MARKA 10
10
Kinolna Ziak ah Thuhilna
(Mat 19.1-12; Luk 16.18)
1Zia mun chu nusia in, Judea gam leh Jordan gâl lam in a chia ta’n; chuleh, mipi tam tak a kiang in a hung khawm un; tichun, ahi dan ngai gual in thu a hil a.
2Pharisaite khenkhat a kiang in a hung un, ama ze-etna’n, “Pawsal in a ji a nol a thiang diam?” ti’n a hung dong ua.
3Ama chun, “Mosi’n bang ti’n thu a pe em?” a tia.
4 #
Dan 24.1-4; Mat 5.31 Amau chun, “Mosi’n kinolna lekha zik in kinol a phal hi,” a tiu a.
5Ahi’n, Jesu’n a kiang un, “La lung uh a tâk ziakin zia thupiak chu a hun zik piak ahi.
6 #
Thl 1.27; 5.2 Himaleh, siamtil ah chun Pathian in numei leh pawsal in a siam hi.
7 #
Thl 2.24
Ziaziak hin pawsal in a nu leh pa nusia intin, a ji a tûk ding ahi;
8amau chu taksa pumkhat hung hita’n au. Tichun, amau chu pani hi talo in, taksa pumkhat hizaw ta’n au.
9Ziaziakchun, Pathian in a zop tâk chu mihing in khen ki’hen,” a tia.
10In sung ah chun a nungzuite’n zia thu chu a dong kit ua.
11 #
Mat 5.32; 1 Ko 7.10,11 Ama chun a kiang un, “Kua’n le a ji a nol ah, midang a kichenpi kit chun, a ji chu a ângkawm san ahi;
12numei inle a pawsal a khen ah, midang a kichenpi kit chun, ama chu ângkawm ahi ngal hi,” a tia.
Jesu’n Naupangte A Maljawlna
(Mat 19.13-15; Luk 18.15-17)
13Ama khawi dingin, mipite chun naupangte a hun pui ua; himaleh, nungzuite chun a hun puite chu a la vau un.
14Ahi’n, Jesu’n zia chu a mu in a lungdam paw ma ma ah; a nungzuite kiang in, “Naupangte kha ka kiang ah hungsak un la, zada kiu in; Pathian gam chu zia gual mite â ding chu ahi ngal a.
15 #
Mat 18.3
Titakzet in ka hil la hiu, kua’nle zia naupangte gual ah Pathian gam a la lawp lo ahi chun, a sung ah lut lo hial in au,” a tia.
16Chun, amau chu a kawi ah, a chung un a khut a nga, maljawlna a pia tai.
Mihausa Kumtuang Hinna Hawl
(Mat 19.16-30; Luk 18.18-30)
17A kipatdok guat lai tak in, mi pakhat a hung tai ah, a ma-âng in a hung khupdin ah, a kiang in, “Hotupa pha, kumtuang hinna ka nei theina dingin bang ka hi diam?” a hung tia.
18Jesu’n a kiang in, “Bangatia pha lei ti a hem? Mi pakhat bep lo chu kuama a pha a um puai, zia chu Pathian ahi.
19 #
Pdt 20.13; Dan 5.17; Pdt 20.14; Dan 5.18; Pdt 20.15; Dan 5.19; Pdt 20.16; Dan 5.20; Pdt 20.12; Dan 5.16 Thupiakte la he a pom: Tual that kin, ângkawm kin, Gucha kin, Hiatpitu dik lo in pang kin, Mi dawha bawl kin, La nu leh la pa ja in, ti te hi,” a tia.
20Ama chun, “Hotupa, ziate zosia chu ka neu lai ah kipat ka la zop zaw sik sek ahi tai,” a tia.
21Jesu’n ama chu a en ah, a hepi ma ma ah, a kiang in, “Hi’ding pakhat la nei nalai hi; chia inla, la nei zosia vazuak inla, gentheite kiang in pia’n; tichun, van ah go nei in la tin; chuleh, hung inla, ei zui in,” a tia.
22Ama chu sum tam tak nei ahiziak in, zia thu chu a het phat in a lungngai ta’n, lunggim tak in a chia mang tai.
23Jesu’n a en vêl ah, a nungzuite kiang ah chun, “Mihausate â ding chun Pathian gam ah lut a haksa na ding e!” a tia.
24Zia thu chu a nungzuite’n lamdang a sau a, ahi’n, Jesu’n a dawnhu kit a, “Naute haw, mi a hausakna ki-ngate â dingin Pathian gam ah lut chu a haksa na e!
25Mihausa Pathian gam a lut sâng in, sangawngsau pin bil hawm ah a lut then a bailam zawi,” a tia.
26A nungzuite chun gen theilo khop in lamdang a sau ah, a kiang ah amau kihotua in, “Chuti ahileh kua a hem hukdam hithei ding?” a tiu a.
27Jesu’n amau chu a hun en ah, a kiang un, “Zia chu mihing â dingin hitheilo ahi, Pathian â dingin vang a hithei hi; bangkim hi Pathian â dingin hi’thei ahi ngal a,” a tia.
28Ziaphatchun Peter in, “Ngaitia kei un bangkim nusia in ka hun zui ui,” a hun tia.
