THILSIAM THU 31
31
Jakob A Inkuante Tawh A Ganhon Tawh Jam mang
1Chun, Jakob in Laban chapate’n, “Jakob in I pau â zosia a lâk piak sik sek in, zia lopi’na a mu zosia hile I pa â lak ah pat a mu ngen ahi,” a tiu thuthang a la he ta’n.
2Jakob in Laban maisua chu tu’ma lam ah gual khan a chung in a tai ta puai ti a he’n.
3Chun, Lalpa’n Jakob kiang in, “La suante gam, la chipite kiang lam in chia kit ta’n, la kiang ah um zing ding ka hi,” a ti’n.
4Tichun, Jakob in lou lam ah a gan-gual umna kimu dingin Rakhel leh Leah vako dingin mi a sawl a.
5A kiang un, “La pau mêl ka et leh tu’ma lam gual ah khan ka chung hin a tai ta puai ti ka hia’n. Himaleh, ka pa Pathian chu ka kiang in a um zing hi.
6La pau na hi theitawp in ka sêm hi ti nang unle la hiau a.
7Himaleh, la pau chun ei thêm ah, ka law hi sawmvei hial ei hi’danglam piak ta’n; ahi’n la, ei suksiat ding vang Pathian in a phal lo ahi.
8‘A jem pawlte chu la law ding hi hen,’ a ti leh, gan zosiate chun a jem pawl ngen a hun hing sek un: chun, ‘A jem tante chu la law ding hi hen,’ a ti leh, gan zosiate chun a jem tante ngen a hun hing kit sek un.
9Ziagual chun, Pathian in la pau ganchate chu lak piak in, kei kiang in ei pia ta ahi,” a tia.
10Chuleh, gante chu a huam kipat lai ua chun ka mang in ka vak dakdaw leh; a chal, gancha bawte zosia chu a jem tante, a jem pawlte leh a jem kâi zeng zungte ngen a hiu a.
11Chun, ka mang ah chun Pathian vansawlchâk in, “Jakob,” ei hun ti’n. Ke’n le, “Zia hin ka um hi,” ka ti’n.
12Ama chun, “Hang khawdak in la en tiam in, kêlchal gancha baw zosia saw, a jem tante, a jem pawlte leh a jem kâi zeng zungte ngen ahi tau hi: Laban in la chung ah thil a bawl zosia hi ka mu suak ei vei.
13 #
Thl 28.18-22
Keima hi suangphu ah, sathau la nu’na, ka kiang ah thu la tiamna mun, zia Bethel Pathian kha ka hi. Tu’hin, kipan inla, zia gam ah kipat hin pawtdok inla, la pianna gam ah chia kit ta’n,” ei ti hen, a ti ta’n.
14Chun, Rakhel leh Leah chun a dawnhuu ah, a kiang in, “Ka pau In ah kei uh â dingin chan ding leh go khop ding a um nalai ah a hem?
15Ama’n gam dang mi dan ah ei ngai hilo a hem? Ei zuak in, ka man uh le a ne zo ta’ngal in.
16Pathian in ka pau ah kipat sum a lak piak thil zosia chu eimau leh I chateu â ding ahi. Ahi’n, Pathian in la kiang ah a gen taphot chu hi mai in,” a tiu a.
17Chun, Jakob chu a kisa’n, a chapate leh a jite chu sangawngsau chung in a chuansak a;
18Kanaan gam ah a pa Isak kiang lam ah chia dingin a gan nei zosia, a thil khol khawm zosia, a gan lawdawsate, Paddan-aram gam ah a khol khawm zosia chu a somdok sik sek tai.
19Laban chu a belam mul mêt ding ah a chia mang kâl ahi’n; Rakhel in a pa In dawi pathian limte chu a la guk mang piak a.
20Chun, Jakob chu Aram mi, Laban het lo kâl in a gûk in a la kigel mang ta’n; a jam mang ding chu ama a la hil masa puai.
