LUK 11

Jisunü Tamkhüntamnüpü Thsangyukhi

(Mt 6.9-13; 7.7-11)

1Api dangpung khülang ching tamkhüntamnüde labah arün thsüshu, jingyanrü bolung khülangnü arübah tha, “Atungpuh, Johannü api jingyanrübo ki thsangyukhi nangde isa ki tamkhüntamnüpü thsangyuang.” 2Jumonü apinü arü ki tha, “Küyimki nüsanü tamkhüntamnübanü, hade thaang:

‘Yinmi ching isa Abuh,

nü mung amüsüh thsang.

Nü kiulongthsü arang;

Yinmi ching künangde la alomi ching she junangde nü mulong thsang.

3Nimung aban tsühyungbe isa kilim kü.

4Isa azhihde neak yihbeakrü ki isanü neak bahjihkhi nangde isa neakbo bahjang.

Tüsho rükakinü isa dübeshih,

tüshe amütsübe chingnü isa bekhitang.’ ”

5Tüsho apinü arü ki tha, “Nüsa shepünü müyamrü labah tsüngphulung ching yüba tüsho api ki thaba, ‘Müyambuh, I kilim yikhap 3 nipjang; 6tümüde I müyamrü khülang I kilim hantsah yüpü arüa lah, tüsho api miki tsühyungbe zojihpü tümü müla’; 7tüsho apinü alunglimnü alode athabah, ‘I küpkhuk düjih; kheaküa khimdopü rihdo, tüsho I tsührübo I lung yapkiu ching lah; inü asürübah nü kilim müjihkhuk’? 8Api müyamrü thsüthsü she api kilim jihpü masürü, tütüshe apinü mutukzhakde akeokhinü asürübah tüsho anihbuh yihnüpü lakhi thülün jihbah. 9Tüsho inü nüsa ki thachoh, kheangang tüsho ju nüsa kilim jihbah; yimang tüsho nüsanü angübah; thrungang tüsho nüsa kilim khimshuhjihbah. 10Tümütüsho shepünü kheangchonü leangkhichoh, tüsho shepünü yimchonü ngüchoh, tüsho shepünü thrungchonü api kilim khimshuhjihbah. 11Nüsa bolung buhrü khürü tsührünü yikhap kheangsho, apinü anihbuh kilim lung jihba shi? Yungsho apinü thüngüh kheangsho, ju müthri api kilim phuruto jihba shi? 12Yungsho apinü thunuke kheangsho, api kilim lungthsühri jihba shi? 13Junangde nüsa amütsü thsüa lalashe, nüsa tsührübo kilim atsü jihpü mükheahsho, nüsa Abuhnü api ki kheangrü kilim Amüsüh Me küdükhüh she ajihba!”

Jisu tüsho Beelzebub

(Mt 12.22-30; Mk 3.20-27)

14Apinü amünean aduh me yankhitde alakheah. Jumonü küyimki amünean me wukhiukkheanü aduh-a lakhi junü thiyu tha; tüsho botobonü müyinsah. 15#Mt 9.34; 10.25Tüshe arü khürünü tha, “Apinü amünean mebo yakzanshuhrü Beelzebub hode amünean mebo yankhitchoh.” 16#Mt 12.38; 16.1; Mk 8.11Tüsho püpürünü api rükakide yinmi chingnü amütsan khülang kheang. 17Tüshe apinü arü lümkhibo mükheahde arü ki tha: “Kiulongthsü aban nihbuh azhihde achamnakkhi athsümünim kamchoh, tüsho yamkhün khülangnü nihbuh yamkhün azhihkhi ju lungabahchoh. 18Arimrinü she nihbuh azhihde chamnaksho, küde thsah api kiulongthsü zhippü? Tümütüsho inü Beelzebub hode amünean mebo yankhitchoh de nüsanü thachoh. 19Tüsho Beelzebub hode inü amünean mebo yankhitchosho, shepü hode nüsa tsührübonü arü yankhitcho? Jumonü arübo ju nüsa mahkhaprübo thsübah. 20Tüshe inü Thrünpuh yingkhing hode amünean mebo yankhita lasho, tsükjide Thrünpuh kiulongthsü nüsa kheak arüdo. 21Küyimki sühmüh lakhi mihtsürü khülangnü thirithsü zülu alala yihbah nihbuh yam aheangbanü api kukrukbo kümkhita lachoh. 22Tüshe küyimki api kheaknü sühmüh lakhi arübah api kukbanü apinü mulonglamkhi zülu lude tsochoh, tüsho apinü ayankhikhibo chama luchoh. 23#Mk 9.40Shepü I lung mülanü I azhihde lah, tüsho I lung bemukhungrü hiumüzütjihchoh.

Amünean Me Alodarükhi

(Mt 12.43-45)

24“Küyimki mihtsürü khülang kheaknü amünean me wukhiukbanü, sühakhimpü yimde akung dangpungbo hode yüchoh; tüsho müyimkhitsho apinü thachoh, ‘I arüpung I yam lim alode ayübah.’ 25Tüsho küyimki api arübanü, ju phüta tüsho tsanglunga ngüchoh. 26Judüki apinü yübah api kheaknü amütsübe me thüne bebah arüchoh, tüsho arünü yüzahbah ju ching lachoh; tüsho mihtsürü ashube kuhi ju akhuhbe kheaknü amütsübe kamchoh.”

Atsütsü Asühpü

27Tüsho apinü harü thade alachoki, boto ching aliberü khülangnü zhide api ki thaa, “Nü zübekhi tüsho nü niuh duhkhi liberü asühpü!” 28Tüshe apinü tha, “Ju kheaknü alü, sherünü Thrünpuh yu anichonü arü asühpü!”

