T. LŪKÖS 1
1
1Pòn maṙôngö yik tö ngaichtī nö kūich inlahen nuk töngaichngen kinheūṅti nö in hī. 2Nup kahëtö cha nö in hī, yik mu-urĕh mameūkö u, ane inrē mumkahten; 3Tölöök an, tö lōn chu inrē, öich töṙēmen mahaköp i ranëhel u, öich kūich tö līpöre meh, tölngö tö-akaha Tē-òfilös; 4Hòṅ meh akahalōn tö nuk tökô-en inköptö meh.
Ahangka Kinyôḵnyi Ang Yôhān Ök Vamôk
5Hĕng tak ök umuh kūönṙô, hē Hērôt nö rāchakūö panam Yahūti, Sakariā ök minënyö ò, lamā in Apīcha; pīhövö öku tö yik kūön Āròn, Ēlisöpet ök minënyö ò. 6Nëtre taka cha-a nö tölöök nö i kūö ngam Tēv, ötfāluṙen tö töchōich; lök i nup chöngö, ane inrē nup la-en ahōtö ngam Mā Tēv. 7Öt kūönu cha-a, pò Ēlisöpet nö tötmikūönlö; ngaich cha-a nö nëtre taka nö köiny.
8Ngaich nö ngö inlahen, hē ò nö ṙònghöichṙen tök la-en ò nö kūönṙô, nö i kūö ngam Tēv, ik hēre; 9Sā falngen la-en vē kūönṙô, anga-aṅ nö kuhēthötre nö ël ök töhet chūök ngam Mā Tēv: nö föng tötahūsa inrē. 10Ngaich më tömaṙôngö tarik nöng vë-ekūötēv nö elkahôyö hē ël finöngö nup tötahūsa. 11Ngaich hĕng taka ök ma-ahānga tömeūkö tö ò, aṅ im Mā Tēv, nö sökhaka lahāmö ök chūök finöngö tötahūsa. 12Röiyö alaha ang Sakariā tö matre nö meukkūö ò, ngaich nö pa-ekūö inrē. 13Ngö ṙô pöri tö ò ngam ma-ahānga, Um pa-ekūö Sakariā, tön hāngö ap ṙô meh ve-ekūöm tēv; kūönu ap min pīhö meh ang Ēlisöpet, Yôhan ap min minënyö ò. 14Ṙanāmulōn man min; maṙôngö min inrē yip töṙāmölōn tö finötnyö ò. 15Pò ò min nö töpōyö nö i kūö ngam Mā Tēv. Öt òk vāin ap min, ötrēhĕn nö òk ayëṅ. Tööḵlö ap min inrē tö ngam Töhet Fanöinylö, nö ṙā-ang ellōn ngam yöngre. 16Maṙôngö min yip kūön Israĕl mahavantöre nö im Mā, ngam Tēv cha. 17Lök kūö ngam Tēv ap min, nö sā inlahen Ēliya, im fanöinylö, im kanô-òṅ inrē; nö havantö ellōn yip yöng nö i yip nyīö, ane inrē yip tö-akaha; nö halēnken vē tarik, pòkūö ngam Mā Tēv. 18Ngaich ngö ṙô Sakariā tö ngam ma-ahānga, Sitih mikahkūö öich min tö e? Tö chu ngaich öich köiny ngam pihö chu inrē nö sööḵngö tö ṙētöre. 19Ngaich ngö ṙô ngam ma-ahānga nö sapṙô ò, Kēprīl chin kòl chu-ö, tösökhaka i kūö ngam Tēv. Ngaich öich tīntu öich ve-ekūö meh, ane inrē vë-eny nang meh tö në tölöök inhānga. 20Yĕh meuk, ngaich man min ötkô ṙô-òv, hanöng saha ap taneungtakūö u; pò meh öt ṙātö ellōnre i në ṙô chu, në töteūngen mīnö ip hē u. 21Ngaich më tarik nöng hökken Sakariā; pingangkūö yik inrē hē ò nö ṙòngmö ël ngam töhet chūök ngam Tēv. 22Kunyīhë anga-aṅ ngaich nö ötkô nö ve-ekūö cha; ngaich cha-a nö akahalōn tö ò nö meuk tötohtöre nö el ngam töhet chūök ngam Tēv. Höng iṙuhötī anga-aṅ nö fëikökūö cha; nöng ötkô nö ṙô-òvö. 23Ngaich hē nuk sakāmö kinheūṅten ò tö ök la-en ò, ngaich chuh patīre anga-aṅ.
24Keuheūthë angū-ö, ngaich Ēlisöpet nā röönngöre; ngaich taneui chumngëṅtö anga-aṅ nö hayunngöre, nö ngö ṙô, 25Ngati tī an ngam Mā Tēv nö in chu, töngamuh, nö ngëichtö kui chu, nö kēngö sumrōngkūö chu, i tarik.
