Mumkahten 9
9
1Ṙātö u pöri chū-ö nö ellōn re, ngëichken u nö ṙòkhöre, tö nup la-en cha yip tölöök tö-akaha inrē nö eltī ngam Tēv; yĕn pòrô nö hana-āngenlōn hēk sunrīkhö öt akahalōn tarik. Ṙòkhöre nup i kūö cha nöng chanök alaha, 2Pòn löö i taṙòkhöre öp chanuhngen nöng hĕng, löö tölöök tarik löö i tötlöök inrē tarik, löö tölöök i tötlöök inrē, löö i töhet i töthet inrē, löö, in ò ngam kamëtötökētu in ò inrē ngam töt kamëtö tökētu. Sā ngam tölöök tarik, ngatī ngam tö köölö fālen; anga-aṅ inrē ngam tö chūökuṙô höng sā ò ngam tö sōḵ nö chūökuṙô. 3Tötlöök an angū-ö nö in u nup tö ngaich el töng hĕng chanuhngen nö löö i taṙòkhöre; tööḵlö inrē vē tarik tö tötlöök ellōn, i sāha cha nö aṅ inrē öp kintūöyen nö ellōn cha, unôich tö e ngaich cha-a nö chuh i tökapah. 4Anga-aṅ pöri öp töhamūltu nö in yip tö-aṅ maheūṅkku anga-aṅ, pò ngòh tö-aṅ am nö ĕhten töm tökapah layön. 5Pò ngam tö-aṅ nö akahalōn tö cha min nö kapah, öt mikahavlōn pöri ngam tökapah, ngaich rö-ö cha-a nö ōtre raneushö; chatngen pöri ngam kanöpölōn tö cha. 6Ök hanāngenlōn cha sunrīkhö tö cha inrē tök kumnyah elmat cha ha-ëhangen nö payāyi, ngaich cha-a nö öt ōtre in tö tö örheūheu minchööḵö i nup tö ngaich el katòh ngam tavūöi.
7Kuṙòh, kumchikngökūö re man nyā-avkūö tö nyā-aṅkūöre, òk vāin re inrē holtö ṙanāmölōn; tön ngaich an ngam Tēv nö hōḵ tö vahīṙen meh.
8Hökngen nup inyut meh nö örheūheu nö isoh; unhökiṙen tavī-i nö hāṅten nö i kui meh.
9Kumchikngenre i pīhöre öp hanāngenlōn meh, i rô-òtö nup sakāmö tö töl nômö meh nup kahëtö ò nö in meh el katòh ngam tavūöi, tön angū-ö an minchööḵö meh im nômö i la-en meh inrē nup vahīken meh el katòh ngam tavūöi. 10Nup la-en kanôtökūö kuntī meh, mā-anyre me-eṅ umuh hēk lōn, hēk inkaha, hēk mikah el Chūök Tökapah, öp chahūhu meh.
11Hēk chū-ö el katòh ngam tavūöi meuk ngam insōlö nö öt im töveut, ötrēhĕn ngam kinyūngö nö im tö kalēḵ, öt rēhĕn nyā-aṅkūö nö im tö akaha, öt rēhĕn kanôlò nö im maharëtöre ötrēhĕn hanāngen nö i më tarik tö mileuchngen mikah; ṙētak pöri lanūngö inrē mī-in u nö ṙòkhöre. 12Pò ngam tarik nö öt akahakūö tö ṙētakre. Sā kāḵ öp tö kô-òngvah nö el öp inhāṅl tötlöök, sā chehechōn inrē tö kô-òngvah nö el tingööpö tö tötlöök ṙētak, hē e nöng vuphë fanukta nö in cha.
Piṙūt Im Mikah Tö Ngam Kumlō-ov
13Meuk töngatī chin inrē mikah el katòh ngam tavūöi, ngaich angū-ö nö sā tökiröng nö in cha. 14Hĕng ök umuh kun elpanam öt ṙōl tak aṅ tö tarik, ngaich hĕng tak ök tökiröng rācha yih nö lā-al e kayīngö e ngaich, vīlö tökiröng chūök kinyūngö e. 15Hĕngtak pöri ök yāich tö akaha tarik tökôti nö ël e, ngaich anga-aṅ nö lökten i mikah re nö ṙānyö ngam elpanam. Sönngen re nö öt hĕng tak tököpölōn tök yāich tarik. 16Ngö ṙô pöri chū-ö tö ngam mikah nö ĕhten tö ngam kumlēḵ, pòrô ngam mikah ngam yāich tarik nö öt hakūökaṙen, nup ṙô ò inrē nö öt hāngö.
17Nup ṙô ngam tö-akaha hāngö nö el chanëven ĕhten tö hinū-a töp mahayöng nö i tökulō-ovö. 18Ĕhten an ngam mikah tö aṅtī kunyung, hĕng tak pöri tököölö fālen töpōyen piyāingö tö tölöök.
Currently Selected:
Mumkahten 9: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
