INLAHEN 21

Kū-ö Tö Yeruselem Ang Pôl

1Ngaich hē ih ṙāngen cha, ngaich hatēhĕlre īhö; ngaich höng chipta öi i Kōs; ngaich im tahëng sakāmö i Rōtös. Ngaich ṙā-ang umuh, öi chuh Patāra. 2In e ihö kôtökūö tök chōng chamuh Fòinikē; yôklö īhö ngaich, ngaich hatĕhlöre. 3Ngaich hē ih meūkö Saiprös, ṙā-ang e īhö nö lātavē; ngaich kū-ötö Siriā; kuhēt īhö ngaich i Tūrös pòn in e ngam chōng nö ṙāhöt aṅre. 4Chöh yik mahaköp īhö; ngaich iyöng in cha, öi sat sumkam. Ngö ṙô cha-a tö Pôl, nö lökten im Töhet Fanöinylö, tö ò nö sōtu nö chuh Yerūsalem. 5Keuheūthë minë sakāmö ih, ngaich kiröönngöre īhö im kinröönngöre; ngaich ṙòkhöre cha-a, tö pihöre, kūönre inrē nö söömngen ih, lā-uk ök panam. Simngöre īhö i kuyāyö, ngaich ve-ekūötēv. 6Ngaich kö have-engritre in höö: yôklö ihö ngaich el chōng; havantöre pöri cha-a nö i patīre.

7Keuheūthë röön öi chuh Tòlĕmais; ngaich salām yik holre; ngaich iyöng in cha, öi hĕng sumkam. 8Im huṙöich ihö kiröönngöre, ngaich yih öi i Kaisarī; ngaich löö i patī Filip, ök mumkahten, ök aṅ i yik tö sat tak; iyöng in ò īhö ngaich. 9Fën tak kūön anga-aṅ tö tötpihövö kikānö, mahaköphöti. 10Ngaich hē ih ṙōl sumkam iyöng umuh, hĕng taka ök pròfĕt yamih nö ṙā-ang Yūtā, Akapös minënyö. 11Yihtöre anga-aṅ nö in ih, ngaich kēḵ ök nyanëkṙat Pôl; ngaich nyëk këlre, kalröönre inrē; ngaich ngö ṙô, Ngö ṙô An ngam Töhet Fanöinylö, Ngatī nyinëkö öp min tarik, öp tönyanëkuṙat tö ngih, tö tī yip Yahūti i Yerūsalem; ngaich kētu nö eltī yip Tahëng mihëṅṙö.

12Ngaich hē ih hāngö e, ngaich sōten ò ihö, tö cha inrē yik aṅ umuh, nö chuh Yerūsalem. 13Ngaich ngö ṙô ang Pôl, Kūöyòh öi peuny ane inrē miṙivngölōn chu, öi ngatī, yē chu tölēnen, öt höng tönyëkö, tön kapah inrē, i Yerūsalem, töpòkūö Mine-eny ngam Mā Yēsū? 14Ṙāngôre ngaich īhö, pòn sōḵ anga-aṅ nö tāhayö; höng ngö ṙô Hökngö lōn ngam Mā Tēv yēḵ.

15Keuheūthë nuk sakāmö, ngaich halēn kumre īhö, ngaich chuh Yerūsalem. 16Rēvre inrē yik mahaköp aṅ Kaisarī, hol ih; hĕng tak ök hol cha inrē, aṅ Saiprös, Nāsön, mu-urĕhten nö mahaköp, ök chūök ih hachūöklöre.

Chöhken Yāköp Ang Pôl.

17Chalô īhö i Yerūsalem, ngaich ha-öinytu yihih tö yik māṅ. 18Ngaich im huṙöich sakāmö ang Pôl, nö holten ih, nö chuh in Yāköp, ṙòkhöre yik mākūö ngam māṅ nö umuh. 19Keuheūthëṙen anga-aṅ nö salāmö cha; ngaich ahangnyö elnang cha nö keuheūtnyöre ṙô tö tī ngam Tēv nö i yip Tahëng mihëṅṙö, lökten i tī ò nö meukṙen. 20Ngaich hē cha nö hāngö e, ngaich ha-öiny ngam Tēv cha-a; ngaich cha-a nö ngö ṙô tö Pôl, Kahōlö, akahalōn man tö yip ṙamātö ellōnre Yahūti nö ṙōl köṅny; ngaich ṙòkhöre cha-a nö hòṅ haköp kuire. 21Ngaich vënyu nang cha-a tö inlahen meh, öm haköptö yip taṙòkhöre Yahūti yip mi-i yip Tahëng mihëṅṙö, nö ṙāngen Môsös, sōten cha inrē nö tunyinyngö yip kūönre, öt rēhĕn nö hōtu nö haköp kuire. 22Sitih pökeh? Hāngö meh yip min öm yih. Lökten man yēḵ, hang ṙô ih tö meh. 23Fën tak yip tarik in ih, yip kumlēḵngôre. 24Ngô-òṅ cha man; ahetlöre me-eṅ, holten cha, me-eṅ kamëtö rāi cha, hòṅ cha nö kuhākngöre. Ngaich ṙòkhöre min nö akahalōn tö nup tövënyu inlahen meh nö tötkô-en; tö meh inrē öm lēn haköp kuire. 25I inlahen yip tahëng mihëṅṙö pöri, ṙamātö ellōnre; ngaich in keuheūten chöngö, hòṅ cha nö öt ngatī nö haköp kuire; höng ṙāngö nup tökētu nö i insā tēv, i nup tökiröichö likeun inrē; im chinô-òṅkānö inrē.

