INCHŌḴ-OṘÔ 6
6
Tö Pōyen Finëḵlö/Inlēnö
1Kūön chu, yē meh ṙënngö ṙô öp holre, öm kilēḵngôre ṙënngô aṅ tahëng;
2Yē meh tingöpö tökūö ngam ṙô re, ngaich kô-òngvah iṙô ngam elvāng meh;
3Kūön chu, hayöölen re me-eṅ la-evṙen tö ngih, tön ngaich man el minhôiṅyö ngam holre: kuṙòh, ka-eūyen, mileūchen havë-a ip holre.
4Un haṙòh ngam mat meh um paleūmköti mat hòṅ haṙòhlö inrē;
5Hayöökenre mana sā kasēl ip mahacheūḵ, sā chehechōn nö ṙā-ang eltī öp tumngöp.
6Aō töṙahata, kuṙòh chuh i talkeuch; ngëichkö talöökö ò, ngaich akaha pömchö.
7Öt mā-avkūö ana, öt yöngṙenvö, hēk öt mahayöngu,
8Hamūl nyā-aṅkūö re an tö el sikehngö, hē el kanöinyòng inrē nö hamūl anahare.
9I rô-òten öm min hulalhaka umuh, Aō töṙahata? Ĕhē öm choholre ṙā-ang im inṙôhò?
10Rahëich tamat haṙòh, rahëichtaṙen pinleūmö mat, rahëichtaṙen heūheure kirup këlre,
11Ngaich ngam yanāchö min nö yih nö in meh sā öp famalngöre, öp neūkö inrē sā tarik tö aṅhavtī kumyung.
12Ngòh töt kanôlu ṙô tarik, ngòh tötlöök tarik, havötköre kumtö tökuròk ṙô,
13Nyichkö matre, kufiöröönre, sōka tö kuntīre,
14Holtö töchōich ellōn re nö vīlö tötlöök, iṙūöhen nö teūchtö inrēvö;
15Lökten nöng vuphë yanīhi ötkanôlò nö i kui ò; laköli ngaich anga-aṅ nöng öt rô-òtuṙen öt lanë-enṙen ngaich.
16Tafūöl nup surīkhö ngam Mā Tēv, sat nup sin-òṅkkūö Ò:
17Tunlēchngö mat, litāk töminyôny, kël inrē kumtaknyö mahām töt akahaṙa,
18Ellōn mahalēnlö tötlöök, kalröön tökuraten nö fal i tötlöök,
19Ngòh samūichkö holre mu-uhômnyö minyôny-aṅ, tarik inrē tameūichtö inrēvö nö i holre.
Finëlö Im Insēha/Inlēnö Ma-asēha
20Kūön chu, haköp chöngö ngam yöngre, un ṙā-ayö inköpö tö meh töm yöng meh kikānö.
21Kapòkngö u ellōn meh örheūheu; nyëkngö u inrē i likeun meh.
22Yē meh kiröönngöre, hachōkūö meh anū-ö min; yē meh hulalhaka, aṅten meh anū-ö min; yē meh inrē aṅhen, vë-ekūö meh min anū-ö.
23Pò ngam chöngö nö ëāṅvö hanātö inrē öp inköphöti, inmeuktö hinang chöngö an ngam talöökö nômö meh,
24Nö mahaköpö meh i tötlöök kikānö, i tö faṙëcha litāk öp kamlah kanihngen.
25Um lōntö vanāyö ò ellōn re, um hökngenre kô-òngvah tö tī ò nö mileūch mat re;
26Pò ngòh mi-iyihköre kikānö nö kô-òren nöng ṙātö töhĕng rôti, ngòh ma-asēha pöri kikānö hayun nômö tarik.
27Kô-òren ang ngòh tarik nö elngòhre kum tö tameūyö nö öt ökngötī tö inyutre?
28Hēk hĕng tak hòng tö kô nö lökkūö töṙāch ta-ök tameūyö nö öt tafööṙö elröön?
29Ngatī ön ngòh chamuh i pīhö holre; öt hĕng tak lamūölken ò min tötfaluṙen.
30Röh aich vē tarik nö miyëḵ tö mu-ulāya yĕn ulāya nö hatööḵngen re yĕn aheuk?
31Ngaich yē ò nö kôti, sātö ṙënngen tī min anga-aṅ; keuheūttö nup chehen re min anga-aṅ el patī re.
32Töt akaha ön ngòh ma-asēha; famëlngöre ön anga-aṅ tö ngatī la-en,
33Teūngen an tö vah minṙēngö inrē, öt sīchiyö min öp minṙēngö ò.
34Vīlö tanānyö tarik an ngam kumnyahṙen, ngaich öt ṙā-al re min anga-aṅ yĕn havahalre.
35Öthō min anga-aṅ tö ṙënngen fālen, ötrēhĕn nö hanlāmen pòrô öm pōyen tī tö raneushö.
Currently Selected:
INCHŌḴ-OṘÔ 6: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