Khinthiyinbe Kheangkhi

(Mt 12.38-42)

29 # Mt 16.4; Mk 8.12 Tüsho küyimki boto ju müjimkhuluka mukhungkhea, apinü athapü tankih, “Ha amütsü lün ah. Hanü khinthiyinbe kheangchoh, tüsho wukihrü Jona amütsan kheak hode amütsan tümü müjih. 30Nineve ki Jona amütsan khülang kamkhi nangde ha lün ki Mihtsürü Tsührü labah. 31Düjinglim kiulongthsübenü ha lün kheak mahkhapkhi ching bahyukbah, tümüde alibenü Solomon lümlung anipü alomi akheambo chingnü arü; tüsho atsütsü Solomon kheaknü atobe ha ching lah. 32Nineve mihtsürübonü ha lün kheak mahkhapkhi ching wusubah tüsho ju bahyukbah, tümüde Jonanü thsangyuthsangrakhinü arü mulong müthri; tüsho atsütsü Jona kheaknü atobe ha ching lah.

Pang ching Ayin

(Mt 5.15; 6.22-23)

33 # Mt 5.15; Mk 4.21; Lk 8.16 “Shenü she tsün takkihbah ajik dangpung yungsho muluk khüp muzhochoh, tüshe shepü azahchonü tsün ju angüpü thsüde adubopung kheak zochoh. 34Pang yo tsün ju mük ah, jumonü küyimki nü mük tsüde alabanü, nü pang alala ayinnü mide lah. Tüshe küyimki nü mük mütsübanü, nü pang she amitingnü milah. 35Jumonü nü kheak lakhi tsün ju amiting mülapü kümkangang. 36Junangde nü pang alala amiting mülade ayinnü mide lasho, tsünpung ayinatrümnü nü kheak tahkhi nangde nü pang alala ayinnü mide alabah.”

Jisunü Pharisirü tüsho Yakzan Thsangyurübo ki Thakhi

(Mt 23.1-36; Mk 12.38-40)

37Apinü athashu, Pharisirü khülangnü api lung yimtsühpü jiyuk, jumonü apinü yüzah tüsho yimtsühpü bin. 38Küyimki Pharisirünü ju ngükhea, apinü akhuhde khah mümütsakde yimtsühkhi dünkheak müyinsah. 39Tüsho Atungpuhnü api ki tha, “Kheakü nüsa Pharisirünü pung tüsho phuru aleanglim müsühchoh, tüshe nüsa alunglim a yihnelune tüsho mihbukmuyuknü milah. 40Makharübo! Shepünü aleanglim thrünkheanü alunglim she athrünkhi yung de? 41Tüshe nüsa pung le phuru ching lakhi ju zhochihrü kilim jihang; jushu nüsa thsungkheak alala amüsüh labah.

42“Tüshe nüsa Pharisirübo are! Tümütüsho nüsanü khiungün le rhümthünea wonin tüsho wokephüyak alala kingaün jihchoh, tüshe thiyuro tüsho Thrünpuh amuzho bahyukchoh. Püpü ju she mübahyukde nüsanü harü rhimopü lado. 43Nüsa Pharisirübo are! Tümütüsho nüsanü sinagog ching binkiu atsübe tüsho yinzüyindopung ching salüm jihshihpü mürühchoh. 44Nüsa yakzan thsangyurübo le Pharisirübo, yiuhkhaprübo are! Tümüde nüsa ju amüngükhi kiuyukbo nangde lah, tüsho jurü kheak tsahrü mihtsürünü mümükheah.”

45Judüki mahkhaprü khülangnü api ki alo tüsho tha, “Thsangyurü, harü thakhinü she nünü isa mükhemükimchoh.” 46Tüsho apinü tha, “Nüsa mahkhaprübo she are! Tümüde mühankhukpü thsüde nüsanü mihtsürübo hah mühahchoh, tüshe nüsa nihbuh a yingkhing khülang she hahmülang müqiu. 47Nüsa are! Tümüde nüsanü wukihrübo kiuyuk thsüchoh, tüsho nüsa buhrübonü arü laksahkheah. 48Nüsanü nüsa buhrü rhimobo leangkhichoh de nüsanü thiyumütsan thsüchoh; tümüde arünü arübo laksah, tüsho nüsanü arü kiuyukbo thsüchoh. 49Jumonü Thrünpuh lümlungnü thachoh, ‘Inü arü kilim wukihrübo tüsho amüsüh-thsangyurübo yüshihbah, tüsho arünü arü khürü laksahbah tüsho thsümüchibah.’ 50Junangde alomiküp khimtanchokinü wukihrü alala thiyihbo bukkhi dünkheak ha lün thsümüchibah, 51Abel thiyih kheaknü kingaün sadam le arüngakopung dükeak bukkhi Zekaria thiyih khiungde. Am inü nüsa ki thachoh, ha lün thsümüchibah. 52Nüsa mahkhaprübo are! Tümüde nüsanü mükheahmudu mükhipmürabe lude tsodo. Nüsanü müyüzah tüsho yüzahde alarü zhipdo.”

53Küyimki Jisu ju chingnü chamachihkhea, Pharisirü tüsho yakzan thsangyurübonü api azhihde ahihkhüh müküpde akeokhipü tankihde, 54apinü tümükhüh thakhi jimde aleang.

Currently Selected:

LUK 11: YIMCBSI

Highlight

Copy