LUK 8

Jisu Atrurü Aliberübo

1Ju dunglim apinü kiutobo tüsho kiulongbo ching Thrünpuh kiulongthsü thiyusheak atsü thsangyuthsangrade yü. Arü thürükheak mahne ju api lung bekheah, 2#Mt 27.55,56; Mk 15.40,41; Lk 23.49tüsho amünean mebo le thsarabo chingnü athsüngukhi liberübo khürü she: amünean me thüne wukhiukkhi Magdalen de ajikhi Mari lakheah, 3tüsho Herod yam ching atorü Khuza niube Joanna, Susanna, tüsho arünü athsükhukkhi chingnü arü ki jihchungrü püpürü ahihdo lakheah.

Müjih-hiurü Shihdanglimyu

(Mt 13.1-9; Mk 4.1-9)

4Tüsho küyimki boto ato mukhungkhea tüsho kiuto aban chingnü mihtsürübo api ki arükhea, apinü arü ki shihdanglimyu chingnü tha: 5“Müjih-hiurü khülangnü api müjih hiupü yü; tüsho apinü ahiuchoki, khürü limmungyean hiuyuk, tüsho ju jingnü junak, tüsho thüning wuhnubonü ju tsühabah. 6Tüsho khürü lungmi kheak hiukih; ju tode asürübah yiuhabah, tümütüsho ju aloke müla. 7Tüsho khürü ayangrungbo ching hiuyuk; ju lung ayangbo asürü tüsho khüpdoabah. 8Tüsho khürü alo atsü ching hiubah mukhuh, tüsho chinü alü thsüde aso.” Apinü ha thachoki zhi, “Shepü asopü nükhün kihlanü aniang.”

Shihdanglimyubo Amütsan

(Mt 13.10-17; Mk 4.10-12)

9Tüsho küyimki api jingyanrübonü ha shihdanglimyu amütsan keokhikhea, 10apinü tha, “Nüsa kilim a Thrünpuh kiulongthsü aramyubo mükheahpü jih-a lah; junangde arünü kheahkheah she mükheahkhit, tüsho anini she manikhit.

Müjih-hiurü Shihdanglimyu Thanakkhi

(Mt 13.18-23; Mk 4.13-20)

11“Shihdanglimyu amütsan ha ah: Müjih ju Thrünpuh yu. 12Limmungyean hiuyukkhi ju asorübo ah; judüki arimrinü arübah arü mulongbo chingnü thiyu ju lude tsochoh, junangde arünü mükin tüsho mükhümkhit. 13Tüsho lungmi kheak hiukihkhi ju thiyu sobah asühde aleangkhirü ah; tüshe harü aying müla, arünü anükhüh kheak kinchoh tüsho rükaki kim ching ayoabahchoh. 14Tüsho ayangrung bolung hiuyukkhi ju, sherünü sobah nihbuh lümkhi ching yüchonü, lakhitbo tüsho rhangdung asühakobonü khüpdoshihchoh, tüsho arü sangaso müzamchoh. 15Tüsho alo atsü ching hiuyukkhi ju, thiyu sobah mulong atsü tüsho thiyuro ching düküngde ramrihcho, tüsho arümkheamde aso asoshihrü ah.

Muluk khüp Tsünpung

(Mk 4.21-25)

16 # Mt 5.15; Lk 11.33 “Shenü she tsünpung takkihbah muluknü hüpdoa muzochoh, yungsho yapkiu khüp yuka muzhochoh, tüshe azahrünü angüpü thsüde adubopung kheak zochoh. 17#Mt 10.26; Lk 12.2Tümütüsho amikheak makhiukpü thsüde tümü müyima müla, yungsho amikheak akhiukde mümükheahpü thsüde tümü aramyu müla. 18#Mt 25.29; Lk 19.26Nüsanü künangde anichonü kümkangang; tümüde shepü lanü alü jihlobah, tüsho shepü mülanü, apinü lah de alümkhi ju she lude atsobah.”

Jisu Abe tüsho Keoniorübo

(Mt 12.46-50; Mk 3.31-35)

19Judüki abe le keoniorübo api kilim arü tüshe boto lakhinü arünü api mukhiungkhuk. 20Tüsho api ki tha, “Nü be le nü keoniorübo nü shorupü künde wungdo zhiplah.” 21Tüshe apinü arü ki tha, “Sherünü Thrünpuh yu anibah ju rhimochonü I be tüsho I keoniorübo ah.”

Jisunü Chinthrüm Keamloshihkhi

(Mt 8.23-27; Mk 4.35-41)

22Nimung khülang apinü jingyanrübo bebah sangkung ching yüzah, tüsho apinü arü ki tha, “Isanü keto püpü thrip dükihhode yüanü.” Jumonü arünü tsahmusu, 23tüsho arü tsahde alachoki api yapsheabah. Keto kheak ju chinthrüm arü, tüsho arübo kenü mide, atrearangbe ching lakheah. 24Arünü yü tüsho api yihmusude tha, “Atungpuh, Atungpuh, isa dükheakchoh!” Apinü asürü tüsho apung le ke abükkhibo thürüh; jurü tukloabah tüsho akhimahede kam. 25Apinü arü ki tha, “Nüsa akin küching la?” Arübo trede alakheah, tüsho müyinsahde khülangnü khülang ki thaachih, “Apung le ke ki thiyukhüm jihbah api yu anikhi ha she a?”

