RŌMA 3

1Suh papkeh kanô-òṅ i vē Yahūti? Suh ap kanôlò aṅ im tunnyinyngö? 2Keuheūttören talöökö nö pōyen: raneh u nö ṙòkhöre, kē-ĕvkūö cha-a nö hayōmken minë chöngö ngam Tēv. 3Pòyòh yĕn rēvre töt mikahavö? Ngaich ngam hanāten cha hòng nö im mikah, nö öt kanôlòvö tī tö ngam kanô-en ngam Tēv? 4Un ngatī yēḵ; hôṅ; hökngen ngam Tēv nö tökô-en; ṙòkhöre pöri tarik nö töminyôiny-aṅ; sā kinūichngö e nö ngö, Hòṅ meh kô-en i nup ṙô meh, ane inrē hòṅ meh mihôiṅ yē meh kahôka. 5Yē ngam michūṙen hī pöri nö hōtö ngam lanöökö ngam Tēv, sitih ṙô öi min? Tömichūṙen ang ngam Tēv ngam chamöha nö holtö lanīnö? (Sā ṙô tarik chin ṙô-òv). 6Un ngatī yēḵ; sitih inlahen ṙöng ang ngam Tēv min nö kahòkken ngih panam? 7Yē ngam Tēv pöri nö lökten im minyôiny-aṅ chu nö pōilö ngaich nö im kanôlò Ò, pò yòh öich ṙòng möng kahòkkaṙen sā tököölö fālen? 8Ngaich kūöyòh rö-ö (sānup tö eūka sinūöichkö ih, sā ṙô yip rēvre ṙung nö eūken ih nö ngöṙô), töi chōichö la-en, hòn yih ngam tölöök? Yip tölöökö öt inkôlò.

Öt Hěngtak Tölöök

9Sitih pökeh? Höichngen inlahen öi ayī-ö tö cha? Hö-ö, öt höichngen: pò hī taheui, hĕnghöre i yip Yahūti, i yip krik inrē töm fālen, tö cha nö ṙòkhöre nö elkatòh ngam tökööl; 10Sā kinūichngö e nö ngö. Rö-övö nö tölööku, hö-ö, öt hĕng tak. 11Rö-övö nö tö-akavö elmat, Rö-övö nö chamöhöv ngam Tēv. 12Ṙòkhöre inrē cha-a nö öt kanôluṙô. Rö-övö nö tölööku la-en, hö-ö, ötrēhĕn nöng hĕng tak. 13Anūlö nup kilööp cha töluve-akkūö; i litākre minyôiny-aṅ yip; I minuh cha nup pēch tö kapahakūö. 14Yip tö tööḵlö elvāng tö ötlinëkô, kumnyah inrē. 15Veut nup röön cha nö kitaknyö mahām: 16Ngaich ngen nup talöökö cha nö öt kanôlò inrē. 17Öt akahakūö yip tö talöökö kumchikṙen: 18Öt aṅhaṅvkūö yip tö pinheṅ-eṅkūö tö ngam Tēv.

19Akahalōn in ngaich töngamuh tö nup töng ṙô ngam chöngö, ve-ekūö cha-ana yip elkatòh ngam chöngö; hòn ṙòkhöre nup elvāng nö asökiyö, ngaich ṙòkhöre ngih panam nö kēhötvö nö elkatòh ngam kinṙôka aṅ im Tēv: 20Pòn kūö la-en ngam chöngö nö öt tarīku tö löök nö ikūö Ò: pòn lökten im chöngö ngam mikahkūö tö tökööl.

Sitihtī Ngam Tēv Nö Halööklenhī Nö In Re

21Ngaich pöri töngamuh nö köhngen töm chöngö, nö hameuktu ngam lanöökö ngam Tēv, ngam chöngö an ameū-a tö më pròfĕt inrē; 22Angū-ö lanöökö ngam Tēv lökten im mikah in Yēsū Kristū nö in cha nö ṙòkhöre yip ṙamātö ellōnre; pòn öt tö atöltuṙenvö; 23Pòn ṙòkhöre nö köölö fālen, ngaich hāṅten tö kanôlò ngam Tēv; 24Halööklöngö nöng öt ṙāyu lökten im inlōnti aṅ in Ò, lökten ngam ṙinānyi ngam in Kristū Yēsū: 25Ngam tö töliṙen tö ngam Tēv nö inlāmö lökten im mikah im mahām Ò, nö hameuktö ngam lanöökö Ò, kūö invāngngö nuk tökööl tö, ngaich misī, nö i manöiyö ngam Tēv, 26Ngö ṙô chin, kūö inmeuktö ngam lanöökö Ò inrē töngamuh: pòn hōtu anga-aṅ nö löök, ngam mahalööklen ò inrē, tö aṅ im mikah in Yēsū.

27Isuh ap pökeh ineū-euṅ? Öt mūlta an. Lökten ip yòh chöngö? Aṅ i la-en hòng? Hö-ö, tön lökten i chöngö aṅ i mikah. 28Lökten in kaheukhöti tö ngòh tarik nö halööklöngö nö lökten im mikah, nö köhngen töm la-en aṅ im chöngö. 29Hēk, höng Tēv vē Yahūti ang ngam Tēv? Röh ang nö Tēv vē Tahëng mihëṅṙö inrē? Hôṅ, vē Tahëng mihëṅṙö inrē? 30Yĕn ngatī ngam Tēv nö töng hĕng, ngaich anga-aṅ min nö halöök vē tö tunyīnyi lökten im mikah, vē töt tunyīnyi inrē nö löklen im mikah. 31Ngaich öi pökeh ayī-ö vīten ngam chöngö nö öt tinīlu, kūö ngam mikah? Un ngatī yēḵ: hö-ö, köpö tī in tö ngam chöngö.

Currently Selected:

RŌMA 3: CANIBSI

Highlight

Copy