RŌMA 7

In chōḵ-oṙô im Pinīhö

1Hēk öt akahalōn öyih, kahōlö, tön ve-ekūö tarik chin yiptö akahakūö tö ngam chöngö tö inlahen ngam chöngö nö hayöng ngòh tarik isaha rô-òten ò nö aṅ? 2Pò ngòh kikānö, ngam tö pihövö, nö haköpiyö nö im pihöre nö lökten im chöngö, isaha ngam kikōnyö nö aṅ, yē ngam kikōnyö pöri nö ngaich nö kapah, ngaich ngam kikānö nö ṙānyuvö nö ṙā-ang elkatòh chöngö ngam pihöre. 3Lökten yē ngam kikānö nö hamūltu nö i tahëng kikōnyö, isaha ngam inpihö nö ṙòngmö aṅ, ngaich ma-asĕhha anga-aṅ tö ṙô: yē ngam kikōnyö pöri nö kapah, ngaich ṙānyu anga-aṅ nö ṙā-ang im chöngö, ngaich öt ma-asĕhha anga-aṅ, pòrô nö hamūltu nö i tahëng kikōnyö. 4Lökten, yī-ö hol chu, tö ngaich yin yī-ö inrē kapah im chöngö löktö alaha Kristū: pò yīö hōtu hamūltu im tahëng; in Ò, ngam töhachohlöngö nö ṙā-ang i tö kapah, hòṅ hī öi sīöpnyöre ṙòng im Tēv. 5Pò hī, hē hī misī ing alaha ngaich nup tökööl lōn ngam alaha, nup lamökten im chöngö, nö vahī-ivṙen nö i në tūmö alaha hī, nö asīöpnyö ṙòng im kinpaha. 6Ngaich öi pöchöh ṙānyu ṙā-ang elkatòh ngam chöngö, ngaich öi kapah im chūök kinṙāpö hī misī, hòṅ hī lök im tufömngöre aṅ im ma-alaha, öt im kanöinyö ngam tö kūichiyö.

Chöngö Töm Tökööl

7Sitih ṙô öi pökeh? Tökööl öng ngam chöngö? Öt halöng an ngam Tēv. Hö-ö pöri chu-ö sin akahakūö tö tökööl höng lökten im chöngö: pò chu öt akahakūö tö yinikngö sīnö, höng ngam chöngö tö ngö ṙô, Uh man yikhanga. 8Ngaich pöri ngam tökööl nö vahī-ivṙen nö in chu, nö lökten im chöngö, tö nup tö ṙōlkangen yinikhanga, kôti ngaich nö lökngövah, pòn kapah ngam tökööl nö köhngen töm chöngö. 9Ngaich hĕng heuh chu-ö misī aṅ köhngen töm chöngö chalôhë pöri ngam chöngö ngaich aṅlö ngam tökööl, ngaich kapah chu-ö; 10Ngaich ngam chöngö, ngam mi-im nômö, kôtökūö chu-ö tö e nö im kinpaha. 11Pò ngam tökööl nö lökten im chöngö, nö kôtökūö tö lökngövah, ngaich hachīlö chu, ngaich lökten in e nö fëlngen chu. 12Lökten ngam chöngö nö töhet, ngam inchöngö inrē nö töhet, lanöökö, tölöök inrē. 13Ngaich pökeh hòng ngam tölöök nö kinpaha nö in chu? Öt halöng an ngam Tēv, ngam tökööl pöri, hòṅ e nö hameuktu nö tökööl, nö vītö kinpaha nö in chu, nö lökten i ngam tölöök; hòn lökten ngam chöngö ngam tökööl nö kiröngen kanöölö.

Kintöngölōn Ngòh Tarik

14Pò hī akahalōn töm chöngö nö töhet: aṅ ing alaha pöri chu-ö, inyihiyö elkatòh ngam chöngö. 15Pò chu öt akahalōn töp la-enre: pòn öt nup ahōḵo chu, nö anū-ö la-en chu harūnöre; tön nup surīkhö chu pöri, anū-ö la-en chu. 16Ngaich yē chu pöri la-evṙen töp sahōḵore, ngaich hōḵ chu-ö im chöngö tö e nö tölöök. 17Lökten töngamuh, rö-ö chin öich chu-ö tö la-evṙen tö e, tön tökööl, ngam mi-iyöng in chu. 18Pò chu akahalōn tö in re, angū-ö, ngam ing alaha chu, nö öt iyöngö in tö tökööl: pòn in chu ngam tö hōḵ lōn, ngaich rö-ö ngam lina-evṙen tö tölöök. 19Pò ngam tölöök nö öt vīka tö chu, ngam tötlöök pöri sahōḵo chu, angū-ö inrun chu. 20Yē chu pöri vīken ngam töt ahōḵore, ngaich rö-ö chu-ö tö la-evṙen tö e, tön tökööl ngam mi-iyöng in chu.

21Kôtökūö pöri chū-ö ngaich töm chöngö, chu-ö tö hòṅ la-evṙen tö tölöök, ngaich ōtre ngam tötlöök nö in chu. 22Pò chu kuchīken im chöngö ngam Tēv, nö sā ngam latuhēt tarik: 23Meuk tö harīkngöre pöri chu-ö chöngö i në tūmö alaha chu, lā-al kūö ngam chöngö ellōn chu, ngaich kēten chu hakövö elkatòh ngam chöngö tökööl, ngam aṅ i në tūmö alaha chu. 24Ō chu-ö tötkôlò tarik! Achīö ap min ṙamānyen chu ṙā-ang ing alaha kinpaha? 25Ha-öiny ngam Tēv chin lökten in Yēsū Kristū ngam Mā hī. Hòṅ chu hol tö ellōnre lök la-en ngam chöngö ngam Tēv; hol tö ngam alaha pöri ngam chöngö tökööl.

Currently Selected:

RŌMA 7: CANIBSI

Highlight

Copy