INCHŌḴ-OṘÔ 25
25
Tö Ōtngöre Inchōḵoṙô Sòlòmön
1Inchōḵoṙô Sòlòmön nun në, në tö kūichiyö asā kinūichö yik tarik ök rācha Heskīā aṅ Yutā.
2Ineū-euṅ ngam Tēv an ngam innyathanga, ineū-euṅ rācha pöri chinöhö.
3Sā minë halīöngö nö marô-òl chūök, ngam tumlat inrē nö aṙū-uti, ngatī öp ellōn vē rācha nö töt chanöhen.
4Kēngö ngam yeich im rupīö, aṅhavtī an inrē ngam ramöm nö ip chūökṙenre;
5Kēngö ngam tötlöök ṙā-ang i kūö ngam rācha, ngaich köp min ngam kantēra ò im lanöökö.
6Uh man halāḵnyöre i kūö ngam rācha hēk sökhaka i chūök tökiröng;
7Pò e nö ĕhten yĕm tölöṙô, ṙūöhölre tā-ih ĕhten tö meh tumṙeūtu i kūö öp kūön rācha, Nup maheuṅk minë mat meh.
8Um ilöö kētu el chūök kinṙôka; sitih inlahen ṙöng öm min ip manā-aṅ, yē öp hol meh nö sumrōngngö kūö meh?
9Hakôtôre man ip holre töp fālen, ane inrē un hameuknyu öp hayunken tahëng;
10Hòṅ ò öp hamang ṙô meh nö öt sumrōngngö kūö meh, ngaich öt chanuhuvṙen öp tötlöök ineūkö meh.
11Öp ṙô tölöökö kanaknyi sā öp ṙòng chōn i humlum nö chūök tö rupīö.
12Sā humlum kinlong hēk yanöṅtö humlum ngòh tö akaha vamë-a nö i elnang hamang.
13Sā öp tö-ufōv tacham tökënngöre hē el inmūlö ṙòng ngòh tökô-en ma-ahānga nö in cha yip tamīnngen ò, hangëṅlö ellōn yip yöngṙen re anga-aṅ.
14Sā në taṙul kuföt inrē töt kumṙahav röön ngòh tarik ameū raneushö nup töt kahëtö ò.
15Holtö manöinyö ngòh mahayöng nö vamë-eṅkūö, öp tötngëḵ litāk inrē lakölö tī min tö tangëḵ.
16Yē meh kôtökūö tö hönī, ip ṙôkvat re me-eṅ nyā-aṅ e hòṅ meh öt yaha ṙôkvat ngaich kuvavlö e.
17Uh man ṙöpö röön i patī ap holre, hòṅ ò nö öt uhā-en tö meh ngaich surīkhen meh.
18Ngòh tarik ngòh samūöichkö holre sā laneh aṅtī kumyung, hēk sanët, hēk chòk tökeut.
19Hayönglenre i töt kô-en tarik hē el kanihngen sā chanökö kanap hēk tö taleūsi röön.
20Ngòh tumkökṙôre i töhaṙivlōn sā öp kamëngö kinṙum hē el laneūchö, sā töhīkīölhu vāin inrē nö i kūö vah.
21Yĕn kapahare öp tökunyaha elmat tö meh, kētö nyā-aṅ kūö ò; yē ò inrē nö haṙëhe nômö, kētö òk ò tö mak;
22Pò meh min afônglö ta-ök tameūyö i kui ò, reushen meh an min ngam Mā Tēv.
23Kumtö kumṙah an ngam kuföt lā kapā anë inrē öp litāk vamë-eng nang, tānyö mineūkö.
24Ĕhten an ngam inyöngö i sinkeukngö i kui patī tö el patī holtöṙah kikānö lamā-alkūö.
25Sā tö-ufov mak i töhaṙëhe nômö, ngatī öp tölöök inhānga ṙameū-eung tömarôvat panam.
26Sā tö tilīnu ël mak hēk tömūmu mak ngòh tölöök tarik hamökngenre nö i kūö tötlöök.
27Öt tölöök an ngam nyinā-aṅ höni öi pōivat, ngaich ṙālôre tö nöinyö.
28Ngòh tarik tötkô nö hayöngöre sā ngih elpanam tö taṙēhĕyö ṙā-ayö ngaich nö ötkinlōngu.
Currently Selected:
INCHŌḴ-OṘÔ 25: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
