Mumkahten 10
10
1Nup tökapah inṙūöi vīten ngam tötahūsa incham alaha nö hangeūṅtu tinôngö; ngatī tö rahëchyen kumlō-ov nö langan tö mikah ineū-euṅ inrē.
2Öp ellōn tö-akaha tarik harônten ò nö lā hāmö, öp ellōn tökulō-ovö pöri kū-ö tö lā tavē.
3Pòrô ngam tö kulō-ovö nö lök el talöökö, hāṅten anga-aṅ tö mikahngen, ngaich höng tökulō-ovö ṙô anga-aṅ tö taṙòkhöre.
4Yē öp tanānyö öp mahayöng nö sīöplöre nö lā in meh, um ṙāngö ngam chūök re, pò ngam inrīkngöre min nö halööktit nup tökiröng fālen.
5Tötlöök ap umuh maheuṅk chu el katòh ngam tavūöi, nö sā tövaich ṙamā-ang i mahayöng: 6Ha-ūichlöng tökulō-ovö el nup töpōyen lātulöng chūökö, ngaich ngam tökôlò nö ūichhaka nö el chūökö lā taṙeū. 7Meuk tö hakövö chin nö i uk kōra, kūön rācha inrē nöng kiröön sā töhakövö. 8Anga-aṅ ngòh amul anūlö fuk ël e min; kāpö ò an min ngam pēch öp tumṙölhötre nö ikaha kinlōngö.
9Anga-aṅ öp amul ihong chök min tökūö u; anga-aṅ inrē öp famung chōn palā-aiṙen tökūö u.
10Yē ngam vët nö öt keut, ngaich öt hĕng tak mahakeutnyö kūö ò, ngaich ṙūölö kumlēḵ re anga-aṅ; ngam mikah pöri holṙen öp töhĕng tak nö teunglen.
11Yē öp pēch nö kap urēhĕkūö ò nö pumlāmö, öt kanôluṙô ngam pinlāmö ò.
12Teūngen nup ṙô ò elvāng öp tö-akaha tarik tö hanāngen tö ò, mikten ò pöri nup minuh tökulō-ovö.
13Kumlō-ov nup raneh ṙô ngam elvāng, öt lanöökö kintūöyen öp manā-angrit ṙô ò.
14Ṙūölö ṙôken ṙô ön ngòh tökulō-ovö, pòrô nö öt tarīkuvö tö-akahalōn tö e min, achīö ap inrē tökô nö vë-eny nang ò töp mu-unôich tö ò min?
15Chëingö an ngam tökulō-ovö tö kūö la-en re, lökten ò nö öt akahakūö tö talöökö nö chuh el panam.
16Öt kanôlò in meh, Ō panam, yē öp rācha meh nöng nyīö, yip kūön rācha meh inrē nö nyā tökiröng nyā-aṅ tö peuheū!
17Ṙāmölōn man, Ō panam, yē öp rācha meh nö kūön tö hakövö tarik, yē yip kūön rācha meh inrē nö nyā tökiröng nyā-aṅkūö ip tölöök ṙētak, yip tö kô nö lāköre, rö-ö nö hinyōingö!
18Chahömköti an ngam uk patī kūö ṙanāhata, kūö ṙanāhata inrē ngam patī nö aṙōḵ.
19Nyā-aṅ mahayīölkūö an ngam rôtī nö vī-i, mahaṙamṙô tökeuheūttöre inrē ngam rupīö.
20Pòrô nö ellōn meh, um ötlēḵkôre tö rācha, un rēhĕn el chamam re ötlēḵkôre tö tökôlò; tön söömi ap min ṙô meh tö chehechōn el kuföt, hēk vë-eny e nup yô-òv tö sanëôku.
Currently Selected:
Mumkahten 10: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
