T. LŪKÖS 2
2
Kayôḵnyu Ang Yēsū
(Mt 1.18-25)
1Ngaich hē e ök chöngö ṙāmā-ang in Kaisöör Òköstös, hinôtö në taṙòkhöre panam nö kūichö tum taka aṅ kūö. 2Angū-ö an raneh kinūichö tum taka, ṙamā-ang in Kurēnias, hē ò nö mākūö Sīriā. 3Ngaich ṙòkngöre cha-a nö kö chuh panamre, nö kūichö tum taka. 4Chuh inrē, ang Yôsĕf nö ṙā-ang Kelelī, nö aṅ ök panam Nāsaret, nö chuh Yūtā, ngam panam Tāvit; ngam tö Petlihem invëka; pò ò nö ṙamā-angrit in Tāvit; 5Nö holten Mariā, nö kūichö tum taka, ök tö mikahayö tö ò, ngaich nö röhnyen finötö. 6Ṙòngmö in e cha-a, ngaich teungtökūö sakāmö hē finötö ò; 7Fötnyö ök lanòh kikōnyö ngaich anga-aṅ lömhang anga-aṅ tö ngam nyīö nö el hilā; ngaich haṙōlngen Ò, nö ël ök chūökkūö nuā; pòn öt chūöku cha-a, nö ël ök patī hameūheure.
Yōm Pököre Tö Yik Ma-ahānga
8Ngaich yik umuh amahtö pököre im panam, aṅtö nuk pököre tö el hatööm nö höngngöh, nö i chūökre nö ha-aṅhaṅl u. 9Ngaich ök ma-ahānga ṙamā-ang im Mā Tēv, nöng sökhaka nö in cha; ngaich havīlöng cha-a, tö hanātö kanôlò ngam Mā Tēv; ngaich pa-ekūö cha-a. 10Uh yin pa-ekūö, ngö ṙô ngam ma-ahānga tö cha; Yĕh meuk, tö chu öich kumtö tölöök inhānga ṙanāmölōn taṙòkhöre tarik. 11Kūö yīö, ap umuh nyīö töfötnyuvö tö taheui i panam Tāvit; ap Mā Kristū, Mahayööken. 12Ngih ön minkahngökūö yīö, Kôtökūö yin min tö ap nyīö, nöng lömtöhëich nö el hilā, nöng ṙōlhaka nö el chūökkūö nuā. 13Ilööṙen yip tömaṙôngö aṅ el halīöngö nö holtö ap ma-ahānga, na ha-öiny ngam Tēv, nö ngö ṙô: 14Kanôlò ngam Tēv yēḵ nö el halīöngö kumchikṙen nö el tumlat, hanāngenlōn nö i tarik. 15Chuhhë më ma-ahānga nö ṙāngen cha, nö chuh el halīöngö ngaich yik amahtö pököre nö ngö ṙô tö höö, Tā-a, töi chuh Petlihem, öi ngëichkö ngih ṙô töngatī; ngam ṙô ngam Mā Tēv nö mikahtölōn hī. 16Feus cha-a ngaich nö ka-eūiyen ngaich kôtökūö tö nā Mariā, nā Yôsĕf, höng ṙōlhaka ngam nyīö nö el chūökkūö nuā. 17Höng meuktöre cha-a tö Ò, ngaich ve-eny nuk vine-eny nangre tökūö ngam Nyīö. 18Ngaich ṙòkhöre yik hamang nö pingangkūö tö vine-eny nangre, tö yik amahtö pököre. 19Ngaich pöri ang Mariā nöng ellōnre lōn nö fēken u. 20Havantöre ngaich yik amahtö pököre, nöng ha-öiny ngam Tēv; pò nuk ahang cha, nuk maheuṅk cha inrē, nöng sā vine-enyre nö in cha.
Kētu Minënyi Ang Yēsū
21Tunyīnyih Anga-aṅ ngaich im hinëvhöre höiny sumkam Ò ngaich ök Mine-eny Ò nö Yēsū invëka; ngam töngatī ṙô ök ma-ahānga urēhĕkūö pinrūkö Ò.