Ahangka-Kinyôḵnyi Ang Yēsū
26Im tinfūöl chumngëṅtö, ngam ma-ahānga Kēprīl nö tīniyö nö ṙā-ang im Tēv, ip tö hĕng panam i Kelelī, Nāsaret ap mine-eny e; 27Ik rēlö tö mikahayö nö pīhö ök tö hĕng taka tarik, Yôsĕf ök mine-eny ò, lamökngörit Tāvit, Mariā ök mine-eny ök rēlö. 28Yihtöre anga-aṅ nö in ò ngaich ngö ṙô, Salām; me-eṅ tö-inlōntuvö; holtöṙah meh An ngam Mā Tēv; tökôlò man i tum tak vē kikānö. 29Hē ò nö meūkan, pōyen ranöiyö alaha anga-aṅ tö ngam ṙô; ngaich nö ngö lōn, tö sitih inlahen öngvö min ngih sinlāmö. 30Ngaich ngö ṙô ngam ma-ahānga tö ò, Um pa-ekūö Mariā; tön tö inlōntuvö man tö aṅ im Tēv. 31Yĕh meuk kikōnyö öp fahötnyö meh min, öp pirūkö meh ellōn meh; Yēsū öp min mine-eny Ò. 32Töpōyö öp min, ane inrē Kūön ngam Lamātulöng, invëkö Ò min. Kē-ĕvkūö öp min tö ngam Mā Tēv tö ngam kantēra ök yöng Ò, Tāvit; 33Hayöngken vē kūön Yāköp Öp min örheūheu; öt chanūhuvṙen min ngam pūlngö Ò. 34Ngaich ngö ṙô ang Mariā tö ngam ma-ahānga, Sitih öng min? tö chu öt akahakūö tö kikōnyö. 35Ngaich ngö ṙô ngam ma-ahānga nö sapṙô ò, Yih An min ngam Töhet Fanöinylö nö in meh; ane inrē ngam kanô-òṅ ngam Lamātulöng min nö hanyat tö kui meh; lökten min Öp töfötnyuvö, nö töhëtö invëka nö Kūön ngam Tēv. 36Yĕh meūkö Ēlisöpet, ap hanöngkisānö meh, pirūkö nyīö ap anga-aṅ inrē, nö i kanöinyöre; tinfūöl chumngëṅtö ò ön ngih öp tötmikūönlö ṙung tö ṙô. 37Pòn rö-övö nup ṙô ngam Tēv nö ötkanô-òṅvö. 38Ngaich ngö ṙô Mariā, Yĕh meuk ngòh kikānö kūön ngam Mā Tēv, Hökngen e yēḵ sā ṙô meh. Ngaich ngam ma-ahānga nö ṙāngen ò.
Chöhken Elīsöpet Ang Mëri
39Choholre ngaich ang Mariā, hē e, nö ka-eūinyen nö chuh ik panam i kui rôngö nö ip panam Yūtā. 40Kuhēthötre anga-aṅ nö el patī Sakariā, ngaich salāmö Ēlisöpet. 41Höng hangtöre Ēlisöpet tö ṙô Mariā nö salāman; ngaich ök nyīö ellōn ò nö tisôköre; tööḵlö anga-aṅ tö ngam Töhet Fanöinylö; 42Ngaich pōitô anga-aṅ nö ngö ṙô, Tökôlò man me-eṅ, i tum tak vē kikānö; ane inrē, tökôlò ap kūön meh ellōn meh. 43Sitih tal öng min nö in chu, tö ngam yöng ngam Mā chu nö yihtöre nö in chu. 44Höng hangtöre chu-ö tö ök ṙô meh salām, ngaich öp nyīö ellōn chu, nö tisôköre kūö ṙanāmölōnre. 45Tökôlò ön ngòh ṙamātö ellōnre; pòn hēṙu öp taneungtökūö nup ṙô ṙamā-ang i ngam Tēv.
Tikökkö Nöi-nyö Ang Mëri
(Tinkökö Mëri)
46Ngaich Mariā nö ngö ṙô; Ha-öiny Ha-öiny ngam Tēv ön ngih nômö chu, 47Im Tēv Mahayööken chu nö ṙāmölōn ngòh ma-alaha chu. 48Pò Ò nö môktökui ngòh yāich kūönre kikānö; lökten nö tökôlòṙô tö chu min, yip mu-unôichngöre yanīhih tarik; 49Pò ngam takeuheūttöre chöngö nö pōihöltī tö chu: töhet an ngam Mine-eny Ò. 50I tumö yip töpa-ekūö tö Ò, ap neūkölōn Ò. 51Hameuktö kumlēḵre An nö im këlre; yip mahakeūlen ellōnre ngaich nö pirātiṙen tö Ò. 52Kē-ĕyö yip rācha nö el chūökre; hapōilöng pöri vē yāich. 53Vē tökapahare hatööḵöiṙen tö nup tölöök chehen; tīnirit tö Ò vē tökôlò nöng öt kūmuṙen; 54Hayööken Israĕl An, ngam kūön Ò; 55Pò Ò nö sā ṙôre, i yik yöng hī, köpölōn tö ap neūkölōn nö in Aprahām, i vē kūön ò inrē nöng örheūheu. 56Ngaich ang Mariā nö lūöi chumngëṅtö nö höngngöh nö in ò; ngaich havantöre nö ik patīre.
