RŌMA 4

Inchōḵo Elmatten Tö Aprāhām

1Sitih ṙô öi pökeh tö kanôtökūö Aprahām ök muvöhngö hī, nö sā ngam alaha? 2Yē Aprahām öre nö löklen i la-en inlööklö, ngaich löknyu ineū-euṅ anga-aṅ; rö-ö pöri nö kū-ö tö im Tēv. 3Sitih ṙô ṙöng öng ngam töhet līpöre? Ṙātö-ellōnre Aprahām nö im Tēv ngaich kaheuktu nö lanöökö nö in Ò. 4Ngaich in ò ngam tö la-evṙen, nö öt kaheuktu ngam raneushö, nö aṅ im inlōnti, sā höteh pöri. 5In ò pöri ngam töt la-evṙen, höng ṙātö ellōnre pöri nö in Ò ngam mahalööklö tötlöök, ngaich kaheuktu ngam mikah ò nö lanöökö. 6Sā Tāvit inrē nö ṙô-òiny inkôlò nö ing tarik, ngam tö kaheuktu tö ngam Tēv nö im lanöökö, nö köhngen tö nup la-en, nö ngö ṙô, 7Tö kôlò yip cha-a yip tö aṙēlöngö tökööl, yip tö hanyāti tökööl inrē. 8Tökôlò ön ngòh tarik, ngòh töt kaheuktu tö ngam Tēv, nö i tökööl.

9Inkôlò vē tö tunyīnyi öng ṙöng angū-ö? Vē töt tunyīnyi ṙöng inrē? Pò hī ngö ṙô, tö ngam mikah Aprahām nö kaheuktu nö lanöökö. 10Sitih kinṙeukti önguh? Unôichrit ò ṙöng nö tunyīnyi? Urĕh ṙöng? Röön unôich; tön urĕh. 11Ngaich teūngen anga-aṅ tö ngam minkahngö tunnyinyngö, kintāntö ngam mi-in ò nö ngaich, hē ò nö öl nö tunyīnyi; pòn hōtu anga-aṅ nö yöng taṙòkhöre, ṙamātö ellōnre, pòrô cha-a nö töt tunyīnyi; hòṅ cha cha-a inrē nö kaheuktu nö im lanöökö; 12Yöng cha inrē yip tö tunyīnyi, röön höng yip tö tunyīnyi, tön yip lamök el talöökö ò inrē, nö im mikah ngam yöng hī Aprahām, ngam mikah ò hē ò nö öl nö tunyīnyi.

Lökten Im Mikah Öi Teūngen Tö Nup Ṙô Ngam Tēv.

13Pòn öt lökten ngam chöngö, ngam kinlēḵngô nö in Aprahām, hēk ip kūön ò, nö anga-aṅ tö-amīnuvö töng panam, lökten ngam lanöökö ngam mikah pöri. 14Pò cha öre yip mi-im chöngö nö tö amīnuvö, ngaich ngam mikah nö chanökalaha, ngam kinlēḵngô inrē nö töng rö-ö. 15Pò ngam chöngö nö vamīlö lanīnö; i chūök ngam chöngö pöri nö rö-öv, ngaich öt pinyāingu angū-ö.

16Angū-ö an lökten e nö aṅ im mikah, hòṅ e nö sā ngam inlōnti; pòn hōtu ngam kinlēḵngô kūön; rö-ö nöng in ò ngam mi-im chöngö, tön in ò inrē ngam mi-im mikah Aprahām, ngam yöng hī ṙòkhöre; 17(Sā kinūichngö e nö ngö, Vīlen meh chin yöng tö ṙōl mihëṅṙö tarik) i kūö ò ngam chūök ò nö ṙātö ellōn re, Anga-aṅ ngam Tēv, ngam maha-aṅ kupah, ngaich havëtö nup tö rö-ö, nö sā u öre yĕn könghaka. 18Ngam mi-im mineūka ngaich ṙātö ellōnre im mineūka, pòn hōtu anga-aṅ nö yöng tö ṙōl mihëṅṙö tarik, sā ngam tö ngaich misītö eūka, Ngatī yip kūön meh min. 19Ngaich rö-övö nö öt kumlĕḵĕyö nö im mikah, ngaich ök alaha ò tö lōn ò nö sā kupah (pòn hēngòng samyeūheu ṙēti anga-aṅ), öt akahaiṙen inrē ök chūök kanūönö Sārai. 20Hôṅ, meūkkö ngam kinlēḵngô ngam Tēv, öt katēli anga-aṅ nö lökngen ngam öt ṙinātö ellōn, ṙuhölre kumlēḵ pöri nö lökten im mikah, ngaich ha-öiny ngam Tēv, 21Pòn mikahtulōn takô tö ngam tö kilēḵĕyö, tö Ò, ngaich mihôiṅ inrē Anga-aṅ nö hateunghöti. 22Lökten inrē nö kaheuktu nö in ò nö lanöökö. 23Öt kūichi angū-ö nö kūö Ò nöng hĕng taka ngam tö kaheuktu nö in ò, 24Tön kūö hī ayī-ö inrē öi kaheuktuvö tö e min, öi ṙamātö ellōnre in Ò ngam mahachohlen Yēsū ngam mā hī nö ṙā-ang i tö kapah, 25Ngam tö kē-ĕyö kūö në tökööl hī, ngaich hachohlöngö kūö inlööklö hī.

Currently Selected:

RŌMA 4: CANIBSI

Highlight

Copy