INCHŌḴ-OṘÔ 5
5
Finëlö Im Insēha Inlēnö Ma-asēha
1Kūön chu, kūötenre tö ngam mikah aṅ in chu, asītö elnang re i mikah elmat aṅ in chu;
2Hòṅ meh haköp mikah el mat, minë minuh meh inrē nö aṅtö mikah.
3Pòn tö katāka hönī nup minuh ngòh tötayōla kikānö, mötlö finṙëchö inrē ap ṙô ò tö tavī-i;
4Ip lā-unôich pöri anga-aṅ nö angū-öṅvö tö chōn tö-angūövö, keut sā tö-aṅlākūö sanët.
5Kū-ötö im kinpaha nup röön lök el kanröönö chūök tökapah nup vanāngö ò;
6Öt kūötenre anga-aṅ tö talöökö nômö; tayôyi talöökö anga-aṅ, ngaich öt akahakūö tö e.
7Ō yī-ö nyīö, hang ṙô chu töngamuh, ui kē-ĕngre inrē ṙā-ang minë ṙô el vāng chu.
8Ṙūöngö talöököre man marôvat tö ò, um haröhtöre i inkūp öp patī ò;
9Hòṅ meh öt kēngö ineū-euṅre i tahëng nup samyeūheu meh inrē nö im töt aṙē-ĕlōn;
10Hòṅ yip aṅ tahëng nö öt hatööḵngenre tö kumlēḵ meh, nup la-en meh inrē nö chuh patī aṅ tahëng;
11Ngaich aluhure min me-eṅ ip manā-aṅ nômö meh hē nup alaha ngam alaha meh inrē nö keuheūt,
12Ngaich ngö ṙô me-eṅ, Yöng inlahen chu surīkhö hinang chöngö öt chumkūöṙen inrē ellōn chu tö vinëköre.
13Öt hang ṙô mahaköptöre chin hēk öt asītö elnang re i ṙô mahaköptöre.
14Ngaich chin lā im öt kanôlò el manūlö tömaṙôngö.
15Òk el chūök makre man töhëmlö aṅ el öp tö-ūlö mak meh.
16Höng hökiṙen ṙöng nup töhëmlö mak meh nö parāti chūök, nö töhhaka mak el talöökö?
17Hökngen u nö kanahngen meh, un in yip aṅ tahëng inrē in meh.
18Hökngen ngam löklö mak meh nö tökôlò, ṙamölōn inrē me-eṅ ip pīhö meh tö-ayal,
19Ngòh tövai hāin, tölöök tō. Hökngen ap hanāngen ò nö hatööḵngen meh nö örheūheu holtö kumchiklōn, hatööḵngen öp hanāngenlōn in ò örheūheu.
20Kūöyòh ṙöng öm hatööḵngen hanāngenlōnre, kūön chu, i tö tayōla kikānö fūöl elngòh ngam kamahanglōnre inrē kikānö?
21Pòn i kūö ngam Mā Tēv nup talöökö ngòh tarik, meuk nup kanröönö ò anga-aṅ nö ṙòkhöre.
22Tingöpan nup öt lanöökö tötlöök, kô-òngvah inrē anga-aṅ nö i la-en tökööl re.
23Kapah anga-aṅ pòn öt hang chöngö, chatngen ngaich kūö yöng kumlō-ovre.
Currently Selected:
INCHŌḴ-OṘÔ 5: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
