LUK 7

Roman Torü Yamlarü Thsüngukhi

(Mt 8.5-13)

1Mihtsürü alalanü sode api yu thakhamshu, apinü Kapernaum ching yüzah. 2Kheakü Roman torü yamlarü khülang, apinü muzhode alakhi ashepü thsüde tukthsüde alakheah. 3Küyimki apinü Jisu dünkheak sokheanü, arübah api yamlarü thsüngushihpü api ki keopü Jihudarü azothsürübo yüshih. 4Tüsho küyimki arübo Jisu ki arükhea, arünü api ki mushude tha, “Apinü nü mihkhah lupü lümlah, api thsungkheak rhimojang, 5tümüde apinü isa trükshih muzholah, tüsho isa sinagog thsüjihdo.”

6Jisunü arü lung yü. Küyimki api ju thüyam kinü limshude mülakhea, atorü junü api kilim müyamrübo yüshihde tha, “Atungpuh, nü küpkhuk dulu, tümüde nü I yam me khüp azahpü I müthülün; 7yungsho I nü ki arüpü müthülün. Thiyu lang thaang, tüsho I yamlarü thsüngubah. 8Tümütüsho I she I bukkhüp bonungrü zobah, thiyukhüm-sühmüh khüp lakhi mihtsürü khülang ah: inü khülang ki yüang de thasho apinü yüchoh; tüsho püpürü ki arang de thasho apinü arüchoh; tüsho I yamlarü ki ju rhimoang de thasho apinü rhimochoh.” 9Küyimki Jisunü ha sokheanü apinü anihbuh ki müyinsah, tüsho rholobah api dunglim yankhi boto ki tha, “Inü nüsa ki thachoh, Israel ching she akin ha ruk inü müngü.” 10Tüsho küyimki yunithsürübo thüyam lim alode ayükheanü, arünü yamlarü ju ngua ngü.

Khimoberü Tsührü Arhang Kamloshihkhi

11Ju dunglim nahde apinü Nain de ajikhi kiuto ching yüzah, tüsho api jingyanrübo le boto ato api dunglim yü. 12Api ju kiuto chipiripit thüninde alachoki, kheahang, khimoberü lapkhiung tsührü shea shuhkhita lakheah; tüsho kiuto chingnü boto ato alibe lung lakheah. 13Tüsho küyimki Atungpuhnü alibe ngükhea, apinü anihbe muzhode lüm tüsho alibe ki tha, “Dütrip.” 14Apinü arübah kung ju qiu tüsho ashuhrübonü zhikde zhip. Tüsho apinü tha, “Athrününgtsüng, inü nü ki thachoh, asürang.” 15Ashebuh junü asürü bin, tüsho thiyu thapü tankih. Tüsho Jisunü api ju abe kilim jih. 16Arü alala trede kam; tüsho arünü Thrünpuh müretahde tha, “Isa bolung wukihrü ato khülang asürüdo!” tüsho “Thrünpuhnü api mihtsürü rhua kheahdo!” 17Tüsho api dünkheak ha yusheak Judea tüsho mühi lomi alala ching soride yü.

Johan Baptijihbuh kilim Yunithsürübo

(Mt 11.2-19)

18Johan jingyanrübonü harü alala api ki thaa huh. 19Tüsho Johannü ajingyanrü bolungnü mahne api kilim jibah Atungpuh kilim yüshihde tha, “Shepü arüpü lanü ju nü a shi, dashi isanü püpürü aleangba?” 20Küyimki mihtsürübo api kilim arükheanü, arünü tha, “Johan Baptijihbuhnü isa nü kilim thiyia arüshihkheah, ‘Shepü arüpü lanü ju nü a shi, dashi isanü püpürü aleangba?’ ” 21Ju kim ching apinü tukthsürübo ahihdo, arümbo, amünean mebo thsüngu, tüsho müktukrü ahihdo ngüde kamshih. 22Tüsho apinü arü ki tha, “Yüang tüsho nüsanü tümü ngüde tüsho sodünü Johan ki thaang: müktukrünü ngüchoh, jingkikrünü tsahchoh, aphamrü müsüh-a lah, nükhünpeangrünü sochoh, asherü arhang kamlodo, zhochihrü ki thiyusheak atsü thsangyudo. 23Shepü I dünkheaknü adukiuhlokhi mülanü asühpü.”

