MARKA 11

Jerusalem ah Jesu Choihoi ah A Lutna

(Mat 21.1-11; Luk 19.28-40; Joh 12.12-19)

1Jerusalem a tun ding kuan un, Oliv tâng ah Bethphage leh Bethani khaw kiang in, a nungzuite lak ah mi pani a sawl a.

2A kiang un, “La ma zawn ua khua sawn vachiau inla, khua sung la lut phat phat ua leh, sabiltungno, kuama chuan khâk nailona chu a la kihên vamu’n la tiu in, zia chu hun tham un la hun kai un.

3Kua’nle, ‘Bang ding ah la thap uh a hem?’ a hun tiu leh, ‘Lalpa‘n a doina a um ah ahi,’ tileuchin hun phal ngal ziang in au,” a tia.

4Tichun, a vachiau a, kotzing paw lam ah, kotkhak bul ah sabiltungno kihên chu a vamuu ah, a tham tau a.

5Zia tak ah dingte lak ah khen khat chun, “Sabiltungno chu bangatia la thap uh a hem?” a hun tiu a.

6Amau chun Jesu gen gual gual in a gen ua, tichun, a kai uh a phal piak tau hi.

7Sabiltungno chu Jesu kiang a hun kai tung phat un, a chung ah a puanteu phâ in, Jesu chu a chuang ta’n.

8Mi tam tak in a puanteu lampi’n a la phau a; midang in lam lai ah chun thingsawl a la zau un.

9 # Sam 118.25,26 A malam ah chiate leh a nung lam ah hun zuite chu a hung kiko un:

“Hosanna! Lalpa min ah hung chu a hamphai!

10I pau David leng gam hung tung chu a hamphai!

Van chung sangpen ah khin Hosanna!” a tiu a.

11Jerusalem khua a lut phatin, tempul in a chia a, bangkim a et vêl zaw phatin, nitâk lam le a hung hita’n; tichun, sawm leh nite chu tawh Bethani khua lam in a chia kit tau hi.

Jesu’n Theichang Kung A Sapsiatna

(Mat 21.18-19)

12A jing ah chun Bethani khua kipat a hung lai un, a gil a hung kial ta’n.

13Theichang kung a dua bawk pha tak nei pakhat a vak gâl mu ah; a ga ka mu khâk leh ti’n a vazuan ah, a vatun phatin a dua bep lo ngal bangma a mu ta pua’n, theichang ga hunle chu a hinai paw him a.

14Jesu’n, “Kuama’n bangtik lai inle la ga ne ta kiu hen,” a tia. Zia chu a nungzuite’n a la hiau a.

Jesu’n Tempul A Sukthianna

(Mat 21.12-17; Luk 19.45-48; Joh 2.13-22)

15Jerusalem a hung tung tau a. Jesu chu tempul in a lut ah, tempul sung ah thil zuakte leh chawte chu a hun nawdok ah, dangka thengte dawkan leh vakhu zuakte chutna haw chu a sot pai piak sik sek a;

16chuleh, tempul sung ah kuama’n van a puak lut lum let uh le a phal ta puai.

17 # Isa 56.7; Jer 7.11 A kiang ua thu hil in, zia gual hin a gen a:

“Ka In chu namtin â ding ah pauchapna In kiti ding ahi,

ti zik hilo a hem?

Nang un vang gucha hon kikhum khawmna’n la mang ui,” a tia.

18Zia thu chu thiampu lalte leh lekhazikte chun a het phat un, ama tha theina ding a hawl tau a; mipite chun a thuhil dan chu lamdang a sak ziak un, amau chu a lau tangal un.

19Nitâk lam a hung hi’phatin khawpi’ kipat chun a nungzuite tawh a pawtdok tau hi.

Theichang Kung Vuai ah Kipat Zil Ding

(Mat 21.20-22)

20Jingkal kit ah theichang kung kiang kha haw malam ah a chia lai un, theichang kung kha a zung tiang ah a la vuai ta chu a muu a.

21Peter chun a hun hetdaw phatin a kiang in, “Hotupa, en tia, theichang kung hânsia la law kha a la vuaitha ziang tai,” a tia.

22Jesu’n a hun dawnhu a, “Pathian ah ginna nei un.

23 # Mat 17.20; 1 Ko 13.2 Titakzet in ka hil la hiu, kua’nle ginglâ lo ah, zia tâng kiang ah hin, kichawn inla tuisuagiat ah kisep lut in, la tiu chun, la ti gual gual un guitung in a.

24Ziaziakchun, ka hil la hiu, bangkim pauchap ah la dot tapo uh chu, a musa’n kingai ziang un, chutileh mu ziang ding la hiu,” a tia.

25 # Mat 6.14,15 Chuleh, pauchap ding ah la din tak ua leh, mi ngaidam ding la nei ua leh ngaidam phot un; zia tak chuleh la Pau van ah um chun nang uh hi’khialna le ngaidam ding ahi.

26Himaleh, nang un mi la ngaidam lo ua leh, la Pau van ah um chunle la hi’khialnau chu hun ngaidam diak pua’n a, a tia.#11.26 zia châng hi I text un a um puai

Jesu Thuneina Thu A Dotnau

(Mat 21.23-27; Luk 20.1-8)

27Jerusalem khua lam in a hung kit tau a. Tempul sung ah a vâk vêl lai in, thiampu lalte leh lekhazikte leh upate a hung un;

28a kiang in, “Bang thuneina mang ah zia thilte hi bawl sek la hem? Zia thilte hi’theina hi kua hun piak a hem?” a hung tiu a.

29Jesu’n a dawnhu, “Keima’nle thil pakhat hun dong ing ka, zia chu ei dawnhuu inla, ziazaw tak chuleh keima’nle kua thuneina zia thilte hi bawl sek ka hi hun hil ing ka.

30Johan baptisma bawl kha van ah kipat a hem mihing ah kipat ei hil un,” a tia.

31Tichun a kingaituau a, van ah kipat tileuhin la, bang a tia gingcha lo la hiu em? ei ti’ntin,

32mihing ah kipat, ti ding la, mipi a lau ngal ua; mi zosia’n la Johan kha jawlnei tak tak hi’n a he ngal un.

33Tichun, “Ka he puau hi,” ti’n a dawnhu tau a. Ziaphatchun, Jesu’n le amau kiang ah chun, “Keima’nle kua thu zia thilte hi ka bawl a hem ti hun hil diak pua’ng ka,” a tia.

Currently Selected:

MARKA 11: VAIPBSI

Highlight

Copy