Mumkahten 8
8
1Achiāp tö sā ngam tö-akaha tarik? Achiāp tö akahakūö tö
manah chehen?
Yāngökūö tī an ngam mikah
tö tarik,
Haṙī-ingre inrē ngam kūö ò
töngëḵ.
Hang Chöngö Ngam Rācha
2Haköp chöngö ngam rācha, um ngangngökūö tökūö ngam töhet tö chūökūö kinlēḵngô meh; 3Ṙā-ang i kūö ò kiröönngöre, un ahāṅkenre yē ap lāinyngen nö öt tölöök, pò ò nö tī-ivö ip töng kanāhanglōn ò. 4Pò ngam ṙô ngam rācha nö tökiröng, chiāp tökô inrē nö ngö ṙô tö ò, Suāp la-en meh? 5Anga-aṅ ngòh hamang chöngö öthō min nö chök, akahalōn min inrē tö ṙētak talöökö ngam tö akaha tarik. 6Pò në tökeuheūttöre nö ṙētakvö, talööku inrē, pòrô kanihngen ngam tarik nö langan nö in ò. 7Pò ò nö öt akahalōn töp tö min, chīö ṙöng öp tökô nö vë-eny nang ò tö inlahen e min? 8Öt tarīku tökô nö haköp ngam ma-alaha hēk chönguvö ip sakāmö kinpaha; öt löknyu aṅ an ngam kinyūngö, ötrēhĕn min öt lanöökö nö ṙānyen cha yip kamëtöre nö in e.
Yip Tötlöök Tö Yip Tölöök
9Meukngöre chin tö në isaha chu kētö ellōn in nup tö ngaich el katòh ngam tavūöi, i saha ngam tarik nö hayöng tarik nö chökhuṙen tö ò. 10Ngaich chū-ö meuk tötlöök nö lāpi; kuhēthötre ṙung cha-a kunyī-iny re inrē nö ṙā-ang el töhet chūök, ngaich eū-eu nö el ngam chūök cha nö ngatī inlahen. Chanök alaha an inrē angū-ö. 11Pò sācha tötlöök la-en nö öt ilööṙen nö kēkaṙen, ngaich ngam ellōn kūön tarik nö tööḵlö nö hòṅ im la-en tötlöök. 12Pòrô öp tö köölö fālen nö hēngòng tumheuh nö lā-evṙen tö tötlöök marô-ò tö nômö inrē sön chū-ö akahalōn tö e min nö löök nö in cha yip tö pa-ekūö tö ngam Tēv, pò cha nö pa-ekūö tö ngam Tēv, pò cha nö pa-ekūö nö i kūö ò; 13Ötlöök pöri min angū-ö nö i tötlöök, öt rēhĕn min anga-aṅ nö marô-òten tī tö sakāmö re sā nyat, pò ò nö öt pa-ekūö nö i kūö ngam Tēv.
14Chanök alaha ap umuh i kūö tumlat, tö yip tarik tölöök tö löökö in tö tösā la-en tötlöök, tötlöök tarik inrē tölöökö in tö tösā la-en tölöök. Chanök alaha an angū-ö inrē tö ṙô chu. 15Hōtö inṙamlōn chin inrē, pò tarik nö öt aṅhav-in tö tölöök el katòh ngam tavūöi höng ngam nyinā-avkūö, inôkö inrē, kumchikngen re inrē anga-aṅ, pòn angū-ö min kum ò nö kiröönngöre i nup la-en ò i rô-òtö sakāmö ò nö aṅ ngam kahëtö ngam Tēv nö in ò el katòh ngam tavūöi.
16Hē chu kētö ellōn re hòṅ akahakūö tö mikah, meuk la-en inrē tökeuheūten nö el tumlat, nö öt rēhĕn mat nö meuk inṙôhò tö sakāmö öt rēhĕn tö hatööm; 17Ngaich chū-ö meuk la-en ngam Tēv nö ṙòkhöre, ngaich ngam tarik nö öt kôtökūö tö la-en elkatòh ngam tavūöi. Öp tö sitih ṙôken la-en tarik nö chöh, ötkôtökūö min anga-aṅ tö e; pòrô tö-akaha tarik nö vë-eny re nö akahakūö ötkô anga-aṅ nö kôtökūö tö e.
Currently Selected:
Mumkahten 8: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