24Küyimki Johan yunithsürübo tsoabahkhea, apinü Johan dünkheak boto ki thapü tankih: “Nüsa sunglo ching tümü kheahpü yükhea? apungnü dangchi yüna niungniungshihkhi kheahpü a shi? 25Judü yungsho, nüsa tümü kheahpü yükhea? Khimmih athünak yihkhi mihtsürü a shi? Kheahang, shoto khimmih yihrü tüsho müthangmüsün ching larü kiulongthsürü-yambo ching lah. 26Tüshe nüsa tümü kheahpü yükhea? Wukihrü khülang a shi? Am, inü nüsa ki thaanü, wukihrü kheaknü alübe ah. 27Api dünkheak ha thrüta lah: ‘Kheahang, inü I yunithsürü nü limro thsakhampü nü müngüh yüshihchoh.’ 28Inü nüsa ki thachoh, aliberübonü azübekhi bolung Johan kheaknü atobe she müla; tütüshe shepü Thrünpuh kiulongthsü ching aninibeanü api kheaknü atobe ah.”

29 # Mt 21.32; Lk 3.12 Küyimki arünü ha sokhea, mihtsürü alala tüsho ruk-threrübonü Thrünpuh alim mütsana lu, tümütüsho arübo ju Johannü baptijihkheah; 30Tüshe Pharisirü tüsho yakzan thsangyurübonü arü thsungkheak Thrünpuh lümkhi bahyuk, tümütüsho arübo a Johannü mübapti.

31Jisunü mutuklode tha, “Ha lün mihtsürü inü tümü kheak akeba, tüsho arü tümü kiphahla? 32Arü ju yinzüyindopung ching binkhi tüsho khülangnü khülang ki jiachihkhi azürübo nangde lah, ‘Isanü nüsa ki khungpi khungdo, tüshe nüsanü mütsün; isanü tüzhodo, tüshe nüsanü mütrip.’ 33Tümüde Johan Baptijihbuhnü yikhap mütsühde tüsho yukhu muyungde arü, tüsho nüsanü thachoh, ‘Api amünean me lah.’ 34Mihtsürü Tsührü yimtsühde tüsho yungde arü; tüsho nüsanü thachoh, ‘Kheahang, bukchihrü tüsho amüshangrü, ruk-threrü tüsho aneakrübo müyamrü!’ 35Tüshe lümlung ju anihbe tsührübo hode alim mütsanchoh.”

Aneakrü Liberü Neak Bahjihkhi

36Pharisirü khülangnü anihbuh lung yimtsühpü api ki keo, tüsho apinü Pharisibuh yam ching ju yüzahbah dükhüm ki bin. 37#Mt 26.7; Mk 14.3; Jhn 12.3Tüsho kheahang, kiuto liberü aneakrü khülangnü küyimki api Pharisibuh yam ching dükhüm ki binlah de asokheanü rhümthüneabe, lunglangpung khülang lubah arü, 38tüsho alibenü api dunglim ajing ki tripde zhipbah achikenü ajing pangjihpü tankih. Jushu alibenü akuyünü nanjihbah ajing kheak müthsüp tüsho rhümthüneabe bukkihjih. 39Küyimki api jiyukbuh Pharisirünü ju ngükhea, apinü aküdah thsüde tha, “Ha mihtsürü wukihrü thsüla lasho, api qiude alakhi aliberü ju küdürüanü apinü mükheah-a labeah, tümüde alibe ju aneakrü ah.”

40Tüsho Jisunü api ki alojihde tha, “Simon, inü nü ki tümüanü athapü lah.” Apinü alo, “Ju tümü a, Thsangyurü?” 41Shonip-jihrü khürü shozüngrü mahne lakheah; khülangnü api ki shotoyinchi 500, tüsho püpürünü 50 züng. 42“Küyimki anenü müshakkhukkhea, apinü ane chido ki bahjih. Kheakü ane shepünü api ki alü muzhoba?” 43Simonnü alo, “Inü alümkhia, apinü ahihbe bahjihbuh labah.” Tüsho apinü anihbuh ki tha, “Nü dükdü ah.” 44Jushu alibe kilim anguhde apinü Simon ki tha, “Nünü ha liberü ngücho shi? I nü yam ching azahdo, nünü I jing müsühpü ke müjih, tüshe alibenü achikenü I jing pangbah akuyünü nanjih. 45Nünü I mümüthsüp, tüshe I azahkhi kimnü ründe alibenü I jing müthsüppü mutuklo. 46Nünü I ku kheak müdangke mümujujih, tüshe alibenü rhümthüneabenü I jing mujujih. 47Jumonü inü nü ki thachoh, anihbe neak hihde alakhi bahjihdo, tümüde alibenü khide muzhodo; tüshe shepü anikhüh neak bahjihkheanü anikhüh muzhochoh.” 48Tüsho apinü alibe ki tha, “Nü neakbo bahjihdo.” 49Judüki api lung dükhüm ki binrünü arü bolung thaachih, “Neakbo yamnü bahcho ha she a?” 50Tüsho apinü alibe ki tha, “Nü yo akinnü nü khümkhitdo; mungtsü chingnü tsoang.”

Currently Selected:

LUK 7: YIMCBSI

Highlight

Copy