21Chutichun, a nei zosia tawh a tai mang ta’n; chun, a kipan ah, Euphrates luipi a kân in, Gilead tânggam lam zuan in a chia tai.
Laban in Jakob Delpha
22Chun, a ni thum ni chun Jakob a jam mang tai ti Laban a hil phat un,
23a chanaute a pui in, ni sagi lam tiang in a vadel ah; Gilead tâng gam ah chun a vadel pha ta’n.
24Ahi’n, Aram mi Laban kiang ah chun jan ah a mang in Pathian a kilâk ah, “Jakob kiang in a sia hi’n, a pha hileh bangma gen lo dingin chingthei in,” a ti’n.
25Laban in Jakob chu a delpha ta’n. Jakob in a puan In chu tâng gam in a la jak ah. Laban inle a chanaute tawh Gilead tâng gam ah chun a puan In uh a jak tau a.
26Laban in Jakob kiang in, “La thil bawl dan hi bangtidan a hem, ka hetlo kâl in la la tai mang ziang ah; chemjam mang ah pui mang suakte gual in ka chanute la la pui mang ziang a?
27Bang ziak ah a gûk ah tai mang ah, a gûk ah ei nusia, kipaknate, Lâte, khuangneute leh tingtangte tawh ka thâk theina ding ah ei gen masa lo hial la hem?
28Chuleh, bangatia ka tute, ka chanute ka chawp malam phal lo la hem? La thilbawl hi ngolhuai tak ahi.
29Hun bawlsia thei ka hi’n; himaleh, la pa Pathian chun tu’jan ah khan, ‘Jakob kiang in a sia hi’n a pha hileh bangma gen lo ding in chingthei in,’ ti’n ei hil a.
30Ahi’n, la pa In lam ah chia nuam malehchinle, bangatia ka Inkuan pathian limte lei gûk mang piak khel khel a hem?” a ti’n.
31Jakob in Laban a dawnhu a, “La chanute hi thagum in ei lâkpiak ziang kha’n la ti ka lau ziak ahi;
32kuale la pathiante lim la mû’na taphot chu hing pua’n a. Ka Inkuante mit mu ah hin nang â ka kiang ah um chu enchian inla, kilâk ziang in,” a ti’n. Rakhel in a la gûk lam Jakob in a la hepuai.
33Chun, Laban chu Jakob puan In ah te, Leah puan In ah te leh a suaknu panite puan In ah te chun a lût pek ah; himaleh, a mu zo puai. Ahi’n, Leah puan In ah kipat chun a pawtdok ah, Rakhel puan In ah chun a lut kit a.
34Rakhel in a Inkuan pathian limte chu a la lâk, sangawngsau chungdâp chutnate lak ah a la koi, a la chut khum ahi’n. Laban in a puan In sung zosia chu hawl suak maleh, bangma a mu ta puai.
35Rakhel in a pa kiang in, “La ma ah ka din theilona ziak hin ka Lalpa lungna ki’hen: numei dan pangai chu ka chung ah a tun lai tak ahi ngal in,” a ti’n. Tichun, a In dawi pathian limte chu a hawl a hawl ah; himaleh, a mu zo ta puai.
36Chun, Jakob chu a hung lungna ta’n, Laban chu a vau tai: “Bang ka hi’khial ah, bang a hem ka gitlona, hiti lawm lawm ah lei hun delzui ziang hi?
37Ka van zosia la sua lumlet ah, la In sung van him him bang la mu em? Ei te ni chungchâng ah thupukna a siam theina ding ua, ka chanaute tawh la chanaute hin a dik leh a maw ei tan piak uh hen.
38Kum sawmni hial la kiang in ka la um ta hen; la belampite leh la kêlpite’n no a nei khial ngai puau ah; la belam hon lak ah a chalte le ka me kha puai.
39Gamsa peliamte le la kiang ah ka hun pui ngai puai; a mangte thasâng keima’n ka dit sek ah: sûn hileh, jan hileh a kigumang taphot, lei ditsak sek hi.
