RŌMA 6

Kapah I Tökööl Ngaich Aṅ Im Innôlö Hol Kristū

1Sitih ṙô öi pakeh? Iṙūöhen öi im tökööl hòṅ ngam inlōnti nö pōyen? 2Öt halöngten e an ngam Tēv. Ayī-ö tö kapah ngaich öi ṙā-ang ngam tökööl, sitih höngngöhören öi min in e? 3Öt akahalōn öi yī-ö, tö hī ṙòkhöre ayī-ö tö vōkö in Kristū, öi vōkö i ngam kinpaha Ò? 4Lökten hī ngaich ultu hol ò, löktö im vinôkö, im kinpaha Ò, hòṅ hī, sā Kristū hachohlöngö ṙā-ang i yip tö kapah, löktö i kanôlò ngam Yöng, ngatī ayī-ö min inrē lök im tufömngöre nômö.

5Pò hī hamūltu in Ò, öi sā kinpaha Ò, sā invanlö Ò ayī-ö min inrē. 6Akahalōn tö ngih, tö ngam höteh tarik hī nö harātu nö hol Ò, hòṅ ngam tökööl alaha nö ṙā-aiṙen, hòṅ ngam tökööl nö öt ngöhöre nö hayöng nö in hī. 7Pò ngam tö kapah nö ṙā-ang im tökööl, ngaich löök. 8Yē hī kapah hol Kristū, ṙātö-ellōnre ayī-ö tö hī min aṅ hol Ò. 9Akahalōn in tö Kristū nö havanlöre nö ṙā-ang i tö kapah, öt hēk nö kapah; öt kanô-òṅvö ngam kinpaha nö in Ò. 10Pò ngam kinpaha Ò, hĕng heuh kinpaha An, kūö tökööl; ngam anahaṅ Ò pöri, im Tēv nö aṅ. 11Ngatī lōn yin yī-ö töre kapah, ṙāngö ngam tökööl; aṅ pöri im Tēv, lökten Kristū Yēsū, ngam Mā hī.

12Lökten un halöngtuṙen ngam tökööl nö hayöng ngam tö kapah alaha yīö, öi hang chöngö lōn ngam alaha; 13Ui rēhĕn kētö nup tūmö alahare im tökööl nö aṅtī nup ötlanöökö, kētöre pöri yī-ö im Tēv öi tö aṅ ṙā-ang yip tökapah; nup tūmö alaha yīö inrē nö aṅtī ngam lanöökö nö im Tēv. 14Pò ngam tökööl nö ötkô nö hayöngö yīö; pò yīö öt elkatòh ngam chöngö, elkatòh ngam inlōnti pöri.

Inkövö Im Tölöök

15Sitih ṙöng? Köölö fālen öi hòng sā hī öt elkatòh ngam chöngö, elkatòh ngam inlōnti pöri? Öt halöng An ngam Tēv. 16Öt akahalōn öyih, tö ngam chūök tī yīö kētöre öi kūön ngam töt inhôngen; kūön Ò yī-ö ngaich, ngam ahang chöngö yīö; yĕn ngam tökööl im kinpaha, hēk yĕn ngam töt inhôngen im lanöökö? 17Ha-öinyö pöri yēḵ ngam Tēv; pò yīö sin misī kūön ngam tökööl, vītu yī-ö ngaich töt maha-ôngen im ellōn, öi im insā ngam inköphöti, ngam ṙeūngö yīö ngaich ṙānyuvö; 18Ngaich yī-ö ṙānyuvö ṙā-ang im tökööl, vītu yī-ö ngaich kūön ngam lanöökö. 19Sā inlahen ṙô tarik chin, kūö öt kumlēḵ alaha yīö: pòn sā yīö sin misī, kēḵngö nup tūmö alaha yīö nö kūön ngam töchōich, ngatī yin töngamuh, kētö minë tūmö alaha yīö nö kūön ngam lanöökö.

20Pò yīö misī kūön ngam tökööl, ngaich öt īnu yī-ö tö lanöökö, 21Suh nup pökeh ṙòng in yīö hē e, i nup sumrōngkūö töngamuh? Tön ngam kinpaha manāngen u anū-ö. 22Ngaich pöri ṙānyu töngamuh ṙā-ang im tökööl, ngaich vītu öi kūön ngam Tēv, ngaich ṙôngu yī-ö im inhetlö, ngaich nômö tö tö örheūheu-aṅ, manāngen. 23Pò ngam raneushö tökööl nö kinpaha; ngam aṅ im Tēv pöri tötṙāyu raneushö, ngam tö örheūheu-aṅ nômö, in Kristū Yēsū ngam Mā hī.

Currently Selected:

RŌMA 6: CANIBSI

Highlight

Copy