INCHŌḴ-OṘÔ 26
26
1Sā tacham tökënngöre hē inmūlöṙòng ngatī nö öt tölöök ngam ineū-eu tökulō-ov.
2Sā ngòh röchö nö kiteū, sā kinteūṙö likup inrē, öp rinūtngö vah töt chööḵnyu nö öt teungtöre.
3Fanòh i kōra inkāl elvāng i köttö, tinkung inrē i uk tökulō-ov.
4Un sapṙô tökulō-ov nö sā ngam kumlō-ov ò, hòṅ meh öt sā ò.
5Sapṙô ngam tökūlō-ov sā kumlō-ov ò hòṅ ò nö öt akaha tö lōnre.
6Ngòh samöömngö inhānga nö lökngö eltī tökulō-ov ramökngö kalröön re òk chanökhuṙen inrē.
7Sā kalröön tökaròk tarik, öp töng kalöla nöng öt kôlò, ngih inchō-oṙô elvāng tökulō-ov.
8Sā öp töhĕng tak nyamëk ihong chinvil anga-aṅ ngòh ameū tökulō-ov.
9Sā öp töchökhukūö eltī mihīyōi-aṅ öp inchō-oṙô elvāng tökulō-ov.
10Sā öp lumreny tökeuheūtngöre hanyahka anga-aṅ ngòh mahaṙāi tökulō-ov töng chamööḵ-anga hēk mihiyōi-aṅ.
11Sā öp am mahavantöre i kuvavre ngòh tökulō-ov töng iṙūöhen nö i kumlō-ov.
12Meuk tarik öm ṙung tö-akaha tö lōn re? Maheūṅkku ön ngòh tökulō-ov tö ò anga-aṅ.
13Ngö ṙô ön ngòh töṙahata, Lāyön ap umuh el kanröönö!
14Takīöka ap inkūp nö i nup tinkīök re ngatī ngòh töṙahata nö el chaman re.
15Chiṙimtö tīre ön ngòh töṙāhata nö el pingāṅl cheiyö tī angū-ö tö ò nö hanyöplö kūöre.
16Tö-akaha ön ngòh töṙahata tö lōn re tö tösat tak tarik töhuveū-euṙô nö sapṙô.
17Anga-aṅ ngòh töng kamaptöre i linā-alkūö nö öt kanahngen ò sā kamë nang am töng chamööḵngöre.
18Sā tö katūöyaṙen tarik kamvaltö töhūkūö tameūyö chòk, kinpaha inrē.
19Öp tarik mahachīl holre nö ngö ṙô, Höng minôn chin!
20Nyangngö an ngam tameūyö yĕn öt ngôhòvö; i chūök öp töhiṙeūtka ṙô inrē, ṙātöre linā-alkūö.
21Sā nup ta-ök nö ṙāchhöt töp tisum ngòh inrē tötameūyu kūö, ngatī tarik chöng lamā-alkūö nö tōttökūö linā-alkūö.
22Sā tökuchik nyā-aṅkūö në ṙô töhiṙeūtka; meuthöt anū-ö keuheūtngöre chūök nö el alaha.
23Sā lanūöp tölūöptu nö i ṙòng tanīöyö në töfaṙëcha minuh tö-aṅhav ellōn tö tötlöök.
24Anga-aṅ ngòh tösumrīk, kavē-ĕre nö i munuh re hachūöklö michīl inrē nö ellōn re;
25Yē ò nö aheūkölōn ṙô, un ṙātö ellōn re in ò, tön sat nup sin-òkkūö ellōn ò;
26Pòrô nö hanyati öp sunrīkhö tö ò, hameuknyu min nö i tömaṙôngö öp öt lanöökö ò.
27Ngòh amul anūlö fukngö min nö el e, havan an min ngam ihong nö in ò ngam pumlönö e.
28Öp tö minyôiny-aṅ litāk kunyaha elmat tö yip pôre, öp elvāng inrē maharōilô vītö pinlāngen.
Currently Selected:
INCHŌḴ-OṘÔ 26: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
