INLAHEN 22

1Kahōlö, kayöngö inrē hang ngih ṙô chu yin, laklöre.

2Hē cha nö hang ṙô ò nö ve-ekūö cha nö i ëlô Heprāi, ṙūöngenre chanëvö cha-a; ngaich ngö ṙô anga-aṅ.

3Yahūti chin kòl chu-ö, töfötnyu öich i Tārsös i Kiliki; haruklöng pöri öich i ngih panam, haköptu tö Kamli-ĕl, ip tölngö minlēḵṙen tö ngam kui yik muvöhngö hī. Kalēḵĕlōn tö la-en ngam Tēv, sā yīö, yī-ö ṙòkhöre töngamuh. 4Im kinpaha tī chin öthakôlò ngih māṅ; nyëk, kalonghöt kikōnyö, kikānö inrē. 5Kô-òren an ngam mākūö kūönṙô nö eūken chu, ṙòkhöre inrē yik töng mākūö; yip kamëtö līpöre chu, öich chuh i yik tarik hī, i Tāmöskös. Ngaich kiröönngöre chū-ö öich kētö yik māṅ nö i Yerūsalem, nö nyëkö; pòn hōtu nö öthakôlöngṙô.

Vënyö Ök Invöötölōnre Ang Pôl

(Act 9.1-19; 26.12-18)

6Ngaich hē chu kiröönngöre, röhta ngaich i Tāmöskös, tö sakāmö, höng lūk ök töyang nö löktö el halīöngö, nö havīlen chu. 7Ngaich afukngöre chū-ö el tumlat; ngaich hang ök ṙô, tö ngö ṙô tö chu, Sôl; Sôl! Kūöyòh öm öthakôlò Chu? 8Ngaich ngö ṙô chu-ö, sap ök ṙô, Mā! Achīö Öm Me-eṅ? Ngaich ngö ṙô Anga-aṅ tö chu, Yēsū Chin, aṅ Nāsaret; Öich töthakôlöngṙô tö meh. 9Meuk ök töyang yik hol chu tarik; öt hang ṙô ök vame-eṅkūö chu pöri. 10Ngaich ngö ṙô chu-ö. Asuh lap pökeh la-en chu? Mā! Ngaich ngö ṙô ngam Mā tö chu. Choholre man; kuṙòh, chuh Tāmöskös; in e man min vënyu nang tö nup taṙòkhöre, töhalēni la-en meh. 11Ngaich höng sarōkö kël chū-ö tö yik holre; pò chu öt meuk tökūö yanëchhu ök töyang; ngaich yihtöre chū-ö i Tāmöskös.

12Ngaich hĕng tak ök tarik, ök tö teūngen tö la-enre nö sā ngam chöngö, ang Ananī, tö eūnyu tö yik taṙòkhöre Yahūti mī-iyöng muh, yihtöre anga-aṅ nö in chu. 13Ngaich söklöre nö ranghen chu; ngaich ngö ṙô, Kahōlö, Sôl; meuk man yēḵ ngaich. Ngaich ilööṙen hē e, öich môklökūöre ngëichken ò. 14Ngaich ngö ṙô Anga-aṅ, Hōtu man tö ngam Tēv yik muvöhngö hī, öm akahalōn tö lōn Ò, meuk ngam Tölöök inrē, hang nup ṙô inrē lamök nyö elvāng Ò. 15Pò meh min ameūken Ò i taṙòkhöre tarik, eūkö nup maheuṅk meh, ahang meh inrē. 16Sitih pömrih öm höngngöh? Choholre man; öm vōkö, söichngö nup tököölre; havëkö Mine-eny Ò.

Havëka Ang Pôl Nö Mumkahten Yik Tahëng Mihëṅṙô

17Ngaich hē chu havantöre i Yerūsalem; ṙònghöichṙen öich ve-ekūötēv el ngam töhet chūök, ngaich meuk heūvö chu-ö. 18Ngaich meukö Yēsū chu-ö, nö ngö ṙô tö chu, Ka-eūyen man kē-ĕngre, ṙā-ang Yerūsalem; tön sōḵo ṙô meh yip min, öm vënyen Chu. 19Ngaich ngö ṙô chu-ö, Mā, akahlōn yip tö chu kamlonghöt, famòh inrē el nup taṙòkhöre chūök vine-eṅkūötēv, yip ṙamātö ellōnre nö in Meh. 20Hē ök ameūken Meh Satēpān nö fëli, sökhaka chū-ö inrē öich röhta, öich höng hōḵ; meukkö nuk hilā yik famëlan chū-ö inrē. 21Ngaich ngö ṙô Yēsū tö chu, Kuṙòh; tīnngen meh Chin marô-òlkūö, i yip Tahëng mihëṅṙö.

22Hangihtöre sin cha-a tö ṙô ò; ngaich hūḵnyôre nö ngö ṙô, Fëlngö töngatī tarik, nö ing panam; tön öt kô an nö aṅ. 23Ngaich hē cha nö hūḵa, kavalngö nup kinṙumre inrē, tūilö tumlat inrē; 24Ngaich ök yöngkūö kumyung nö hōten ò nö kēhĕtvö nö el ök chūök kumyung; ngaich hōten ò nö fohnyuṙô, pòn hòṅ akahalōn anga-aṅ tö lökten cha nö ngatī ṙô, nö hūḵa. 25Ngaich hē cha nö nyëkan tö uk, ngaich ngö ṙô Pôl, tök yöngṙen töhēngòng kumyung, ök ranghen ò nö sökhaka, Kô-òren öi yī-ö foh tarik, ngòh aṅ Rōma, nö öt kahòkkaṙen?

26Ngaich ök yöngṙen töhēngòng kumyung nö hāngö e, yihtöre ngaich anga-aṅ nö ik mākūö kumyung, ngaich ve-eny nang ò, nö ngö ṙô, Sitih tī ömeh? Tön aṅ Rōma ap tarik. 27Ngaich yihtöre ök mākūö kumyung, ngaich ngö ṙô tö ò, Ve-eny nang chu man, aṅ Rōma ömeh? 28Ngaich ngö ṙô anga-aṅ, Hòṅ. Ngaich ngö ṙô ök mākūö kumyung, Pōyen tī chin chū-ö havah ngih kanôlò vē aṅ Rōma. Ngö ṙô pöri ang Pôl, Tö ngatī finötnyi chin chū-ö. 29Ngaich yik tarik tö hòṅ hatönan nö kirööngöre, nö ṙāngen ò; pa-ekūö inrē ök mākūö kumyung, hē ò nö akahalōn tö ò nö aṅ Rōma, pò ò nö nyëkan.

I Kūö Kamhôka Ang Pôl

30Ngaich im huṙöich, ök mākūö kumyung nö hòṅ akahalōn takô tö lökten yik Yahūti nö vënyen ò; luhlen ò anga-aṅ; ngaich hōtö yik mākūö kūönṙô yik kamhôṅka inrē nö yihtöre. Ngaich kēten Pôl anga-aṅ; ngaich asöklen ò nö i kūö cha.

Currently Selected:

INLAHEN 22: CANIBSI

Highlight

Copy