26Ngaich Pôl nö ngôṅ yik tarik; ngaich im tahëng sakāmö nö ahetlöre nö holten cha, kuhēthötre nö el ngam töhet chūök, ngaich ve-eny kinheūṅten nuk sakāmö inhetlö, söl im hē nup tö kētu tö pòkūö cha nyöre nö kētu.

Kē-ě Pôl Nö El Ök Tempöl

27Hē minë tö sat sumkam nö hòṅ keuheūt, yik Yahūti aṅ Asī nö meūkö Pôl nö el ngam töhet chūök, ngaich ṙuhöl alaha yik tömaṙôngö; ngaich kēḵ an, hūḵa, nö ngö ṙô, 28Yī-ö tarik aṅ Israĕl; holṙen hī. Ngòh ön kòl tarik tökeuheūtngöre chūök nö haköptö taṙòkhöre tarik nö öt chumkūöṙen tö vē tarik hī, ngam kui hī, ngih töhet chūök inrē. Kēhöt Tahëng mihëṅṙö inrē anga-aṅ nö ël ngam töhet chūök, ngaich hachōichngö ngih töhet chūök. 29Pò cha sin nö meūkan nö im panam, nö holten Tròfimös, ök aṅ Efisös, ök tökēhötvö, tö lōn cha, tö Pôl, nö ël ök töhet chūök.

30Taṙōllöngṙen ngaich ngam panam nö ṙòkhöre; ngaich faltöre yik tömaṙôngö; ngaich kē-ĕ Pôl cha-a; tūöknyen ò, nö ṙā-ang ël ök töhet chūök, ngaich iṙūö öptökūö nuk inkūp. 31Ngaich cha-a nö hòṅ fëlngen ò; ngaich vënyu nang ök yöngkūö kumyung, tö Yerūsalem nö ṙòkhöre nö taṙōlaṙen. 32Ngaich iṙūö ngôṅ kumyung anga-aṅ, tö yik yöngṙen tö hēngòng inrē, ngaich faltöre nö in cha. Ngaich hē cha nö meuk ök yöngkūö kumyung, tö yik kumyung inrē, ṙā-ang tīre ngaich cha-a, nö fōhoh Pôl. 33Yihtöre ngaich ök yöngkūö kumyung, nö haröhtöre, ngaich kē-ĕ Pôl, ngaich hōten ò nö nëtö nyanëk tö sayōk; ngaich hatöntöre tö ò, tö fālen ò inrē. 34Ngaich höng kö ṙôre cha-a; öt huveū-eu mikahlōn anga-aṅ tökūö ngam tinṙōlen; lökten ò nö hōten ò nö kētu nö ik elyöngö kumyung, 35Ngaich hē ò nö ik vanānglö, höng chālö anga-aṅ tö yik kumyung, kūö yik tömaṙôngö nö tainy. 36Pò yik tömaṙôngö tarik nö tömrit ò; hūḵa, nö ngö ṙô Fëlngen ò!

Laklöre Ang Pôl

37Hē cha nö hòṅ kēhöt ò nö ël ök chūök kumyung, ngaich ngö ṙô ang Pôl tök yöngkūö kumyung, Ve-ekūö meh öich kòh? Ngaich ngö ṙô anga-aṅ Huveū-eu ṙô öm, ṙô Krīk? 38Röh öm me-eṅ aṅ Aikup, öm ṙamūhöl alaha inrīkngöre ngam chöngö, fömngöre? Ngaich hachōḵngö yik tö fën köṅny tarik tötūmu. Nö elinchōn? 39Ngö ṙô pöri ang Pôl, Yahūti chin chu-ö, aṅ Tārsös i Kiliki; rö-ö chin aṅ yāich panam. Ve-ekūö meh chin, öm halöngten chu ve-ekūö vē tarik. 40Ngaich halöngten ò anga-aṅ; söklöre ngaich Pôl, nö ik vanānglö; ngaich fëitökūö yik tarik nö aṅtī tö eltīre. Ngaich hē cha nö chēv, kaknyöre ngaich anga-aṅ nö ve-ekūö cha, nö i ëlô Heprāi, nö ngö ṙô:

Currently Selected:

INLAHEN 21: CANIBSI

Highlight

Copy