THILSIAM THU 32

1Jakob chu a chia pek ah, Pathian vansawlchâkte’n a la tuak ua;

2Jakob in amau chu a mu phât in, “Ziate hi Pathian Sepaite a hiu,” a tia: zia mun min ding chun, Mahanaim#zia chu, Hebrai pau ah: Sepai hon Pani, ti’na ahi a sak tai.

Esau Jawl Lungdamna Ding Ah Jakob In Thil piak Thot

3Jakob chun Seir gam ah, Edom mite chênna lam ah, a u Esau kiang in thangko a sawl a.

4A kiang un, “Ka lalpa, Esau kiang in: La suak Jakob in, ‘Laban kiang ah malzin ka hi’n, tuchan ah hin ka um zing nalai a;

5tu’hin, bawgchalte, sabiltungte leh belamte, suak pawsal leh suak numeite ka nei tai: la hepina ka chan theina dingin, ka lalpa hil dingin mi ka hun sawl ahi,’ vatiu in” ti’n, amau chu a vâithâk a.

6Chun, thangkote chu Jakob kiang a hung tung kit tau ah, “La u Esau kiang ka vatung un, mi za li hial hun pui in nang hun lamtua dingin a hung ui,” ti a hil tau a.

7Jakob chu lau in, a lungkham ma ma ziang ta’n; a kiang ah mi umte, belam honte, bawng honte leh sangawngsaute chu hon ni a sua ah:

8“Esau in hon khat a tha leh le a hon dang suakcha thei dingin,” a ti’n.

9Jakob chun, “Aw Pathian, ka pu Abraham Pathian, ka pa Isak Pathian, Aw Lalpa, ‘La gam, la chipite kiang ah chia kit ta’n, pha tak in hun bawl na’ng ka ei tipa;

10la suak chung ah la hepina chuailo leh la ginumna zosiate lakah hin, a neupenle chang tâk ka hi puai; zia Jordan lui hi ka tiangkhut bep hi tawh ka la kân in, tu’hin chu hon ni hial ka hi tâk uh hi.

11Lungsiat tak in ka u khut ah kipat, Esau khut ngei ah kipat hin ei hukhing in: naupang pum ah ei thâgam khâk ding chu ka lau ahi.

12 # Thl 22.17 Nang in, ‘Pha tak in hun bawl na’ng ka, la suante chu tuisuagiat piaunêl sim sên lo khop ah a tam gual hin hun siam ing ka,’ lei ti ta ngal ah,” a tia.

13Zia jan chun zia mun ah chun a giak den ta’n, a thil nei, a khut ah umte chu a u Esau â ding ah kipakman dingin a khen jak tai:

14kêlpi za ni tawh kêlchal sawmni, belampi za ni tawh belamchal sawmni;

15sangawngsau nawi sûk lai sawmthum a note chiat tawh bawngpi sawmli, bawngchal sawmkhat tawh sabiltung api sawmni tawh sabiltungchal sawmkhat a koichuam a.

16Ziate chu a chuam chiat in a suakte khut in a vopsak ah; a suakte kiang in, “Ka ma’n chiau inla, a hon hon ah kâl nei in chiau in,” a ti’n.

17A lamkaipa kiang ah chun, “Ka u Esau in a hun kituakpi ah, ‘Kua mi la hem? Khoi ah chia ding la hem? La ma ah umte hi kua â a hiu em?’ ti a hun dot tak leh:

18‘La suakpa Jakob â a hiu ah; ka pu Esau kiang ah kipakman ding ah a hun thot ahi: chuleh, ama le ka nung un a hung hi,’ ti’n la.

19Chuleh, a bân ah pa leh, a bân kit ah pale, gan-gual somte zosia kiang ah chun, Esau la mu phât uh leh zia gual ma chun la ti jel ding uh ahi:

20‘Zia lo ah chun, la suak Jakob chu ka nung un a hung hi,’ tiu in la,” ti’n thu a pechiat ah. “Kipakman ka piak hin a lung hi’dam ing ka tin, zia nung ah chun a mêl mu leng ei lop khak leh,” ti’n a lunggel a.

21Chutichun, a thilpiak dingte chu a malatsak ah, zia jan ah chun a lawite lak in a giak tai.

Peniel Ah Jakob in Mi A Kibotpina

22Chun, zia jan ah chun a kipan ah, a jite tawh, a suaknute ni tawh, a cha sawm leh khatte chu a pui in, Jabok lui a gâlkâi tau a.

23Amau chu a pui ah, luigâl lam ah chun a kaisak ta’n, a nei zosia le a thak gâlkâi tai.

24 # Hos 12.3,4 Tichun, Jakob ama ngen in a um ta’n, mi pakhat in ama chu phalvak tiang hial in a hung buan ta’n;

25a thazo puai ti a het phat in a malpigu kisuktuana chu a khoi piak ah; chutia, a kibot lai ua chun Jakob malpigu kisuktuana chu a kipel ta’n.

26Ama chun, “Ei tha in, khua vak ding a hita hilam,” a tia. Jakob chun, “Lei maljawl lo leh tha’lo hial ding ka hi,” a tia.

27Ama chun, a kiang in, “La min bang a hem?” a tia. Ama’n, “Jakob ahi” a tia.

28 # Thl 35.10 Ama chun, “La min Jakob hita pua’n tin, Israel#zia chu, Pathian tawh kibuan, ti’na ahi hizaw ta’n ah, Pathian tawh mihing la buan gêl ta’n, la thazo ta’ngal in,” a ti’n.

29 # Vai 13.17,18 Chuleh, Jakob in ama chu a dong ah, “Lungsiat in la min ei hil in,” a ti’n. Ama chun, “Bang ziak ah ka min ei dong la hem?” a ti’n. Tichun, zia mun ah chun a maljawl tai.

30Jakob in zia mun min chu Peniel#zia chu Hebrai pau ah, Pathian mai, ti’na ahi a sak tai: “Pathian chu kimaitua in ka mu ta hen, ka hinna hoi ahi ngal in,” a ti ziakin.

31Chuleh, Penuel a khêl phatin, nisa hung suak in a hun sal ta’n, a malpigu ziak ah chun a kibai tai.

32Ziaziakchun, tu’tiang hin Israel suante chun malpigu kituana, khêl ah thagui umna lai tak a ne ngai puau hi: Jakob malpigu kituana khêl thagui lai tak a la khoi ziakin.

Currently Selected:

THILSIAM THU 32: VAIPBSI

Highlight

Copy