INCHŌḴ-OṘÔ 7
7
1Kūön chu, haköp ṙô chu halinngen në chöngö chu inrē in meh;
2Haköp në chöngö chu ngaich ngöh aṅ, haköp në inköphöti aṅ in chu nö sā ellōn mat meh;
3Nyëkngö u i kuntī meh, kūichö u i mat tö mitāk ihong ellōn meh.
4Ngö ṙô tö mikah, Kanānö chu mana, havëkö öp mikah elmat nö milālö hol meh;
5Nö mahaköpö meh ṙā-ang i tö tayōla kikānö, ṙā-ang i kamlah kanihngen tö faṙëcha ṙô.
Ngam Tötlēn Kikānö
6I lökhöt öp kuföt inkūp öp patī chu, môknyökūö re chū-ö löknyö nup tö supānö nyatkūö inkūp,
7Ngaich meuk yik töt akaha, meuk aṅ in yik ṙālö inrē, öp tarik hĕng tak tötmikahavö,
8Nö lökngö el talöökö ranghö sinkeukngö chūök öp kikānö, kāntöre nö i talöökö öp patī ò,
9I chinṙīv tö harap, hē hatööm sinngūlö inrē.
10Yĕh meuk, höngkūö ò ök hĕng tak kikānö, inyuttö inyut mi-inyihköre, keūṙö ellōn.
11Pōitô anga-aṅ karöönaröön inrē, öt köpö elröön anga-aṅ nö el patī;
12El talöökö töngamuh, i chūök mi-inyih töngamuh; keuheūt sinkeukngö anga-aṅ inrē nö höng.
13Kē an ngaich anga-aṅ ngaich hamkūö ò, öt sirōngkūö inrē nö ngö ṙô tö ò;
14Hòṅ kētö tökētu chin, ngaich taheui öich kētö tö chūöku ṙô re;
15Lökten chin kunyī-inyre höngkūö meh, kalē-ĕlōn chöhö meh, ngaich öich kôtökūö tö meh.
16Ngaich chin haṙēhtö el chamam re öich hanyöṅtö e, tö mirunmat aṅ Aikup linen haṙĕhtu nö ngaich;
17Ngaich chin tumhuṅslö el ap chamam re tö mūr, alō, sinamon inrē.
18Tā-a, tai hatööḵngen hanāngenre söllö peuheū; tai kumchikngen re i hanāngenlōn.
19Tön öt i patī öp pīhö chu; ngaich ök nö marô-òlkūö kinröönngö;
20Kēkö inyul rupīö re öku nö in ò; ip soho öp min nö yih nö i patī.
21Ngatī inṙöi ṙô anga-aṅ nö mileūchö ṙô tö ò; līpan anga-aṅ nö holtö ṙô töfaṙëcha.
22Ilööṙen ngaich anga-aṅ nö tömrit ò; sā öp kōiny nuā nö kiröönngöre nö i ṙamatnyö likeun, hēk sā öp sistek nö köp nö kô-òng vah.
23Hanöng saha öp chòk nö tanhötkūö; sā öp chehechōn tameungtöre nö el tinngöp; öt akahalōn anga-aṅ tö e min nö tö ṙāi tö nômö ò.
24Ō kūön kikōnyö hangihtö ṙô chu töngamuh, kūötenre inrē tö në ṙô elvāng chu.
25Um hökngen ellōnre nö kānngöre nö i talöökö ò, um lō-ongkūö el kanröönö ò,
26Tön ngaich an nö maṙôngö pôḵ tö töhulalhaka; hôṅ, ṙòkhöre yip pôḵ ò nö maṙôngö tökalēḵ.
27Talöökö Chūök Tökapah ap patī ò, kū-ötö lā taṙeū el nup urôhò kinpaha.
Currently Selected:
INCHŌḴ-OṘÔ 7: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
