THILSIAM THU 34
34
Dinah Pawngsualna
1Zia lai ah chun, Leah in Jakob a hinpiak, Dinah chu zia gam ah numeite haw ve ding chun a va vakdok a.
2Zia gam ah hausapa, Hiv mi Hamor chapa Shekhem chun a mu phât in a pum mat ah, luppi in a thânhuaipi tai.
3Chuleh, a lungthim chu Jakob chanu Dinah chung bep in a um zing ta’n; zia nungak chu a hepi in, a ho pha ma ma a.
4Shekhem chun a pa Hamor kiang in, “Zia nungak chu ji’n ei neisak in,” ti’n a don a.
5Jakob chun, a chanu Dinah chu Shekhem in a thânhuaipi hi ti a he ta’n; a chapate chu gamla tak ah ganching ah um a hiu a: A hung tun masiau Jakob a thip hiat hiat a.
6Shekhem pa Hamor chu Jakob kihopi dingin a hung a.
7Jakob chapate chun a het phat un, lou ah kipat in a hung un; Jakob chanu luppi in Israelte lak ah thil phalo ngolhuai tak, bawl lo hial ding thil a la bawl tâk ziakin a lungna ma ma tau hi.
8Hamor chun, a kiang un, “Ka chapa Shekhem lungthim chu la chanu chung ah hin a um zing ta mai in; lungsiat tak in ji’n neisak mai un.
9Chutichun, kichengtua hitiu in; la chanuteu ei piau inla, kei uh chanutele kichenpiu inla;
10ka kiang un um den unla, gamle lian tak a um ngal in: zia tak ah hin um in, sumdawng unla, zia hin nei leh lam le la khawm tau in,” a ti’n.
11Shekhem chun nungak pa leh a suapite kiang ah chun, “Ei lungsiat unla, ka kiang ah la gen tapo uh pia ziang ing kau.
12Man leh mual thilpiak chule la ti zat zat uh hun pia ziang ing kau. Abang hileh, nungak chu ji’n ei nei sak phot mai un,” ti’n a don a.
13Jakob chate chun, a suapinuu Dinah a hi’buak ziak ah chun Shekhem tawh a pa Hamor chu a dawha bawl tau ah, a kiang un:
14“Zia gual ah zektanlo mi kiang ah hin ka suapinuu pia thei pua’ng kau; zia chu kei uh â dingin min siatna ahi;
15zia gual ah kitiamna hi la nei uh chun la thuu zawm thei bep ing kau: la lak ua pawsal taphot in zektan in, keimau gual in um unla;
16chuleh, ka suapinuu chu hun pia’ng ka tiu in, kei unle la chanuteu kichenpi ing ka tiu in, la kiang un um zing ing ka tiu in, chi khat hung himai ding I hiu.
17Ahi’n la, zektan ah ka thuu la zop lo ding uh chun, ka chanuu kipui ing ka tiu in, chia mang mai ing kau,” a tiu a.
18A thugen uh chu Hamor leh a chapa Shekhem chun a pom ngal tau a.
19Tangval chun Jakob chanu chu a dawi ma ma ziakin, zia thil chu sawt dâng lo in a bawl mai ta’n; ama chu a pa Inkuan zosia lak ah mi ja pen ahi ngal a.
20Chun, Hamor tawh a chapa Shekhem chu a khaw kul kotkhak uh chun a kitung tau ah; a khuau ah pawsalte kiang ah chun a gen tau a:
21“Ziate saw ei uh â dingin a pha ma mau ah; ziaziakchun, amau â dinginle gam a kiting tho in, zia tak ah hin sumdawng uh hen la, tichun, a chanuteu le ji’n nei hitiu in, ei unle I chanuteu ji’n neisak hitiu.
22Chi khat ah I hung um theina ding un, I kiang ua chênden chu zia gual ah ka tiam dungzui un, ei lem sakpi bep uh ahi: zektan ahi gual un I lak ua pawsal taphot in zektan hitiu;
23chutileh, a ganchateu, a suanteu, a gan zosiau hi ei uh â hung himai lo ding a hem? A thuu hi lem sakpi mai hitiu; tichun, I kiang un um den mai ding a hiu,” a tiu a.
24Tichun, Hamor tawh a chapa Shekhem thugen chu a khaw kul kotkhak ah pawt zosia chun a zawm tau ah; a kul kotkhak ah pawt pawsal zosia chun a zek uh a tan tau a.
Dinah Suapite’n Phuba La
25Chun, a nithum ni, a natsiat lai tak un, Jakob chapate lak ah mi pani, Dinah suapi Simeon tawh Levi chun a chemjam gêl uh chawi in, a gûk in khua chu a bulu tau ah, pawsal zosia a that gam tau a.
26Hamor tawh a chapa Shekhem chu chemjam in a that ua, Shekhem In ah kipat Dinah chu a pui dok un, a chia mang tau a;
27Jakob chapate chun mi a tha zaw phat un, a suapinuu a hi’buak ziak un khua chu a chom nâm tau a;
28a belam honteu, a bawng honteu, a sabiltungteu, a khuau ah thil um zosia, a lou lam ua thil um zosia pum in a lak piak ua;
29a sum zosiau, a chasenteu leh a jiteu zosia tawh a In sung ua um zosia chu tawh galhing mat ah man in, a chom nâm tau a.
30Jakob in Simeon tawh Levi kiang in, “Nang un zia gam ah chêng, Kanaan mite tawh, Periz mite huat ah ei umsak in, lei hi’lunggim ma mau hi. Ka mite hi tawmcha bep ahi ngal un; ei do dingin hung pung khawm taleu, ei that gam ziang ding ahi ngal un: kei leh ka Inkuante sukmanthai in um mai ding ka hi’ngal un,” ti’n a gen a.
31Himaleh, amau chun, “Ka suapinuu hi nawchizuak gual ah a bawl ding uh a hia hem?” ti’n a dawnhu tau a.
Currently Selected:
THILSIAM THU 34: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
