LUK 12

Yiuhkhaprü azhihde Athakhi

(Mt 10.26-27)

1 # Mt 16.6; Mk 8.15 Ju kim ching, küyimki mükhebinkhi boto mihtsürü khülangnü khülang jungachihde amukhungkhea, apinü akhuhde api jingyanrübo ki thapü tankih, “Yiuhkhaprü Pharisirü phaüm dünkheak kümkangang. 2#Mk 4.22; Lk 8.17Tümütüsho amikheak makhiukpü thsüde tümü yihdoa müla, yungsho mümükheahpü thsüde rama müla. 3Jumonü nünü tümüpürü amiting ching thakheanü ayin ching sobah, tüsho nünü alungbe khiungshakbo ching tümü ramde athakheanü thüyam-münbo kheaknü azhiyukbah.

Shepü ki Treba

(Mt 10.28-31)

4“Tüsho inü nüsa ki thachoh, I müyamrübo, sherünü laksahbah ju dunglim tümü müthsükhuknü arü ki dütre. 5Tüshe nüsanü shepü ki trebeanü inü nüsa ki huhbah: Shepünü laksahbah dunglim thsümüchipung ching jipyukpü wu lanü api treang; am, inü nüsa ki thachoh, api treang! 6Shonak 2 dün khüjak 5 müyincho de? Tüsho arü khülang lang she Thrünpuh miki mümih. 7Tüshe nü kuyü alala khemütsande lah. Jumonü dütre; nü ju khüjak ahihdo kheaknü adün labe ah.

Khrista Leangkhikhi tüsho Abahyukkhi

(Mt 10.32-33; 12.32; 10.19-20)

8“Inü nüsa ki thachoh, shepünü mihtsürübo miki I leangkhibanü, Thrünpuh yunirübo miki Mihtsürü Tsührünü she api leangkhibah. 9Tüshe shepünü mihtsürübo miki I bahyukbanü Thrünpuh yunirübo miki bahyukbah. 10#Mt 12.32; Mk 3.29Tüshe khürünü Mihtsürü Tsührü azhihde athakhi api neak bahjihbah; tüshe Amüsüh Me azhihde athakhi a neak mübahjih. 11#Mt 10.19,20; Mk 13.11; Lk 21.14,15Küyimki arünü nü sinagogbo ching tüsho yakzanshuhrü le thiyukhüm-sühmüh larü ki bedarübanü küde aloba yungsho tümü thaba de mulong düsansan. 12Tümüde nünü tümü thabeanü Amüsüh Menü ju kim ching thsangyubah.”

Makhakhi Alarü Shihdanglimyu

13Boto ching khürünü api ki tha, “Thsangyurü, I khiung ki I kheak yamrüplurüp chamshihpü thajang.” 14Jisunü alo, “Mihtsürü, shepünü I nüke kurungkheak mahkhaprü yungsho achamjihrü kamshihkhea?” 15Tüsho apinü arü ki tha, “Yihnelune dünkheak kümkangang tüsho kurhangang, tümüde mihtsürü rhangdung ju nihbuh lakhit suhdahkhi ching müla.” 16Judüki apinü arü ki shihdanglimyu tha: “Alarü mihtsürü khülang lonü suhdahde akhiuk. 17Tüsho apinü aküdahnü lümde tha, ‘Inü küde athsüba, tümütüsho hi zopü akhiungshak müla?’ 18Jumonü apinü tha, ‘Inü ha rhimobah: Inü I jakam lukkheambah tüsho atobe thsübah, tüsho ju ching inü I hibo le kukrukbo alala zobah. 19Tüsho inü I me ki thabah, “Me, nünü kam ahihdo thsungkheak kukruk hihde zolah; nü zuzu thsang; tsühang, yungang tüsho asühang.” ‘ 20Tüshe Thrünpuhnü api ki tha, ‘Nü makharü! Khihre tsütsü nü me tsoabahbah; dale tüsho nü thsungkheak tsanglunga zokhi shenü aluba?’ 21Jumonü shepünü nihbuh thsungkheak lakhit zomukhungchonü, Thrünpuh kilim alarü yung.”

Thrünpuh kheak Kinkhi

(Mt 6.25-34)

22Tüsho apinü ajingyanrübo ki tha, “Jumonü inü nüsa ki thachoh, nüsa rhangdung thsungkheak tümü tsühba yungsho nüsa pang thsungkheak tümü phuyuba de mulong düsansan. 23Rhangdung ju tsühyungbe kheaknü alü, tüsho pang ju khimmih kheaknü alü ah. 24Khüyakbo lümakheahang, tümüde arünü mümükhean yungsho müyimlu, kukruk-zowupug yungsho jakam müla; tüshe Thrünpuhnü arü yimkipchoh. Wuhnubo kheaknü küdükhüh nüsa adün achakbe la? 25Tüsho nüsa shepünü mulong sansankhinü anükhüh ashang lapü kukla? 26Nüsanü aninibe mürhimokhuksho, tümü thsüpü aninga lakhi dünkheak mulong sansancho? 27Thrilung sangbünbo küde tochonü lümakheahang: arünü mürhimo yungsho müchiyim; tüshe inü nüsa ki thachoh, Solomon she api müretahkhi alala ching harü bolung khülang nangde muphuyu. 28Dale khihni thulu ching labah shido mori ching bahbe rim Thrünpuhnü phuyujihchosho, küdükhüh lang apinü nüsa muphuyujihpü, O nüsa akin ninirübo? 29Jumonü nüsanü tümü tsühba tüsho tümü yungba de mulong düsansan. 30Tümüde alomi trükshihbo alalanü harü yimchoh; tüsho nüsa harü yihnüpü lah de nüsa Abuhnü mükheahlah. 31Tüshe Thrünpuh kiulongthsü yimang, tüsho harü alala nüsa kilim jihbah.