Kinëhöt Yēsū Nö El-ök Töhet Chūök,
22Ngaich teungtökūö sakāmö hē cha nö ahetlöre, sā chöngö Môsös, kētuvö Anga-aṅ nö i Yerūsalem, nö hameuktuvö nö i kūö ngam Mā Tēv. 23Sā kinūichngö e nö im chöngö ngam Mā Tēv, Vē lanòh kikōnyö hōtu nö töhet nö im Tēv. 24Ane inrē kamëtö nup tökētu, nup ṙô ngam chöngö ngam Mā Tēv, Hĕng tahôl nup nyö-öṅ, hēkpī nët nòng kūön pumpa. 25Hĕng taka ök umuh tarik i Yerūsalem, Sumōn ök minënyö ò; tötmichūṙen ök anga-aṅ, ane inrē tö pa-ekūö tö ngam Tēv hamöngkökūö öp inṙamlōn Israĕl; īnu anga-aṅ tö ngam Töhet Fanöinylö. 26Ngaich anga-aṅ nö hameukhumat tö ngam Töhet Fanöinylö, töre nö öt hōḵ nö kapah, yē ò nö öl nö meukkūö ngam Mā Kristū. 27Kuhēthötre anga-aṅ nö ël ök chūök ngam Tēv, hachōḵhötvö tö ngam Töhet Fanöinylö; kēhötvö ök nyīö Yēsū tö nak yöngre, pòn hōtu nö sā fālngen ngam chöngö tī cha-a tö Ò; 28Kētam anga-aṅ tö Ò nö eltī re, ngaich ha-öiny ngam Tēv anga-aṅ, nö ngö ṙô: 29Ō Mā, sā ṙô Meh kilēḵngôre; ngatī tī, tīnngörit ngòh kūönre töngamuh im kumchikṙen; 30Tön kôtö mat chin, öich meukkūö ngam inyööken aṅ in Meh; 31Ngam halēnken Meh, i kūö vē taṙòkhöre tarik; 32Hanātö inmeukhömat yip tahëng mihëṅṙö tarik, ane inrē kanôlò vē tarik Meh Israĕl. 33Ngaich nak yöng Ò, nöng pingangkūö tö minë ṙô inlahen Ò. 34Ngaich ang Sumōn nö hakôlò cha; ngö ṙô an tö Mariā ök yöng Ò, Yĕh meuk ngòh nyīö nö töhōtu nö lökngen fanukngö ane inrē löklen chanôhòl i yip tömaṙôngö i Isarĕl; ane inrē minkahngö nö tö sōḵovö; 35(Fël ap min tö tafūnikūö tö ngam nômö meh;) hòṅ hameuknyuvö nup lōn vē tömaṙôngö. 36Hĕng taka ök umuh inrē Anna, pròfĕt nö kikānö, kūön Fënu-el ök, ṙamā-angrit Asēr, köiny ök nö ngaich, sat samyeūheu anga-aṅ nö ik pihöre, hētentö ök rinëlö ò. 37Tö hëvhöre anāi fën tumhang samyeūheu anga-aṅ nö tafīösi; ök töng öt ṙamāngö ngam chūök ngam Tēv, lamök la-en ngam Tēv hĕnghöre ahik, ane inrē peuheū harap ṙô nö ve-elkui tömaṙôngö. 38Yih anga-aṅ tök hēre nö ha-öiny ngam Tēv; ngaich ve-eny inlahen Ò anga-aṅ nö i yik tömaṙôngö, hamöngkūö ṙinānyö Yerūsalem.
Havantöre Nö I Nāsöret
39Keuheūthëṙen cha-a tö mīnë la-enre, nö sā ngam chöngö ngam Mā Tēv; havantöre cha-a ngaich nö i Këlelī, ik panam cha Nāsaret. 40Ngaich ngam nyīö nö pōyö, nö kalēḵ alaha, sööḵngö tö mikah; ane inrē īnu tö ngam inlōnti tī ngam Tēv.
El Ngam Töhet Chūök Ngam Nyīö Yēsū
41Ngaich minā yöng Ò nö örhĕnghang samyeūheu röön, nö chuh Yerūsalem hē ap paratīn paska. 42Ngaich hē Ò nö nët sīön höiny samyeūheu, ngaich chuh in e cha-a, sā falngen ngam paratīn. 43Keuheūthëṙen cha-a, ngaich havantöre, höngngöh ök Nyīö Yēsū nö i Yerūsalem; höng öt akahalōn minā yöng Ò tö e. 44Höng i yik ṙôngö cha pöri Anga-aṅ, tö lōn cha, ngaich cha-a nö hĕnghang sumkam nö kiröönngöre. Ngaich chöhan cha-a nö i yik holre, yik hanöngkisānö cha inrē. 45Öt kôtökūö cha-a tö Ò, maichtöng havantöre nö i Yerūsalem, nö chöhan. 46Ngaich lūöihang sumkam möl cha-a nö kôtökūö tö Ò, nö ël ök chūök ngam Tēv, ūichhaka nö i yik mahaköpti, hĕnghöre hang ṙô cha, ane inrē hatönö cha. 47Ngaich yik hamangṙô Ò nö pingangkūö tö mikah Ò, ane inrē huneū-euṅ ṙô Ò nö sapṙô. 48Pingangkūö inrē minā yöng Ò tö matre nö meūkan ngö ṙô ök yöng Ò kikānö tö Ò; Kakūönö, pò yòh Öm ngati tī tö ai. Yĕh meūkö ai, höng haṙīvölōn ai chöhö Meh. 49Ngaich ngö ṙô Anga-aṅ tö cha, Sitih an chöhö Chu? Röh an akahalōn tö Chu mi-i la-en ngam Yöng re? 50Ngaich öt akaha elnang cha-a tö ṙô Ò nö in cha. 51Kiröönngöre ngaich Anga-aṅ nö hol cha, chuh Nāsaret; ngaich hang ṙô cha Anga-aṅ. Ngaich ngam yöng Ò kikānö nö höng haköpngö minë ṙô Ò nö ellōnre.
52Ngaich Ang Yēsū nö ṙuhölre mikah, ane inrē ṙūhölre ṙôkö, hanghuṙen tö ngam Tēv, tarik inrē.
Currently Selected:
T. LŪKÖS 2: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
