INCHŌḴ-OṘÔ 24
24
1Un kunyāha elmat tö tötlöök tarik, un rēhĕn nö in cha;
2Pò nup ellōn cha nö halēn chanökhuṙen, kakkö tötlēn inrē nup minuh cha.
3Mānlöngö patī lökten i mikah, köp angū-ö inrē lökten i mikah elmat;
4Lökten i mikah nup urôhò nö tööḵlö tö tö pōi ṙāi kanôlò inrē tavai.
5Mötlö kumlēḵ ngòh tö akaha tarik tö tökalēḵ tarik, ngòh tarik tö aṅhav-in tö mikah mötlö tö ngòh tö aṅhav-in tö kumlēḵ;
6Pòn lökten tö akaha inchōkūö öm kô kiyung öp kinyūngö meh, i ṙôken mahalēn inrē öp minhôiṅyö.
7Yahlö rô-òl chūök an ngam mikah nö i ngòh tökulō-ovö; i kūö inkūp anga-aṅ nö öt vā-anykūö re.
8Anga-aṅ ngòh mahalēnlö tötlöök la-en kaheūkö min nö vamī töchōich.
9Tökööl an ngam vinī-il kumlō-ov, sin-òṅkkūö tarik ngam tö mināich.
10Yē meh cheingö ip sakāmö öp lā-al meh, kūöṅnen öp kumlēḵ meh.
11Kē-ĕ cha yip tökē-ĕ tö kinpaha; haköpö cha yip tö fukngö nö ip ṙamatnyö likeun.
12Yē meh ngö ṙô, yĕh meuk, öt akahakūö in tö e, öt meūkö e ang ngam kamlah lumngan ellōn? Öt akahalōn anga-aṅ ngam amahtö nômö yīö tö e, röh ang min nö havëkö e nö i tarik nö sā öp la-en ò?
13Kūön chu, nyā hönī, tön tölöök an, öp kintākö öp chūök hönī inrē nö pachāka kumchik.
14Akahalōn man tö ngam mikah nö ngatī ip nômö meh; yē meh kôtökūö tö e, mū-unôich min ap umuh, öt rökiṙen min inrē ap maheūkkö meh.
15Um sā tötlöök tarik hulahaka hayun öm i elyöngö tölöök un chökhuṙen tö patī ò;
16Pò ngòh tölöök tarik nö sat heuh nö fukngö, ngaich chōholre hēk; kavāli pöri min tötlöök tö pinlāngen.
17Un ṙāmölōn yĕn fukngö öp tö kunyaha elmat tö meh, un hökiṙen ap ellōn meh nö ṙāmölōn yē ò nö kavē-ĕre;
18Hòṅ öt meūkö e ngam Mā Tēv, ngaich kunyāhalōn, ngaich havööngökūö ngam tanānyöre nö ṙā-ang in ò.
19Un hakihten re tökūö tötlöököla-en, un kunyāhalōn inrē i tötlöök;
20Tön rö-ö ön ngòh tötlöök tarik nö mū-unôichu; hanyāngi an min ngam eāṅvö ngòh tötlöök.
21Kūön chu, pa-ekūö töm Mā Tēv ngam rācha inrē, un öt hāngö chöngö nyöre cha-a;
22Tön höng lūk öp min pinlāngen aṅ in cha nö chōholre, chiāp min tö akahalōn töp pinlāngen yamih nö ṙā-ang in cha nyöre?
Tö Ōtngöre Ṙô Mikah
23Anū-ö min në inrē ṙô tö akaha, Tötlöök an ngam intölten i inkaha fālen.
24Ngòh tö ngö ṙô tö ngam tötlöök, Öt fāluṙen man Öt lēkaṙen elnang min tö tarik, sa-òkhuvö tö pumnāmö tarik;
25Achā-a pöri yip vamëkö tötlöök kumchīkulōn min, i kui cha min inrē ngam tölöök inkôlò.
26Anga-aṅ ngòh tö chipô nö sapṙô hāmkūö minuh.
27Halēn la-enre el kahôyö, lēnö tī tö nup el panô-òṅ meh; unôich ngaich mānlö patī re.
28Um öt chööḵnyu vë-eny matre lā-al ngam holre, um hachīl inrē i minuh re.
29Un ngö ṙô, Sā tī ò chin min chū-ö nö in chu; kētö nup tī ngam tarik chin min nö in chu.
30Chööḵngö panô-òṅ ngam töṙahata chin taheui, ranghö panô-òṅ vāin öp töt akaha tarik;
31Yĕh meuk, ṙòkhöre nup tö chökhukūö nö marô-òlòng in e; keuheūtngöre ël ap tumlat tö tö chökhurōi, taṙöli inrē ap ihong kinlōngö e.
32Meuk chū-ö ngaich fēken e inrē; ngëcha chū-ö kēḵinköptöre inrē.
33Rahëchta mat haṙòh, rahëchta mat meuchngö matre, rahëchtatī kirup kël re heūheure,
34Kôlò min ngaich öp yanāchö nö in meh sā mu-ulāya, öp hanāten inrē sā tarik tö aṅhavtī.
Currently Selected:
INCHŌḴ-OṘÔ 24: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