40Zia gual hin ka um sek in: sûn ah nisa ka thuak ah, jan ah khawvot in ei hi’genthei ma ma sek ah, iple ka ipmu khop ngai puai.
41Zia kum sawmni sung hi la In ah ka um ah; la chanute law dingin kum sawm leh li la na ka sêm in; la ganchate law dingin kum guk la na ka sêm kit ah. Ka law chu la sawmvei hial lei suk danglam piak in.
42Ka pa Pathian, Abraham Pathian, Isak in a Lau-pa chu ka kiang ah umlo hivang leh, tu’hin le ngawnchang ah ei chiasak ngei ngei ding la hi hilam. Pathian in ka genthei dan leh ka sepgim dan a mu’n, zia jan ah chun a hun vau ahi chulam!” ti’n a dawnhu a.
Jakob Tawh Laban In Thuthung Siam
43Laban in Jakob kiang in, “Chanute hi keima chanute ngen a hiu ah, naupangte hile keima naupangte ngen a hiu ah; ganchate hile keima ganchate ngen a hiu; la mu zosia hi kei â ngen ahi sik sek ui. Tu’ni hin zia ka chanute chung leh, a cha hinteu chung ah hin bang a hem ka bawl thei ding?
44Hung tiam in, thutiam bawl hitiu: zia chu nangma leh keima kikâl ah hiatpitu hi hen,” ti’n a dawnhu a.
45Tichun, Jakob in suang pakhat a la’n, a phu a.
46Chun, Jakob in a chanaute kiang in, “Suang hun lakhawm un,” a ti’n. Suang a hun lak khawm uh chu a tiang khawm un, a kiang ah chun an a ne tau a.
47Laban in zia suang tian khawm chu Jegar-sahadutha#zia chu, Aramaic pau ah, Hiatpitu Kisia khawm, ti’na ahi a sak ah; Jakob in Galeed#zia chu, Hebrai pau ah, Hiatpitu Kisia khawm, ti’na ahi a sak hi.
48Laban chun, “Zia suang tian khawm hi tu’ni keima tawh nangma kikâl ah hiatpitu ahi,” a tia. Ziaziakchun, a mun min in, Galeed sak den ahi tai.
49Laban chun, “I kikhen phat leh Lalpa’n ei vêng gêl ta hen” a ti ziakin, a suangphu chu Mizpah#zia chu, Gâlvan Bûk, ti’na ahi a sak a.
50“Ka chanute hi la hi’genthei ah, ka chanute hilo mi dang ji la nei chun, en in, kuama I kiang ah a umlo inle Pathian chu keima tawh nangma kikâl ah hiatpitu ahi,” a ti nalai a.
51Laban in Jakob kiang in, “Zia suang kitiang khawm leh suang kiphu, keima leh nangma kikâl ah kikoi hi en tiam in.
52Thil phalo kibawl piak tua lo dingin, keima zia suang kitiang khawm khêl ah hin la kiang lam ah hung pua’ng ka tin; nang le zia suang kitiang khawm leh zia suang kiphu khêl ah hin ka kiang lam ah hung kin la, zia suang kitiang khawm hi ei hiatpitu hihen la, zia suangphu hile ei hiatpitu hi hen.
53Abraham Pathian, Nahor Pathian leh a pau Pathian chun I kikâl in vaihawm ta hen,” a ti kit a. Jakob inle a pa Isak in a Lau-pa min chu sâl in a kitiam tai.
54Chuleh, Jakob in tâng ah chun kithoina a siam ah, a chanaute chu vaithum ne dingin a ko ah, vaithum ne zo in, tâng ah chun a giak tau a.
55Chuleh, Laban chu jingkal ma tak in a tho ah, a tute leh a chanute chu a chawp ah, a maljawl zaw in a nusia ah, a umna lam in a chia kit tai.
Currently Selected:
THILSIAM THU 31: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
