INCHŌḴ-OṘÔ 29
29
1Anga-aṅ ngòh töṙöpen nö vëka, sön nö hakehngö likeun re höng lūk min nöng ohngö nö öt hanlinken.
2Yē ngòh tölöök nö hayöng ṙāmölōn yip tarik; yē ngam tötlöök pöri nö hayöng, aluhure yip tarik.
3Anga-aṅ ngòh töhāngenlōn tö mikah ṙāmölōn tī tö yöng re, anga-aṅ pöri ngòh mahanôl kikānö mī-inyihköre mëichngö inlānen.
4Köpötī ön ngòh rācha tö panam lökten i kinṙôka töt michūṙen, payāyi tī pöri tö e öp mahateung raneushö.
5Hanyāknyö inhāṅl öp tarik öp maharōi holre nö i röön ò.
6Tingöpöre ön ngòh tötlöök tarik nö i tanôichngenre, ṙāmölōn pöri ngòh tölöök tarik nö tikökṙôre.
7Akahalōn ön ngòh tölöök tarik tö mikahlōn yāich; öt akah tö ngatī mikah pöri ngòh tötlöök tarik.
8Föngtökūö elpanam yin vē tömināich, hapungngöre pöri tö-akaha tarik tö lanīnö.
9Yē ngòh tö-akaha tarik nö lā-al ṙô tökulō-ovö, ngaich ngam tökulō-ovö nöng tainy hayīölkūö inrē, öt chanëvuvö ngaich umuh.
10Surīkhö töfaluṙen yin vē tarik töyal tö mahām, chöh nômö ò inrē ngam tötlöök.
11Kētö talöökö tanānyö an ngam tökulō-ov, ngam tö-akaha pöri tarik haṙēmngenre nö ma-īnö e.
12Yē öp mahayöng nö hang minyôiny-aṅ, ṙòkhöre min yip mā in ò nö ötlöök.
13Meukkūö höö nan töm yāich tarik töm mahakihten inrē; kētö hanātö mat cha nyöre ngam Mā Tēv.
14Yē ngam rācha nö ṙōngö tī nö kahòkken yāich örheūheu min ngam kantēra ò nö köp.
15Kētö mikah an ngam chinökṙen vinëkö inrē, ngòh nyīö pöri töng kanahngenre nö hökiṙen kētö sumrōngkūö nö i yöng re kikānö.
16Yē tötlöök nö hayöng, ṙūöhölre ṙôken tanôichngen; meūkkö fanukngö cha pöri min tölöök.
17Vīten öp kūön re man nö haköp chöngö, ngaich me-eṅ min heūheure tö tī ò; kētö kumchiklōn meh min anga-aṅ.
18Yĕn rö-övö vinë-eny mu-unôich ngaich yip tarik nö kavalngö ṙināpöre, tökôlò pöri anga-aṅ öp mahaköp chöngö.
19Ötköp an tö chöngö ngòh tarik mahalanṙen tökūö töng ṙô, pòn pòrô nö akaha elmat, öthōḵ anga-aṅ nö chumkūöṙen.
20Meuk tarik öm ṙung tökurat nö i ṙô re? Mötlö ap mineūka ti tökulō-ov töp in ò.
21Anga-aṅ ngòh tö löktökūö nyinī-öṅ tī nö harun tarik alahare, ip manā-aṅ min nö kôtökūö tö ò nö tö-amīnu nö in ò.
22Ngòh tölīn tarik harunlö linā-alkūö, ane inrē ngòh tarik tötany pōyen tī tö töchōich.
23Tumṙeūtu, ön min ngòh tarik tö inkeūlen re, anga-aṅ pöri ngòh töyāichö ellōn teūngen min tö ineū-eu.
24Surīkhö nômö re ön ngòh mahanôl mu-ulāya, hang rinūtngö vah an, öt hameuktö e pöri.
25Ṙātö tinngöp an ngam pinhë-eṅkūö tö tarik, anga-aṅ pöri ngòh mahayönglenre nö im Mā Tēv öt pinlāḵnguṙen.
26Pōyen yip chamöh neukhöre nö i mahayöng, im Mā Tēv pöri ngòh tarik nö teūngen tö kinṙôka töt michūḵṙen.
27Sin-òkkūö tölöök ön ngòh tarik tötchiplö, anga-aṅ pöri ngòh töchiplö tölöökö sin-òkūö tötlöök.
Currently Selected:
INCHŌḴ-OṘÔ 29: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