Yinmi ching Lakhit

(Mt 6.19-21)

32“Dütre, aninibe boto, tümüde nüsa Abuhnü nüsa kilim kiulongthsü jihpü mulonglah. 33Nüsa lakhitbo yinang tüsho zhochihrü kilim jihang. Mümürhütbe shoyukpung, ahührü müthüninpung yungsho tsünsuknü müthsümünimpung, amükheambe yinmi ching rahpung tsanglunga zoang. 34Tümütüsho nü rahpung küching labanü, nü mulong she ju ching labah.

Atünadokhi Yamlarübo

35 # Mt 25.1-13 “Nüsa chim rümang tüsho nüsa tsünpungbo trushang; 36#Mk 13.34-36mihtsürübonü arü putungrü arhangrü thünio chingnü arükhi aleangde labah api arübah athrungchoki arünü nahde khimdopü khimshuhjihkhi nangde laang. 37Aputungrü arüde alachoki atünadode alakhi ngürü yamlarübo asühpü. Atsütsü inü nüsa ki thachoh, apinü nihbuh chim rümbah arübo yimtsühpü binshihbah, tüsho arübah arü ahiuhakhipbah. 38Tüsho apinü mahne kipü yungsho mahsam kipü arübah arü jude ngüsho, jurü yamlarübo asühpü. 39#Mt 24.43,44Tüshe ha mükheahang, thüyam putungrünü ahührü arüpü kim mükheahkhülaa, apinü aheangde alabah tüsho api yam müchakashungshih. 40Jumonü nüsa she atünadoang, tümüde nüsanü mükkin müthsükhi kim ching Mihtsürü Tsührü arüchoh.”

Athülünkhi yungsho Müthülünkhi Yamlarü

(Mt 24.45-51)

41Judüki Peternü api ki tha, “Atungpuh, ha shihdanglimyu nünü isa ki lang thacho shi, mihtsürü alala ki a?” 42Tüsho Atungpuhnü tha, “Dale tüsho aputungrünü ayamkhün kurungkheak yakzanshuhrü thsüshihbah arü kilim kim dükdü ching tsühyungpü shihcham jihshihpü athülünkhi tüsho lümlung lakhi khinkihthsürü ju shepü a? 43Api putungrü arüde alachoki rhimode ngükhi yamlarü asühpü. 44Atsütsü inü nüsa ki thachoh, apinü anihbuh lakhi alala kurungkheak api ju yakzanshuhrü kamshihbah. 45Tüshe yamlarünü mulong ching, ‘I putungrü arüpü ruhde lah,’ de thasho, tüsho yamlarübo le yamlaberübo shikpü tüsho tsühyungde amüshangpü tankihsho, 46ju yamlarü putungrü apinü kheahde mülachoki tüsho mümükheahkhi kim ching arübah, tüsho mahne thsüde khapbah amükinrü lung shihcham thsüjihbah. 47Tüsho yamlarü shepünü nihbuh putungrü lümkhi mükheahbah, müthsakhamkhea yungsho api lümkhi yande mürhimokheanü ahihdo ki rhapbah. 48Tüshe shepünü mümükheahkhea, tütüshe ashikpü thülünde lakmihsho nükde ashikbah. Tümütüsho shepü kilim hihde jih-a lanü, api kilimnü hihde akheangbah; tüsho ju kheaknü alü jihbuh kilimnü alübe kheangbah.

Jisu ju Chamnakjihrü

(Mt 10.34-36)

49“I alomi kheak mo hande arüpü arükheah tüsho inü künangde alümkheanü ju takkihdo! 50#Mk 10.38Tüshe I baptipü lah, tüsho ju muhoyikia I küdükhüh lümthsünükhi la! 51I alomi ching mungtsü jihpü arükheah de nüsanü lümcho shi? Inü nüsa ki thachoh, jude yung, tüshe achamnak lah. 52Kheakünü rünbah thüyam khülang ching phüngü ju achamnakbah: mahsamnü mahne azhihbah, tüsho mahnenü mahsam azhihbah. 53Buhrünü tsührü azhihde, tsührünü buhrü azhihde, berünü tsührübe azhihde tüsho tsührübenü berü azhihde, aninü atsühmeakbe azhihde, atsühmeakbenü ani azhihde achamnak akhiukbah.”

Kim Mükheahpü

(Mt 16.2-3)

54Judüki apinü botobo ki tha, “Küyimki nüsanü aniyüzahlimnü amo khülang yükihde angübanü, judüchokinü thachoh, ‘Tsüng arüchoh’; tüsho junangde lah. 55Tüsho küyimki nüsanü düjinglim apung yünde angübanü thachoh, ‘Alamlampü lah’; tüsho junangde lah. 56Yiuhkhaprübo! Nüsanü thüning tüsho alomi miro kheahkhitlah, tüshe tümü thsükhi nüsanü ha kim amütsan mümükheah le?

Nü Azhihbuh ki Tsüarihang

(Mt 5.25-26)

57“Tümü thsükhi alim dünkheak nü küdah thsüde mahmükhapcho le? 58Küyimki nü azhihrü lung nünü atorü ki yübanü, limro chingnü api kheak tsarihpü mürangang, jude yungsho apinü nü mahkhaprü ki bede ayübah, mahkhaprünü nü ju mihramrü ki jihbah, tüsho apinü nü rihyam ching yukbah. 59Inü nüsa ki thachoh, nünü akheamkhibe shonak khiungde müjihyikia nü ju chingnü makhiukkhuk.”

Currently Selected:

LUK 12: YIMCBSI

Highlight

Copy