Sòlòmön 7
7
Kikōnyö
1Yöng vanāyö minë röön meh nö el hanīöt röön, Ō tösā ranī kikānö tarik alaha! Minë takeun meh tö milön sā yanöṅtö, vahī tö milichngen huneū-en.
2Ngam fun meh töchuvī töchilū pingāṅl töt hāṅten chūök kintēhĕ vāin. Aich meh sā töfônghak sāiny havīlöng tö lilī.
3Minë tönët teh meh sā tönët nòng kūön, tumnëtö kūön kāsöl.
4Likeun meh sā kanël elifan töchônghaka. Minë mat meh sā törūngö mak i Hespòn, i inkūp Patrappim. Ngam elmeh meh sā chūök chamông i Lepanön, môktökui Tamāskös.
5Sapīövu ngam kui meh sā Kārmel, minë töpahīöya keūyö meh inrē sā inmëlö tö huring hilā; kô-òngvahtī töp rācha tökūö minë tölöiny keūyö.
6Yöng vanāyö meh, Ō hanāngen, tölöökö mineūkö kikānö tarik alaha!
7Sā lanöökö kachūr chōn man, minë teh meh inrē sā mupōkö ṙòng.
8Hòṅ yônlö chin im kachūr chōn kētötīre inrē i pak ò. Mah, sā mupōkö ṙòng vāin nun minë teh meh, sā tinôngö ēpöl inrē unhôṅmö meh,
9Sā öp tölngö vāin inrē ngam hināmökūö tö meh öp tölööṙen inôkö,
Kikānö
nö meuthöt lökhöt i minuh tö kanap inrē.
10Aṅ im hanāngen chin chū-ö, mī-in chu öp inrē lōn ò.
11Tā-a, hanāngen chu, tai chu el panô-òṅ, ngaich iyöng i tuhēt;
12Tā-a tai ka-euilökūö chuh el panô-òṅ vāin, ai ngëichkö nup vāin yēn meunylö, yĕn pöpnyörekūö nup ṙòng yĕn pöpnyörekūö inrē ṙòng anār, In e chū-ö min kētö hanāngen re in meh.
13Taveūka nup chōn hanāngen, i kūö inkūp hī inrē nup ṙòng tö atöllöngö, tufömngöre hötṙeh inrē, nup hinöngken meh tö chu, Ō hanāngen chu.
Currently Selected:
Sòlòmön 7: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