Amünean Me lakhi Mihtsürü Thsüngukhi

(Mt 8.28-34; Mk 5.1-20)

26Jushu arübo Galilee thripkhüh lakhi Gadara lomi ching arünü khiung. 27Tüsho api alo kheak dükükhichoki kiuto chingnü amünean mebo lakhi mihtsürü khülangnü ju ching api shoru; tümüde kim ashang apinü khimmih müyih tüsho thüyam yungde kiuyukbo lung lakheah. 28Küyimki apinü Jisu ngükheanü zhi tüsho api miki mükhümbah düsheak achangnü tha, “Khide Achang Thrünpuh tsührü Jisu, nü I ki tümü thsüpü la? Inü nü ki mushuchoh, I düthsümüchi.” 29Tümüde apinü mihtsürü kheaknü akhiukpü amünean me ki thiyukhüm jih. (Tümütüsho ahihkhüh ki api rama zo; yinchiliubonü rhükbah aheangrü ki zo, tüshe apinü arhükkhibo yihshak tüsho amünean menü bede mütüm ching yü.) 30Jisunü api ki keokhi, “Nü mung she a?” Tüsho apinü alo, “Legion”;#bonungrü boto tümüde amünean me ahihkhüh api kheak yüzah. 31Tüsho arübo thiyukhüm jih-a Abyss#Arü akheam mahkhap mukhiungchoki alokhün ching amünean mebo thsungkheak rihyam. ching düyüzahshih de api ki mushu. 32Kheakü kheaknu boto khülang awung yean motsühmoyungde alakheah; tüsho arübo jurü ching yüzahshang de api ki mushu. Jumonü apinü arü ki mülüjih. 33Judüki amünean mebonü mihtsürü kheaknü akhiukbah kheaknubo ching yüzah tüsho keyean lungrhün lim nanachihde yübah kechih ching thüraksah.

34Küyimki kheaknu neakrübonü ju dünjikhi ngükhea, arünü alihde yübah kiuto tüsho lomi ching thaa huh. 35Judüki arünü adünjikhi kheahpü yü tüsho Jisu kilim arü, tüsho amünean mebo chamachihkhi mihtsürü ju api lümkhi müsüa khim phuyubah Jisu jing ki binde ngü. Tüsho arübo trede alakheah. 36Sherünü angükheanü küruk amünean me yüzahkhi mihtsürü thsüngukheanü mihtsürübo ki tha. 37Judüki ju lomi ching lakhi mihtsürü alalanü arü kinü chamachihpü api ki tha, tümüde arü khide trede alakheah. Tüsho apinü sangkung ching yüzahbah alode arü. 38Kheakü mihtsürü shepü kheaknü amünean mebo yankhitkheanü, apinü Jisu lung yüpü mushu. Tüshe Jisunü thiyia tsoshihde api ki tha, 39“Nü yam lim alode yüang, tüsho nü thsungkheak Thrünpuhnü ato rhimokhi thaang.” Tüsho apinü nihbuh limro ching yü tüsho Jisunü api thsungkheak rhimokhi kiuto alala ching zhiyuk.

Jairus Tsührübe tüsho Jisu Khim Qiukhi Liberü

(Mt 9.18-26; Mk 5.21-43)

40Küyimki Jisu alode arükhea, botonü api leangkhi, tümüde arü alalanü api aleangde alakheah. 41Tüsho judüki mihtsürü khülang amung Jairus, sinagog yakzanshuhrü arü. Apinü Jisu jing ki mükhümbah api yam lim arüpü mushu, 42tümüde atsührübe lapkhiung kam 12 bande alakhi ashepü thsüde alakheah. Tüshe api yüde alachoki botonü api zündoabah. 43Kheakü aliberü khülang kam thürükheak mahne thiyih müyeande alakhi, anihbe rhangdung amuyung thümürünü kheahshihbah müthsüngukhukkhi, 44dunglimnü arü tüsho api khimmüngam qiu. Tüsho alibe thiyih müyeankhi zukleangnü tukloabah. 45Tüsho Jisunü tha, “Shenü I qiukhea?” Küyimki alalanü arochihkhea, Peter le api lung larübonü tha, “Atungpuh, botonü nü zündobah nü kheak khangchoh, tüsho nünü thachoh, ‘Shenü I qiukhea?’” 46Tüshe Jisunü tha, “Khürünü I qiudo, tümüde I kheaknü wu wukhiukkhi inü mükheahdo.” 47Küyimki alibenü anihbe müjikkhukkhi ngükheanü ajande arü; tüsho api miki mükhümbah anihbenü api qiukhi amütsan tüsho künangde zukleangnü athsüngukheanü mihtsürü alala mikinü khipkhit. 48Tüsho apinü alibe ki tha, “I tsah-a, nü akinnü nü thsüngudo. Akhimahe chingnü tsoang.”

49Api thiyu thade alachoki, sinagog yakzanshuhrü yam chingnü khürü arübah tha, “Nü tsührübe shea lah. Thsangyubuh küpkhuk düjih.” 50Tüshe küyimki Jisunü ju sokhea, apinü anihbuh ki alo, “Dütre; akin lang laang, tüsho alibe tsüde akambah.” 51Küyimki api thüyam ching yüzahkhea, Peter, Jakob, Johan, tüsho alibe abuh le abe kheak hode she yüzahpü mümülü. 52Kheakü alalanü alibe thsungkheak trip tüsho tüzho; tüshe apinü tha, “Dütrip; alibe müshe, tüshe yaplah.” 53Tüsho alibe ju shea lah de mükheahbah arünü api ki münejih. 54Tüshe apinü alala yankhitbah alibe khah kheaknü thoa lu tüsho jide tha, “Azübe, asürang.” 55Judüki anihbe me alode arü, tüsho alibenü nahde asürü. Tüsho alibe kilim tümükhüh kipshihpü tha. 56Tüsho alibe bebuhrü müyinsah, tüshe tümü dünjikheanü she ki müthapü apinü arü ki tha.

Currently Selected:

LUK 8: YIMCBSI

Highlight

Copy