Mumkahten 7
7
Mufēḵ Im Nômö
1Ĕhten an ngam tölöök minë-eny tö töpōiṙāi incham alaha: ngam sakāmö kinpaha inrē, tö ngam sakāmö kinyôḵnyi.
2Ĕhten an ngam chinūhu el patī töhaṙīvlōn tö ngam chinūhu el patī tökiröng nyinā-aṅ; pò e nö angū-ö manāngen tarik nö ṙòkhöre, ngaich ngam tö aṅ min nö ṙātö e nö ellōn re.
3Ĕhten miṙivlōn tö nīölö pòn lökten im anūnökūö nö vītu ngam ellōn nö ṙāmölōn.
4El patī miṙīvlōn öp ellōn tö akaha; el patī ṙanāmölōn pöri öp ellōn tökulō-ovö.
5Ĕhten ön nö i ngòh tarik ngam hināngö vinëkö tö tö akaha tö ngam hināngö tinkökö tökulō-ovö.
6Sā linrôkökūö töchökhu chōn nö i rit tanīönyö, ngatī ngam nīölö tökulō-ovö; chanök alaha an inrē angū-ö.
7Kô-en inkihten nö vīngen tö akaha tarik nö kulō-ov, hachōichngö ellōn inrē ngam ṙāi minyôny-aṅ.
8Ĕhten ön ngam manā-aṅ i chehen tö ngam ranehlö e; ĕhten inrē ngam tömöi ellōn tö ngam ellōn mahakeūlenre.
9Un ka-eūyö tanānyö, pò ngam tanānyö nö iyöng elngòh tökulō-ovö.
10Un ngö ṙô, Kūö yòh nuk lā urĕh sakāmö nö ĕhten tö në. Tön rö-ö an angū-ö nö ṙā-ang i mikah töp lökten meh hatönken e.
11Tölöök an ngam mikah nö holtö amin, tö kanôlòvö nö in cha yip mameuk ngam tavūöi.
12Ngam inahtö mikah sā inahtö rupīö; ngam kanôlò aṅ i inkaha tö ngam mikah nö haköpkö nômö ò öp tö-aṅhav-in tö e.
13Ngëichkö la-en ngam Tēv; achiāp tökô nö hachip öp tökuròk tö tī ò? 14Kumchikngenre hē öp sakāmö kanôlòṙen, ngëicha inrē hē sakāmö öp kanihngen; vī ngam töhĕng an ngam Tēv nö sā ngam tahëng, hòṅ ngam tarik nö ötkôtökūö tö yô-òv min unôichrit ò.
15Meuk tökeuheūttöre chin ing tö töl nômö chu; tölöök ap umuh tarik tö kapah nö i lanöököre, tötlöök ök umuh tarik inrē tö marô-òtö nômö nö i tötlöök la-en re. 16Uh man yahlö lanöökö, uh inrē öm vīlöre yahlö mikah; kūöyòh ṙöng öm hòṅ fëlngöre? 17Uh man yahlö öt lanöökö, um rēhĕn kulō-ovö, yòh ṙöng öm hòṅ kapah urēhĕkūö öp ṙētak meh? 18Tölöök an yē meh kiṙapngö tīre in ngih, ngaich um ṙā-ang tīre in e; pò ò ngòh tö pa-ekūö töm Tēv min nö ṙā-ang in u nö meutnyi.
19Kētö kumlēḵ tö-akaha tarik an ngam mikah mötlö tö tösöm tak mahayöng i töhĕng el panam.
20Kô-òngrit, nö öt hĕng tak tölöök tarik el ngih tumlat öp tö löökö la-en öt köölö fālen inrē.
21Un hangihtöre i nup ṙô vē tarik, hòṅ meh öt hang ṙô öp tarik meh nö ötlēkôre tö meh; 22Akahalōn man töre ṙung ṙōl heuh öt lēḵkôre tö tahëng.
23Lökten i mikah chin kalahken në nö ṙòkhöre; ngö ṙô chū-ö, Hòṅ akaha chin; marôvat pöri angū-ö tö chu. 24Öp mu-umuh, marôvat, aṙū-uti inrē, aṙū-uti takô; chiāp tökô nö chöhö e? 25Havöötö ellōn re chū-ö hòṅ akahalōn chöh inrē: lukkö mikah, tūmö u inrē, hòṅ akahakūö inrē tö öt lanöökö kumlō-ov, tö kumlō-ov inrē ngam kintūöyen.
26Ngaich chū-ö pōyen kanôtökūö tö tö-angū-uvö, mötlö tö kinpaha tī ngam kikānö öp tö tinngöpu nö ellōn re inhāṅl inrē, inlök inrē nup kël ò; anga-aṅ ngòh mahaṙamlōn ngam Tēv ötkô-òngvah tö tī ò, kē-ĕ pöri tö ò ngam tö köölö fālen. 27Yĕh meuk, angū-ö an kanôtökūö chu, ṙô töhĕng nö im tahëng pòn hòṅ kôtökūö tö ṙôken, 28Ngam chahöh ngih ellōn chu tö heumköre hö-ö pöri öich kôtökūö. Hĕng tak tarik kanôtökūö chu i tö hĕng köiny, hĕng tak pöri kikānö in cha nö ṙòkhöre ötkôtökūö chū-ö. 29Yĕh meuk, höng angū-ö an kanôtökūö chu tö ngam Tēv nö vī tarik nö chiplö, ngaich pöri cha-a nö chöhlö töpōyen vahīkenre.
Currently Selected:
Mumkahten 7: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