29Jesu’n a dawnhu, a kiang in, “Titakzet in ka hil la hi, kuale a In a hem, a suapipa a hem, a suapinu a hem, a nu a hem, a pa a hem, a ji a hem, a cha a hem, a gam a hem, keima leh chanchinpha ziak ah nusia chu,
30tu’ damsung ma ma hinle, Inte, suapipate, suapinute, nute, pate, gamte, sukgentheina tawh ale’ za khat ah mulo ding a um puau, a hung tung ding kumtuang hinna tawh.
31 #
Mat 20.16; Luk 13.30 A masa tam takte chu a nunungpen hung hi’n tiu in, a nunung pente chule hung masa’n au,” a tia.
Jesu’n A Thina leh thawkit Nading A Genlawk Thumveina
(Mat 20.17-19; Luk 18.31-34)
32Jerusalem lam zuan ah Jesu chu, a malam ua chia ah a zui zing lai un, maksakna dim in a hung lau tau a. Sawm leh nite chu a pui chuam kit ah, a chung ah thil hung tung dingte chu a hil pan kit a;
33“Ngai un, tu’hin Jerusalem ah chia to ding I hiu; Mihing Chapa hi thiampu lalte leh lekhazikte khut ah matsak in um intin, thi dingin a chung thu tan piak in au; ziazaw chuleh, Jentelte khut ah pedok ding a hiu;
34tawt bawlna’n mang intiu in, chil sekkhum in, jep intiu in, that in au; chuleh, ni thum zaw tak leh hung thokit ding ahi,” a tia.
Jakob leh Johan Thildot
(Mat 20.20-28)
35Zebedai chate Jakob leh Johan chu a kiang in a hung un: “Hotupa, ka thil dot tapo uh ei hi’piak lechin ka nuam ui,” a hung tiu a.
36Ama chun a kiang un, “Bang hi’piak leng ei ti la hiu em?” a tia.
37Amau chun, “La lopina la um tak leh pakhat la changlam ah, pakhat la veilam ah chu dingin ei phal piak in,” a tiu a.
38 #
Luk 12.50
Himaleh, Jesu’n a kiang un, “La thil dot uh chu bang ahi la hepuau hi. Ka no dawn ding chu dawn thei ding la hiu ah, ka baptisma chan ding chule chang thei ding la hiu ah a hem?” a tia.
39Amau chun, “Hi’thei ing kau,” a tiu a. Ziaphatchun, Jesu’n a kiang un, “Ka no dawn ding chu dawn in la tiu in, ka baptisma chan ding chule chang ngut in lau;
40himaleh, ka changlam leh ka veilam ah chut ding thu chu, keima thu ah ka piak ding ahi puai; guat piak ah umte bep kiang ah piak hiding a hi,” a tia.
41Zia thu chu sawmkhatte khan a hun het phat un, Jakob leh Johan chung in a lungawi ta puau a.
42 #
Luk 22.25,26 Himaleh, Jesu’n a kiang un, “Jentelte chung ah vaihawm ding ah kiguatte chu, a chung un a lal ma ma sek un, a milianteu chun a chung un thu a nei ma ma sek ui, ti la hiau hi.
43 #
Mat 23.11; Mar 9.35; Luk 22.26 Nanghaw lak in vang zia gual chu a hilo ding ahi; kuale la lak ua a lianpen hiding chu, la nasem un a pan diu ahi.
44La lak ua kuale a luchang pen hi’nuam chu, la suak ua a pan phot diu ahi.
45Mihing Chapa hial hile mite’n ama na a sep piak ding ua hung ahi puai; mi nasep piak ding leh mi tam tak tatna ding ah a hinna pia ding ah hung ahi zawi,” a tia.
Bartimai Mit Sukvakna
(Mat 20.29-34; Luk 18.35-43)
46Jeriko khua a hung tung tau a. Jesu chu Jeriko khua kipat a nungzuite tawh, mipi tam tak tawh a pawt daw lai un, Timai chapa Bartimai mitthûm chu lam pâm ah khutdaw in a la kichu.
47Nazareth Jesu ahi ti a het phat in, “Jesu, David Chapa, ei lungsiat in!” ti’n a kiko a.
48Mi tam tak in a la thip hiat hiat dingin a vau un; himaleh, ama chu a kiko ngai zaw diak a, “David Chapa, ei lungsiat in!” a ti kit a.
49Jesu chu a hung ding ah, “Ama chu hun pui un,” a tia. Tichun, mitthûmpa chu a hun ko ua, “Thamuang tak in um in, hung dingdok in, a hun ko hi,” a tiu a.
50Ama chun a puansil chu a septha vak ah, a kipan ah, Jesu kiang lam a hun zuan tai.
51Jesu’n a kiang in, “Bang hun bawl piak leng la nuam em?” a tia. Mitthumpa chun, “Lalpa, mu’thei ka nuam hi,” a tia.
52Jesu’n a kiang in, “Chia ta’n, la ginna hi la dampi ahi,” a tia. Ziaphatchun, khua a hun muthei ngal ta’n, Jesu a zui ngal tai.
Currently Selected:
MARKA 10: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
