RŌMA 2

Kahôkkaṙen Töm Tēv

1Lökten man me-eṅ öt inṙēluvö, Ō me-eṅ tarik, me-eṅ töng kamhôṅka; töt mahakôlòre mana, yē meh kahòkken tahëng; pò meh me-eṅ kamhôka ngaich öm harūnöre i tö ngatī. 2Akahalōn ayī-ö tö ngam kinṙôka aṅ im Tēv nö sā ngam kanô-en nö i yip maharūnöre nö i tö ngatī. 3Öt kô-òngvah öm min me-eṅ tö lōnre tö kūö ngam kinṙôka aṅ im Tēv, Ō me-eṅ tarik, öm kamhòkken cha yip maharūnöre nö i tö ngatī, ngaich me-eṅ ngatī inrē? 4Miyëḵ ṙöng öm tö ṙôken ngam lanöökö Ò, ṙināpö, manöiyö Ò inrē, öm öt akahalōn tö lanöökö ngam Tēv nö hachōten meh im invöötö ellōn? 5Ngaich pöri nup nganëḵeṅ ellōn meh, öt miṙivlōn meh inrē tö tökööl nö hamūllö lanīnö im inmeuktö ngam tölöök kinṙôka aṅ im Tēv: 6Ngam kameḵeṅkūö tarik min tö nup tö sā la-en cha: 7I yip mahamöiyöre i tölöök la-en; nö chöh kanôlò, ineū-euṅ, töt chinhūngu inrē, in cha ngam nômö tö örheūheu aṅ: 8In cha pöri yip töminôṙô, maha-ôngen ngam kanô-en, hamangṙô michūṙen; ngam lanīnö. 9Kanihngen, miṙivlōn, i ellōn taṙòkhöre tarik yip tö la-evṙen tö tötlöök, aṅ i yip Yahūti urĕh, aṅ i yip Krīk inrē; 10Kanôlò pöri ineū-euṅ inrē, kumchikṙen inrē i yip taṙòkhöre tarik tö la-evṙen tö tölöök, urĕh i yip Yahūti, i yip Krīk inrē: 11Pò ngam Tēv nö töt atöltuṙen tö tarik.

12I ṙôngö yip tö ngaich nö köölö fālen nö lā-uk ngam chöngö, öt kôlò min nö lā-uk ngam chöngö: i ṙôngö yip tö ngaich nö köölö fālen nö el katòh ngam chöngö, im chöngö kinṙòkken min. 13Pòn öt höng yip hamangṙô ngam chöngö, tö löök nö i kūö ngam Tēv, tön yip töla-evṙen tö aṅ im chöngö, nö cha-a tö kaheuktu nö löök. 14Pò yip tahëng mihëṅṙö tarik yip töt īnu tö chöngö nö la-evṙen tö ngam nehngenre aṅ im chöngö, vē töt īnu tö chöngö, ngaich chöngu cha-a nö in re. 15I inlaha cha nö hameuktö la-en ngam chöngö nö kūichiyö nö ellōn cha, in e ngam kui lōn cha nö eū-a, ngaich nup lōn cha nö kö vëken höö, hēk vëken cha; 16Im sakāmö hē ngam Tēv min nö kahòkken nup töhayunka i tarik, sā ngam ahangkö chu tölöök, lökten Yēsū Kristū.

Mëṅ Yahūti Ngaich Ngam Chöngö

17Yē meh pöri me-eṅ minënyu tö mine-eny Yahūti, öm töönglöre im chöngö, ngaich eū-eure im Tēv, 18Akahalōn tö lōn Ò, ngaich hōḵo nup tölngö tölöök, haköptu inrē tö aṅ im chöngö, 19Ngaich nyatlö töre me-eṅ inchōkūö tötmeuk, hanātö mat cha yip el sinngūlö. 20Mahachōten töt akaha, mahaköptö tëṅnö, īnu töm chöngö insā mikah, ngam kanô-en inrē; 21Lökten meh haköp tö tahëng, ngaich öm öt haköp töre hòng me-eṅ? Me-eṅ mumkahten tarik nö un ulāyö, ngaich ulāyö hòng me-eṅ? 22Me-eṅ öm tö ngö ṙô tö tarik, un asĕhha, ngaich asĕhha hòng me-eṅ? Me-eṅ tö sa-òkkūö tö insā tēv, ngaich ulāingen në töhet chūök hòng? 23Me-eṅ ameu-eure im chöngö, ngaich lökten im finlalngö ngam chöngö öm öt milēḵṙen tö ngam Tēv? 24Pò ngam mine-eny ngam Tēv nö ötlēkaṙen nö ngaich nö i vē Tahëng Mihëṅṙö tarik tö kūö yīö, sā kinūichngö e nö ngaich.

25Pòn kô nö kôlò tī ngam tunnyinyngö yē meh öm tö la-evṙen tö aṅ im chöngö; yē meh pöri pumyāingö ngam chöngö; ngaich ngam tunnyinyngö meh nö vīngöre nö öt tunyinyngö. 26Lökten yē yip töt tunyīnyi nö haköp nup inchöngten im chöngö; röh öng ngam öt tunnyinyngö ò nö kaheuktu nö tunnyingngö? 27Ngaich rö-ö hòng min ngam öt tunnyinyngö ngam nehngenre, nö kahòkken meh, yē e nö hateungngö ngam chöngö, me-eṅ tö īnu töm kinūichö; tunnyinyngö inrē öm tö falālö tī tö aṅ im chöngö? 28Pò ò anga-aṅ nö öt Yahūti ngam töng el kahôyö, öt rēhĕn nö tunnyinyngö ngam töng lā-uk nö im alaha. 29Yahūti pöri anga-aṅ ngam lā tuhēt; ngaich ngam tunnyinyngö nö aṅ im ellōn, im ma-alaha, öt im kinūichö; öp töt aṅ i tarik ineū-euṅ, aṅ im Tēv pöri.

Currently Selected:

RŌMA 2: CANIBSI

Highlight

Copy