INCHŌḴ-OṘÔ 30
30
Nuk Ṙô Akūr
1Në ṙô Akur kikōnyö kūön Yakeh aṅ Masā. Ngö ṙô ök tarik nö in Itī-ĕl, in Itō-ĕl Yūkal inrē:
2Kô-òngrit chin chū-ö töyahngö kulō-ov öich tarik. Öt aṅhaṅv-in chin tö mikah elmat tarik.
3Hö-ö chin haköp mikah, öt rēhĕn akahakūö tö ngam Töhet Töhĕng.
4Chiāp tö ngaich nö yônlö nö el halīöngö ngaich yôntī? Achiāp mahamūl ngam kuföt nö eltī re achiāp mahaṙung minë mak nö el hilā? Achiāp mahaköpngö në manā-angkūö ngam tumlat? Achiāp minë-eny ò, achiāp inrē minë-eny ap kūön ò? Akahakūö man me-eṅ!
5Hameuktu nup nö kô-en ṙô ngam Tēv; lanaklö cha an yip mahanyathötre nö in ò,
6Un ṙūöhtu hol nup ṙô ò, hòṅ meh öt vëka tö ò, kôtī inrē öm töminyôiny-aṅ.
Tö hēk Inchōḵ-oṙô
7Nët nup havëkö chu in meh; uh öich öt teūngen tö u urēhĕkūö chu kapah:
8Marôvat tī ṙūöngö minyôiny-aṅ tö minyôiny inrē; uh chin rēhĕn kētu yanāchö un rēhĕn kanôlò; ha-aṅlen chu tö nyā-aṅkūö öp töng kanô-òngkūö chu,
9Hòṅ chu öt tööḵngen, ngaich mahngen meh öich ngö ṙô, Achīö ang ngam Mā Tēv? Hēk hòṅ chu öich öt kôlò, ngaich ulāya, hachōichngö minë-eny ngam Tēv re inrē.
10Un vë-eng nang mahalanṙen, in öp yöngṙen ò, hòṅ ò nö öt rūtngövah meh, ngaich me-eṅ töfāluṙen.
11Ramūtngö vah yöng re yip umuh tö kikōnyö hakôlò yöng re inrē tö kikānö.
12Töhet yip umuh nö i matre hö-ö pöri nö ahetlö mum re.
13Umuh yip–yöng rô-òl chūök mat cha, yöng rô-òl chūök nup maneuichngö mat cha nö hachônglöng.
14Umuh yip tösā sanët kanap, yip tökanāpu tö sakū, ngameūṅktö yāich ṙā-ang i kūö ngih tumlat, yip töhāṅten in vē tarik.
15Nët maneuk kūön ön ngòh minyôkö tö kan; Kē-ĕtī, Kē-ĕti, ṙô u nö hū-a. Lūöi nup töt hētu nö tööḵngen; fën töt hētu nö ngö ṙô, Ṙā-alre chin ngaich:
16Ngam Chūök Kupah, ngam töt mikūönlö chūök kanūönö, örheūheu ngam tumlat nö haṙëhe nômö tö mak, öt hētu inrē ngam tameūyö nö ngö ṙô, Ṙā-alre chin ngaich.
17Ngih mat mahayëḵngen yöngre tö kikōnyö mumnônngö chöngö yöngre tö kikānö inrē sôki min tö nup kavöö nö el achāṙö kā-a inrē tö nup matēṙö.
18Lūöi nup töyahlö pinngangkūö nö in chu; fën öt mikah elmat chu:
19Talöökö ngam matēṙö nö el taṙul, talöökö ngam pēch nö i kui ihong, talöökö ngam chōng nö el ngam tökiröng mai, talöökö tarik inrē nö i rēlö.
20Ngih ön talöökö ngòh kikānö tö asĕhka: nyā an, chūt kūöre inrē, ngaich ngö ṙô, Hö-ö chin chanôichuṙen.
21Kayīna ngih tumlat el katòh nup tölūöi; ötkô nö keun nup töfën:
22Öp kaitī yē ò nö rācha, tökulō-ov inrē yē ò nö tööḵngen tö nyā-aṅkūö;
23Öp kikānö töt hanāngen yē ò nö teūngen tö pihöre, öp rēlö inrē yē ò nö i chūök öp yöngṙen re kikānö.
24Lūöi nup ing panam tökūöṅnö, töyahlö mikah pöri anū-ö:
25Në talkeūich töt kalēḵ nö tarik, sön pöri nö meukṙen nyā-aṅ kūöre tö el sikehngö;
26Në kitēvö tötkalēḵ nö tarik, sön anū-ö nö vī patī re nö i kaha ihong;
27Öt rāchavö në hāyö, sön anū-ö nö ṙāköröön nö kiröönngöre;
28Kô-òren me-eṅ kēḵ michākö eltīre, sön anū-ö nö el patī rācha.
29Lūöi nup, nup tö mā-aṅ kinröönngö; fën tömā-aṅ kinröönngö:
30Ngam lāyön, tökalēḵ kūö töṙeūla töt hameūheulre nö i kūö töng sitih;
31Ngòh tamyeūlö hayöm, tö ngam kōiny pököre, tö yip rācha inrē kumröönngöre urēhĕkūö yip tarikre.
32Yē meh sin tökulō-ov, öm hapōilöre, hēk yē meh sin vamīken, tötlöök, tilupngökūöre man tö eltīre.
33Yē meh kicheūchnyö aṅteh ngaich tööi angū-ö, kōk ngam elmeh ngaich mahāmu angū-ö, yē meh vīlö tanānyö, kihngen min me-eṅ.
Currently Selected:
INCHŌḴ-OṘÔ 30: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