Kinyôḵnyö Yôhān Ök Vamôk
57Ngaich ök hē finötö Ēlisöpet, nö teungtökūö, ngaich kikōnyö ök nyīö fahötnyö ò. 58Hāngö anga-aṅ tö yik holre, hanöngkisānöre inrē, tö ngam Mā Tēv nö pōyen neūkölōn nö in ò, ngaich aholtö ṙanāmölōnre cha-a nö in ò. 59Ngaich hē ngam hinëvhör sumkam, yihtöre yik tö hòṅ tunyinyngö ök nyīö; ngaich hòṅ kaheūkan cha-a nö Sakariā, nö sā mine-eny ök yöngre. 60Ngaich ngö ṙô ök yöng ò kikānö, nö sapṙô cha, Röön ngatī Yôhānö invëka an min. 61Ngaich ngö ṙô cha-a tö ò, Öt hĕng taka ap töngatī mine-eny, nö i yp hanöngkisānö meh. 62Hatöntöre cha-a nö ik yöng ò kikōnyö, töp mine-eny ò nöng minkahngu tī. 63Have-eti anga-aṅ tö chūöktīre nö kūich; ngaich kūichhöti anga-aṅ nö ngö tī, Yôhan ap mine-eny ò. Ṙòkhöre cha-a ngaich nö pingangkūö. 64Ilööṙen ngaich ök elvāng ò nö löpnyörekūö tayōlköny ök litāk ò; ngaich ṙô-òvö anga-aṅ, nö ha-öiny ngam Tēv. 65Ngaich pa-ekūö yik tömaṙôngö ramanghen ò; ngaich hāngö anū-ö tö taṙòkhöre mi-iyöng ik rôngö panam i Yūtā. 66Ngān höng ellōnre lōn yik hamāngö u, nö ngö ṙô, Tösitih tal angvöh min ngòh? Pò ngam eltī ngam Mā Tēv nö i kui ò.
Ṙô Sakarīa
67Ngaich ök yöng ò Sakariā, nö tööḵlö tö ngam, Töhet Fanöinylö, ngaich ngö ṙô anga-aṅ, nö ṙô-òvö tö aṅ im Tēv; 68Tökôlò An ngam Mā, ngam Tēv Israĕl: pò Ò nö ngaich nö meukṙen, ane inrē ṙānyö vē tarikre. 69Hachohlö tö kalēḵ An inyööken hī i vē kūön ngam kūön ò, Tāvit; 70Sā ṙô Ò tö nuk ṙô yik töhet pròfĕt: nuk töha-ëhelen hē ranehlö ngih panam; 71Inyööken i yip tökunyahaṅelmat; ane inrē i yip taṙòkhöre tösumrīk tö hī; 72Mahameuktö neūkölōnre i yik yöng hī; ane inrē tö köpölōn tök töhet kinlēḵngô; 73Ngam ṙô Ò nö kilēḵngôre nö in Aprahām; ök yöng hī. 74Nö kē-ĕti, hòṅ hī ṙānyuvö, ṙā-ang eltī yip tökunyahaṅelmat tö hī: öt pinhëṅ-eṅvkūö öi lök nup la-en Ò. 75Im hanëtö, im ötmichūṙen inrē, i kūö Ò: i rô-òtö në sakāmö hī. 76Me-eṅ nyīö havëka man min öm pròfĕt ngam Lamātulöng; pò meh min öm urēhĕkūö ngam Mā Tēv, öm halēnken talöökö Ò; 77Ve-eny ngam inyööken i yip tarik Ò; inṙē-ĕl nup tökööl cha; 78Lökten im tölngö neūkölōn ngam Tēv hī; ngam lökten ngam hanātö nö meukṙen nö ṙā-ang lātulöng. 79Inhatlömat yip amūichhaka nö el sinngūlö im kinpaha; ane inrē inchōköröön hī el ngam talöökö kumchikṙen.
80Pōyö ngaich ngam nyīö, ngaich kalēḵĕ ellōn; ngaich höng iyöng el-inchōn anga-aṅ, hanöng saha inmeuktöre nö i yik Israĕl.
Currently Selected:
T. LŪKÖS 1: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
