INLAHEN 20

Chuh Mëkētònī tö Akayā

1Keuheūthëṙen ngam tinṙōlen, ngaich tīnngö mahavëkö yik mahaköp ang Pôl, ngaich ṙuhöl alaha cha; ngaich have-engritre nö in cha; ngaich kiröönngöre nö chuh Makētòni. 2Ngaich hē ò nö lök muh, pōihöl ṙô anga-aṅ, nö ṙuhöl alaha cha inrē, yihtöre anga-aṅ nö i Akayā. 3Lūöi chumngëṅtö anga-aṅ nö umuh; ngaich yik Yahūti nö ulāikenre nö hòṅ chökhuṙen tö ò, hē ò nö chuh Siriā, höng hòṅ havantöre ngaich anga-aṅ nö lök Makētòni. 4Hōlu anga-aṅ, nö tölngö Asī, tö hēḵ Sôpatör, ök aṅ Pīrīā, kūön Purhös, Sekuntös inrē, aṅ Tösalònikē; Kē-ös, Timòtī inrē aṅ Törpī, Tikikös, Tròfimös inrē, aṅ Asi. 5Urēhĕngrit pöri cha-a, ngaich hökken ih nö i Trô-as. 6Chuh ngaich īhö öi ṙā-ang Filippi, unôichrit nuk sakāmö Tötaföhlöng Ròtī; ngaich yihtöre öi in cha, i Trô-as, unôichrit tö taneui sumkam. Ngaich höngngöh īhö umuh, sat sumkam.

Māngö Röön Re Pôl Nö Chuh Trôās

7Im töhet sakāmö, hē ih hamūlöre, fòk ròtī, ngaich ve-ekūö cha anga-aṅ Pòn hòṅ ngaich im huṙöich, söl chūöl hatööm rô-òtö ṙô anga-aṅ. 8Ṙōl nuk ëāṅvö el ök lātulöng urôhò, i chūök ih hamūlöre. 9Ngaich hĕng tak ök tarik, amūichhak nö i kūö lökhöt kuföt inkūp, Yutikös minënyö mahaṙòhlö; ngaich kūö Pôl nö marô-òtö ṙô nö iṙuhö ṙô, suktöre ngaich anga-aṅ, nöng haṙòh, ṙā-ang ël ök linūöi kölchap urôhò; ngaich kē-ĕ anga-aṅ nöng kapah. 10Yòhngö ngaich ang Pôl, ngaich afukngöre nö in ò, fūölan inrē; ngaich ngö ṙô, Ui ayôṙa; ṙòngmö nômu an. 11Ngaich hē ò ngaich nö yòhlö, ngaich fòkròtī, ngaich nyā; ngaich ve-ekūö cha nö marô-òten, söl minlīlö peuheū, kiröönngöre ngaich anga-aṅ. 12Ngaich kētö ök nyīö cha-a nö aṅ; ngaich pōyen ṙanāmölōn.

Ṙa-ang Trôās Nö Chuh Milētös

13Urēhĕngrit īhö chuh el chōng, ngaich hatēhĕre öi chuh Asòs. In e öi hòṅ kē-ĕ Pôl; pòn ngatī inlēnngen angū-ö; pò ò anga-aṅ nö hòṅ kiröön nö lök el tanyô. 14Ngaich hē ih meukkūö ò i Asòs, ngaich kēḵ an īhö; ngaich yihtöre i Mitulēnī, 15Hatēhĕre ihö, ṙā-ang umuh; ngaich im huṙöich sakāmö öi kamtö Kī-òs; im, tahëng sakāmö öi sökngöre i Samòs; hēk im unôich sakāmö öi yihtöre i Milĕtös. 16Höng hòṅ chöḵökūöre ang Pôl tö Efisös; pòn sōḵnö marô-òten nö i Asī; pò ò nö kurāten, nö hòṅ i Yerūsalem, yĕn kô, im sakāmö Pentēkòstē.

