiyinbebo rhimokhi ruk Tair tüsho Sidon ching rhimokhülaa shungliukhim tüsho awahbo ching binbah adüsonü mulong müthria labah. 14Tüshe mahkhap ching nü kheaknü Tair tüsho Sidon thsungkheak alü arümkheam labah. 15Tüsho Kapernaum, nü a thüning lim shuhkihba de? Yung, nü asükbo lim yüzahbah.

16 # Mt 10.40; Mk 9.37; Lk 9.48; Jhn 13.20 “Shepünü nüsa ki anibanü I ki anichoh, shepünü nüsa bahyukbanü I bahyukchoh, tüsho shepünü I bahyukbanü I thiyibuh bahyukchoh.”

Nerükheak Mahne Alodarükhi

17Judüki 72nü asühde alodarüde tha, “Atungpuh, nü mung chingnü amünean mebonü she isa ki anido.” 18Tüsho apinü arü ki tha, “Thüning chingnü Arimri chinchobe nangde akikhi inü ngüdo. 19Kheahang, phurutobo le lungthsühribo tüsho thiriri wu alala kurungkheak thrümpü inü nüsa kilim thiyukhüm-sühmüh jihchoh, tüsho tümünü she nüsa mütrünthsü. 20Judüalalashe mebonü nüsa ki anikhi dünkheaknü dasühachih, tüshe yinmi ching nüsa mungbo thrütkhi dünkheaknü asühachihang.”

Jisunü Asühkhi

(Mt 11.25-27; 13.16-17)

21Ju kim ching Jisunü Me ching asüh, tüsho tha, “Yinmi tüsho alomi Tungpuh, Abuh, nünü harü lümlung tüsho mükheahmudurü kheak ram tüsho khungarübo ki akhiuka huhkhi dünkheak inü nü shijihchoh. Am, Abuh, haju nü mük ki atsü lakheah. 22#Jhn 3.35; Jhn 10.15I Buhnü lüpdükhi I kilim jihdo, tüsho Abuh kheak hode shenü atsührü mümükheah, tüsho atsührü le api amikheak akhiukshihpü mokhitrü kheak hode shenü Abuh mümükheah.”

23Tüsho apinü ajingyanrübo kilim rholo tüsho mükhingde tha, “Nüsanü tümükhüh ngükhi mükbo müngühmühi; 24tümüde wukihrü tüsho kiulongthsürü ahihdonü nüsanü angükhi ngüpü kün, tüshe ju müngü, tüsho nüsanü asokhi sopü kün, tüshe ju muso.”

Samariarü Atsü Shihdanglimyu

25 # Mt 22.35-40; Mk 12.28-34 Tüsho kheahang, mahkhaprü khülangnü zhipbah api rükakide tha, “Thsangyurü, akheam müla rhangdung yamrüplurüp lupü inü tümü rhimobea? ” 26Apinü anihbuh ki tha, “Yakzan ching tümü thrüta la? Nünü ju khekhi tümü a?” 27Jumonü apinü alo, “‘Nünü nü mulong athrünkhinü, nü me athrünkhinü, tüsho nü sulüm athrünkhinü Atungpuh nü Thrünpuh muzhoang,’ tüsho ‘nü yamhingrü ki nihbuh nangde muzhoang.’ ” 28Tüsho apinü anihbuh ki tha, “Nünü dükde alodo; ha rhimoang tüsho alabah.”

29Tüshe apinü anihbuh mütsanmükhia lunede Jisu ki tha, “Tüsho I yamhingrü ju she a?” 30Jisunü alojihde tha: “Mihtsürü khülang Jirusalem chingnü Jirikho lim yüki, tüsho jangkhijangrarünü zündobah akhimmihbo khukkhia lubah api kingthünak, tüsho ashepü thsüde zojihbah tsoabah. 31Kheakü kükidonanü amükeamrü khülang ju limro ching aki. Tüsho küyimki apinü anihbuh ngükheanü püpü thripnü hoabah. 32Junangde Levirü khülang she ju ki arübah kheah, tüsho püpü thripnü hoabah. 33Tüshe Samariarü khülang hantsahde api yapde alapung arü. Tüsho apinü anihbuh ngüchoki muzhode lüm, 34tüsho api ki yübah müdangke le yukhu bukkihjihbah mübo rümjih; tüsho api yo donki kheak binshihbah hanrübinpung bedarü tüsho api küm. 35Ashidopü api chamachihchoki, apinü shotoyinchi nak 2 yihkhita hanrü-binpung putungpuh kilim jihde tha, ‘Api kümang, tüsho tümüpürü nünü alü bahbanü I alode arüchoki shaklobah.’ 36Jumonü harü mahsam bolung jangkhijangrarünü zündobuh ki yamhingrü lakheah de nünü shepü lümla?” 37Tüsho apinü tha, “Api ki muzho huhbuh ah.” Jisunü api ki tha, “Yüang tüsho ju ruk rhimoang.”

Jisunü Maratha tüsho Mari Rhuakheahkhi

38 # Jhn 11.1 Kheakü arü kiulong khülang ching yüzah; tüsho Martha de ajikhi aliberü khülangnü anihbe yam ching api beyuk. 39Tüsho Mari de ajikhi anünürünü she Jisu jing ki bin tüsho api yu ani. 40Tüshe rhimo hihkhinü anihbe mulong kipathsükshih tüsho alibenü api ki tha, “Atungpuh, I niurünü I langzü rhimoshihpü zojihkhi nünü lümamükheahjihba de? I rungpü alibe ki thajang.” 41Tüsho Jisunü alibe ki alo, “Martha, Martha, rhimo hihkhi dünkheaknü nü mulong kipathsükdo tüsho küpkhukdo; 42tüshe khülang lang yihnüpü lah. Marinü alungkibe mokhitdo, tüsho ju alibe kheaknü lude mutso.”

Currently Selected:

LUK 10: YIMCBSI

Highlight

Copy