INCHŌḴ-OṘÔ 28
28
1Falngöre ngòh tötlöök yĕn öt hĕng tak lamū, sā lāyön pöri ngòh tölöök nö öt pa-ekūö.
2Yē panam nö tôichngen maṙôngö mahayöng angū-ö, i tarik pöri tö-akaha elmat tö-akaha inrē köp min angū-ö nö marô-òten.
3Ngòh yāich tarik mahakihten yāich sā ngih kumṙah töchahūköti nö öt ṙātö nyā-aṅkūö.
4Yip ṙamāngö chöngö ha-öiny tötlöök yip mahaköp chöngö pöri pītnyöre nö lā-al cha.
5Öt akahakūö vē tötlöök tarik tö kinṙôka tötmichūṙen, yip chamöh ngam Mā Tēv pöri keuheūtlöre mikah kūö tö e.
6Ĕhten ön ngòh yāich tarik lamök i mikah re tö ngòh tökôlò tarik töchōichö talöökö
7Tö-akaha ön nö kūön ngòh mahaköp chöngö, sumrōngkūö yöng re pöri ngòh nôlö töpōivat.
8Ngòh ṙamūöhten kanôlò re lökten i ṙāi inṙūöngö ṙinūhöl ṙôken inrē hamūlö e nö in ò öp tö-aheūkölōn tö yāich.
9Yĕn hĕng tak mahapungngö elnang re tö hināngö chöngö, pòrô öp invë-a tö ò ngaich nöng sin-òkkūö.
10Anga-aṅ ngòh mahalō-ongkūö töchiplö nö el talöökö tötlöök suktöre min nö el anūlö öp ahul ò; ngòh töt fāluṙen pöri amīnu min tö tölöök.
11Tö-akaha ön tölōn re ngòh tökôlò tarik, ngòh tö-akaha el mat pöri yāich tarik kôtikūö min tö ò.
12Yĕn mihôiṅ ngòh tölöök, yöng ineū-eu ò ap umuh; yĕn choholre pöri ngòh tötlöök, hayunngöre ngaich tarik.
13Anga-aṅ ngòh mahayunngö tanôichngenre öt kôlòṙen min, anga-aṅ pöri ngòh mahalööknyôre ṙāngö u inrē teūngen min tö miṙēlōn.
14Tökôlò ön ngòh tarik ngòh tö-örheūheu nö pa-ekūö töm Mā Tēv; ngòh mahangëḵngö ellōn re pöri fuk el kanihngen min.
15Sā töpōitô lāyön hēk për sumṙöp ngòh tötlöök mahayöng i kui yāich tarik.
16Ngòh mahayöng töhāṅten tö mikah elmat töt milēḵ nö mahakihten; anga-aṅ pöri ngòh tösumrīk tö tötlöök taneūngen marô-òten sakāmö min.
17Yē ap tarik tölangan tö mahām holre, hökngen ò nö tökatūöyaṙen söl kinpahare, un hĕng tak hamòlṙen ò.
18Anga-aṅ ngòh lamök i mikah ṙānyuvö min, ngòh töchōich pöri nö i talöököre fuk el anūlö min.
19Ngòh amul tumlat re pōyen nyā-aṅkūö min, anga-aṅ pöri ngòh famchū töt kanôluṙô pōyen yanācha min.
20Pōyen inkôlò an min ngòh tökô-en tarik, anga-aṅ pöri ngòh tökurāten nö hòṅ kôlò öt hō min nö kiröönngöre nö öt sācha.
21Töchōich an ngam inmeuktö intölten; vaich pöri nö kô-òren ngòh tarik tökūö töhĕng mufôkö nyā-aṅkūö.
22Ngòh tömilip tarik kurāten nö hòṅ kôlò, ngaich öt akahalōn töp neūkö min nö yih nö in ò.
23Ngòh vamëkö tarik unôich min nö kôtökūö tö töpōyen neūkölōn möthë tö ngòh maharōi nö litāk re.
24Ngòh mu-ulāingen yöng re kikōnyö hēk yöng re kikānö nö ngö ṙô, Öttanôichngen an angū-ö, nôlö tarik an anga-aṅ öp famëlhanga.
25Harunnyö linā-alkūö ön ngòh töyal tarik, ngòh mahayönglenre pöri nö im Mā Tēv ṙūölöng kanôlò min.
26Tökulō-ov an anga-aṅ ngòh mahayönglenre nö i ellōn re; ṙānyu pöri min lamök i mikah.
27Ngòh kamë-eṅkūö yāich öt hāṅten min, ngòh mahanyatngö matre pöri pōyen taneūngen min tö rinūtngö vah.
28Yĕn choholre ngam tötlöök, hayunngöre vē tarik, yē cha pöri nö kapah, ṙūöhölre ṙôken tölöök.
Currently Selected:
INCHŌḴ-OṘÔ 28: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
