RŌMA 1

1Töhakövö ön Pôl tö Yēsū Kristū, havëtu nö tanīnöṙô, hakösiṙen im tölöök inhangkö ngam Tēv; 2Ngam tö kilēḵĕyö misī tö Ò i mat minë töhet līpöre, nö lökten i yik pròfĕt Ò, 3Inlahen ngam kūön Ò, ngam tö fötnyu nö löklörit Tāvit sā ngam alaha, 4Ngam tövënyu nö kūön ngam Tēv im minhôiṅyö, sā ngam hanëtö ngam ma-alaha, lökten im invanlö tö kapah; ngam mā hī Yēsū Kristū. 5Ngam lökten hī teūngen ngaich tö inlōnti, töre inrē tanīnöṙô, im hināngö ngam mikah tö vē taṙòkhöre tarik, tö kūö ngam minënyö Ò: 6Mūlta yin yī-ö inrē, havëtu öi tarik Krsitū;

7Löö i yip mi-i Rōma nö ṙòkhöre, hanāngen ngam Tēv, havëtu nö töhet; Inlōnti yēḵ, kumchikṙen inrē aṅ im Tēv, Yöng hī, aṅ im Mā inrē Yēsū Kristū.

Vinë-ekūötēv Nöiny Tö Tī Ngam Tēv

8Ha-öiny ngam Tēvre chin urĕh, chööḵnyö ten yīö ṙòkhöre, hòṅ ngam mikah yīö nö keuheūtngöre chūök nö ahangka nö ing panam. 9Pò ngam Tēv nö Anga-aṅ mameūkö chu, lahök la-en chu im ma-alaha, im tölöök inhangkö ngam Kūön Ò, tö chu öt ṙākôre ṙôten yīö; 10Örheūheu i nup ṙô chu ve-ekūötēv öich ve-elkui, hòṅ chu sòk töngamuh hakôlòngṙô öich yih in yīö, i lōn ngam Tēv. 11Tön paṙūtalōn chin hòṅ meukkūö yīö, pò chu hòṅ kētö ngam inlōntö ma-alaha in yīö, hòṅ yīö köp; 12Hòṅ chu hol yīö, haṙāmölōn in yīö; ṙòkhöre ayī-ö kö i mikah höö; ayī-ö nyöre tö chu. 13Kahōlö, sōten yīö chin öt akahalōn tö chu ṙōlheuh lang hòṅ yih in yīö (asāniṙen pöri), pò chu hòṅ ṙôngu in yīö inrē, sā aṅ i yip Tahëng Mihëṅṙö tarik inrē. 14Hötëhev chin hĕnghöre i Krīk i yip aṅ el inchōn inrē, hĕnghöre i yip tö-akaha, i yip tötakaha inrē. 15Lēnen chin ahangkö ngam tölöök inhānga in yīö i yip aṅ Rōma inrē, ip tölngö e nö in chu.

Ngam Kumlēḵ Ngam Tölöök Inhānga

16Pò chu öt sirōngkūö tö ngam tölöök inhānga: pò e nö minhôiṅyö ngam Tēv im inyööken, nö in cha nö ṙòkhöre yip ṙamātö ellōnre; i yip Yahūti urĕh, i yip Krīk inrē. 17Pòn in e nö hameuktu ngam lanöökö ngam Tēv, ṙeūngö ngam mikah nö im mikah: sā kinūichngö e nö ngö, Lökten i mikah pöri yip tölöök nö aṅ.

Ötlanöökö Ngòh Tarik

18Pò ngam lanīnö ngam Tēv nö hameuktu i nup öt lanöökö, ane inrē i nup michūṙen tarik, yip maharāinyngö ngam kanô-en tö michūṙen; 19Pò ngam inkahngen ngam Tēv nö hameuktu nö in u; pò ngam Tēv nö hameuktö e nö in u. 20Pòn löökö mineūkö nup tötmaneūken sin misī hē vinīlö ngih panam, pòn meūkö nö lökten i nup tövīlöngö ngam töt chanūhuvṙen minhôiṅyö Ò, ngam inlahen Ò nö Tēv inrē; 21Ngaich cha-a nö öt inṙēlu; pò cha nö akahalōn tö Ò nö Tēv, ngaich cha-a nö öt hapōilen Ò nö sā Tēv, öt rēhĕn nö ha-öinyan, ngaich vītöre nöng tötöl i nup chanöh ellōn cha, sangūliyö inrē nup inkahangen ellōn cha. 22Eūköre cha-a nö tö-akaha, ngaich vītöre nö tötakaha, 23Ngaich haṙīngö kanôlò ngam töt chahū-uyö Tēv nö sā insā ngòh tarik töchahū-uyö, sā në chehechōn, sā në töfënö kalröön chehen, sā në töṙeūla chehen inrē.

24Lökten ngam Tēv nö kēḵngen cha i hanāngen nup ellōn cha tö sin-òkkūö, hòṅ nup alaha cha nö hayeḵe nö in cha: 25Pò cha nö haṙīngö ngam kanô-en ngam Tēv nö minyôiny-aṅ, ngam tövīlöngö, nö mööḵngöre töm Vamī-iṅl, ngam tökôlò nö örheūheu. Āmen.

26Angū-ö an lökten ngam Tēv nö kēḵngen cha nö i nup töt het lōn cha: pò yip kikānö cha nö haṙī-ing nup tö nehngenre nö lā-al ap nehngenre: 27Ngatī inrē yip kikōnyö nö ṙāngö nup tönehngenre i kikānö, hū ngam tötlöök lōn cha nöng kö in höö; la-evṙen tö ngam töchōich nöng i kikōnyö nyöre, ngaich teūngen nö in re tö invahalvah nup vanāichö cha, nup tö ṙòngmö höteh.

28Sōḵo ngam Tēv cha-a nö i mikahre, ngaich kēḵngen cha ngam Tēv nö im ötkanôlò ellōn, nö la-evṙen tö nup tö ötlöök: 29Pòn tööḵlö tö nup michūṙen, öt lanöökö, yinikhanga, tanāinyö; tööḵlö tö kumnyah elmat, finël tarik, kinsōlö, inchīlö, inngëṙö; 30Mihiṙeūtkôre, vame-engnang, sumrīkngö ngam Tēv, tömiyëḵ, tö-angë tachōich, ameū-euṅre, maharunten taṙòkhöre tötlöök, ma-ahôngen yöngre, 31Öt īnu tö mikah, fumlalngö chöngö, öt īnu tö nehngenre hanāngen, tötaṙē-ĕlōn. 32Cha-a, tö-akahalōn tö chöngö ngam Tēv, tö cha yip maharūnöre nö i tö ngatī nö tö hòṅ kumpaha, öt höng töngatī la-en, tön yip tö hōḵ inrē nö in cha nö harūnöre tö u.

Currently Selected:

RŌMA 1: CANIBSI

Highlight

Copy