Māngôre Pôl Nö I Yik Mākūö Ngam Māṅ I Efisös

17I Milĕtös anga-aṅ, nö tīnngö chamuh Efisös, nö havëtö yik mākūö ngam māṅ, nö in ò. 18Chalô cha-a nö in ò, ngaich ngö ṙô anga-aṅ tö cha, Akahalōn yin yī-ö, hēten tök raneh sakāmö chu yih i Asī, tö inlahen chu in yīö, ngih rô-òten. 19Lök la-en ngam Mā Tēv, holtö inyāichngö ellōn, holtö makmat, holtö kanihngen inrē, tī yip Yahūti nö ulāikenre nö chökuṙen tö chu. 20Öt ma-īn ṙôre chin ve-eny nup tökôlò tī tö yīö; hangāṅlkenre inrē haköpten yīö, yē yīö mūlhaka, i patī yīö inrē. 21Hameukhömat yip Yahūti chin, Tahëng Mihëṅṙö inrē tö ngam invöötö ellōn tökū-ötö im Tēv, ngam mikah inrē im Mā hī, Yēsū Kristū. 22Ngaich chin yih töngamuh, öt maninngenlōn, chuh Yerūsalem; öt akahalōn min tö lāinyngenre öich umuh; 23Höng ngam vahënyö ngam Töhet Fanöinylö nö in chu, i në taṙòkhöre panam, nö ngö ṙô tö inkövö, kanihngen inrē, nöng höngö chu. 24Rö-ö ön ngih nômö chu nö tö pōi ṙāi tö lōn chu, öt tökôlò inrē nö in chu; höng yē chu keuheūten tö ngam la-en, taneūngen chu aṅ im Mā Yēsū, ngam inhangkö ngam tölöök inhānga, ngam inlōnti aṅ im Tēv.

25Yĕh meuk; akahalōn chin tö yīö ṙòkhöre yī-ö, chūök ṙô chu ahangkö ngam pūlngö, öi öt meukkūö chu min hēk. 26Lökten chin ve-eny nang yīö, tö chu ngaich keuheūten in yīö; kahngenre yin yī-ö ngaich. 27Öt ma-iṅhiṅv chin tö ṙôre in yīö, tö nup tökeuheūtöre inlēnö aṅ im Tēv. 28Aṅtöre yin; aṅtö minë pököre inrē, minë hayöng yīö, i tī ngam Töhet Fanöinylö, nö vīlen yīö mameukken, hòṅ yīö ha-aṅlö ngam Māṅ ngam Tēv, ngam havah Ò nö ṙāi tö mahāmre. 29Akahalōn chin tö chu min höng chuhhë, ngaich nup tö tainy am min tö yihtöre nö in yīö, öt ṙāḵlö në pököre. 30Hĕnghöre löklö in yīö yip min tarik, tö ṙôtö tötlöök, nö hòṅ hachōḵngen yip mahaköp nö asīnken cha. 31Lökten yin aṅhaṅti; köpölōn tö chu lūöi samyeūheu öt ṙākenre haköpten yīö nyöre, peuheū harap, holtö pineūnyö.

32Ngaich chin töngamuh kēten yīö im Tēv, im ṙô ngam inlōnti aṅ in Ò, ngam tökô-òren nö ṙūölen yīö, kētö amin yīö inrē i nup taṙòkhöre tö ahetlöng. 33Öt yikngö rupīö holre chin, humlum, hilā inrē. 34Akahalōn yin yī-ö, tö në kuntī chu nö meukṙen chu, vē hol chu inrē. 35I tö keuheūttöre chin hachōten yīö, hòṅ yīö ngatī meukṙen yip tötkalēḵ alaha; köpölōn inrē tö në ṙô ngam Mā Yēsū, nö ngö ṙô, Mötlö kanôlò an ngam kinëḵeṅti, tö ngam kinëḵeṅ.

36Keuheūthë ṙô anga-aṅ nö ngatī ṙô, simngöre ngaich anga-aṅ, ngaich ve-ekūötēv, nö holten cha. 37Ṙòkhöre cha-a ngaich nö peuiny, ngaich fahalre nö elranôṙö ò, ngaich hāmkūö ò. 38Möthë miṙivlōn tök ṙô ò, tö cha nö öt meukkūö ò min nö hēk. Ngaich söömngen ò cha-a nö ik chōng.

Currently Selected:

INLAHEN 20: CANIBSI

Highlight

Copy