INCHŌḴ-OṘÔ 8
8
Ha-öiny Ngam Mikah
1Öt havë-a öng ngam mikah, öt hūnyôre öng ngam mikah elmat?
2I kui rung i taseū talöökö, el kanröönö anga-aṅ nö sökhaka;
3I nup inkūp lā kūö öp el inkūp anga-aṅ nö pōitô nö hū-a
4Ō tarik havëken meh chin lamöö i kūön tarik an ngam ṙô chu.
5Ō töt akahaṙa, haköp mikah; Ō tökulō-ovö tarik, hangihtöre.
6Hang, tön ṙô tö tölöök chin min, löknyö i në minuh chu min inrē nö yih öp töchip,
7Pòn ṙô tö kanô-en min ngih elvāng chu; sin-òṅkkūö në minuh chu an ngam öt lanöökö.
8Ṙòkhöre nup ṙô elvāng chu nö tölöök; öt hĕng in u tö löinyi hēk tökumrôki.
9Ṙòkhöre nun nö chip nö in ò ngòh tö akah elmat tö huveū inrē nö in cha yip chamöh mikah.
10Kēḵ ngam inköphöti aṅ in chu ṙënngen rupīö, mikah inrē nö mötlö tö tölöök humlum;
11Pò ngam mikah nö mötlö tö yanöṅtö, ötkô nö hanṙongten nö in e inrē nup taṙòkhöre lōn meh.
12I yöng i mikah chin chū-ö mikah kôtökūö chin inrē tö inkaha mikah elmat.
13Sunrīkhö tötlöök an ngam pinhë-eṅkūö tö ngam Mā Tēv. Inkeūlen kanësen inrē talöökö tölöök tö hachōchi ṙô inrē surīkhö chu.
14Inu chin tö inlēnö tölöök mikah inrē, lā tuhēt elmat, öich kumlē-ĕv.
15Lökten in chu rācha nö hayöng, yip mahayöng inrē nö kētö tölöök chöngö;
16Lökten in chu kūön rācha nö hayöng, mā inrē nö hayöng ngih tumlat.
17Hāngen chin tö cha yip tö hāngen tö chu, cha-a inrē yip tö pētngen nö chöh kôtökūö tö chu.
18In chu kanôlò ineū-eu inrē, töt chanūhuvṙen kanôlò lanööken inrē.
19Mötlö ön ngih ṙòng chu tö humlum, pòrô nö vai humlum në samīöplö in chu inrē mötlö tö tölöök rupīö.
20Lök el talöökö lanöökö chin, el kanröönö tötmichūöṙen kinṙôka,
21Kētö kanôlò in cha yip töhāngenlōn tö chu, hatööḵlö chūök chehen cha inrē.
22Vīlen chu an ngam Mā Tēv ik raneh tī Ò nö vī, raneh nö tī Ò misī.
23Sökhakṙen chū-ö ngaich samyeūheuvö, urĕh, tö ranehlö ngih tumlat.
24Hē mai nö öluvö ngaich chū-ö fötnyu, hē tö pöklö mak nö öluvö nö pōyen aṅ tö mak.
25Urēhĕkūö minë rôngö nö vī-i, urĕh tö minë rung, öich fötnyuvö;
26Urēhĕkūö tī Ò nö vī tumlat tö minë el kahôyö inrē, hēk ök raneh pitung ngam panam.
27Hē ò nö haköpngö minë halīöngö, umuh chū-ö, hē ò nö kūich tö chuvī nö i kui ngam mai,
28Hē Ò nö ngë-eṅtī nö ngaich nö vī minë taṙūl lā tulöng, hē Ò nö haköpngö löklö ngam mai,
29Hē Ò nö halēnngö tölngökūö ngam mai, pòn sōtu ngam mak nö tôchngen tö chöngö ò, hē Ò nö mikahngö chūök rööntö ngam tumlat,
30Ngaich in ò chū-ö, sā tarik yöngkūö töhuveū-en i la-en; kaheuk sakāmö chū-ö inrē kumchiklōn ò, ṙamölōn i kūö Ò örheūheu,
31Ṙamölōn ing tö aṅhavkūö panam ò, kumchikngenre inrē in vē kūön tarik.
32Kikōnyö kūön chu, hangihtô chu töngamuh: ṙamölōn yip cha-a tö köp tö talöökö chu.
33Hang inköphöti ngaich akaha, un öt mikūöṙen inrē tö e.
34Ṙamölōn ön ngòh tarik hamang ṙô chu, öt hĕng hang sumkam nö hönga nö i kūö inkūp chu, höka nö i kūö inkūp.
35Pò ngòh tökôtökūö tö chu kôtökūö tö nômö teūngen inrē tö neūkölōn aṅ im Mā Tēv;
36Anga-aṅ pöri öp chamööḵngen chu chökhutī töre; ṙòkhöre yip tösumrīk tö chu tö hāngenlōn tö kinpaha.
Currently Selected:
INCHŌḴ-OṘÔ 8: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
