INLAHEN 23

1Ngaich Pôl nö haköpmatre nö Ngëichkökūö yik kamhôṅka, ngaich ngö ṙô, Kahōlö; söl ing töngamuh chin sakāmö, öich lök i nup chöngö ngam Tēv, holtö lanöökö kuilōn, örheūheu. 2Ngaich Anga-aṅ nö hōtö yik samökhak nö ranghen ò, nö fatāk kūö ò. 3Ngaich ngö ṙô Pôl tö ò, Fëlö man min tö ngam Tēv, me-eṅ tö mi-isohnyu kaha; me-eṅ amūichhak kahòkken chu, asā ngam chöngö; ngaich hōten chu fohoh, harīkiyö töm chöngö. 4Ngaich yik samökhak nö ngö ṙô, Ötlēkôre ömeh tö ngam mākūö kūönṙô ngam Tēv? 5Ngaich ngö ṙô Pôl, Kahōlö; öt akahalōn chin tö ò nö mākūö kūönṙô; pòn ngö kinūichngö, Uh man chōchö ṙô tö yip mahayöng yip tarik meh. 6Hē Pôl nö meuk yik Satuki nö hĕng lā, hĕng lā yik Feresī inrē, ngaich ngö ṙô anga-aṅ tö yik kamhôṅka, Feresī chin kòl chu-ö, kūön Feresī inrē. Kūö mineūkkö ngam invanlö tö kapah chin kahòkkaṙen.

7Keuheūthë ṙô anga-aṅ nö ngatī ṙô, ngaich yik Feresī, tö yik Satuki inrē, nö lā-alkūöre, ngaich yik tömaṙôngö nö harēvöre. 8Pò yik Satukī nö rö-öv ṙô tö invanlö tökapah, öt ma-ahāngavö, öt rēhĕn ma-alaha; kö ve-eny u pöri yik Feresī. 9Ngaich taṙōla ṙô cha-a; rēvre yik kamūich aṅ i yik Feresī samöklöre, ngaich kilṙô, nö ngö ṙô, Öt kôtökūö in tö tötlöök i ngòh tarik. Sitih öre yĕn ma-alaha, hēk yĕn ma-ahānga vame-eṅkūö Ò? 10Ngaich hē cha nö lā-alkūöre, ök mākūö kumyung nö hōten yik kumyung nö kēḵngen ò, nö ṙā-ang in cha, ngaich kēhöt ò nö el chūök kumyung; pò ò nö pa-ekūö tö chinṙësö Pôl tö cha.

11Ngaich im hatööm ngam Mā nö sökhaka nö ranghen ò, ngaich ngö ṙô, Um pa-ekūö; sā meh ngaich eūken Chu i Yerūsalem, ngatī man inrē eūken Chu i Rōma.

Ulāikötīre Nö Fëlngen Pôl

12Peuheū-eulre ngam peuheū, ngaich yik Yahūti nö ulāikenre nö hamūlöre, rūtngövahre cha-a, yē cha nö nyā, òk inrē, hanöng saha tī cha nö fëlngen Pôl. 13Saṙaklöng tum tak yik, tö tö fën anāi, yik töngatī. 14Ngaich yihtöre cha-a nö i yik mākūö kūönṙô, i yik mā inrē, nö ngö ṙô, Rūtngövahre in īhö, yēi nyā, òk inrē hanöng saha tī ih fëlngen Pôl. 15Lökten yin holtö yip kamhôṅka, mikah tö lōn ap mākūö kumyung, hòṅ ò nö kēten ò nö in yīö, öi sā tö hòṅ kahòkken ò, öi halöökṙenre. Ngaich īhö, yē ò nö öl nö röhta, öi iṙū fëlngen ò min. 16Hāngö cha pöri ök kūön kanānö Pôl, nö hòṅ hayūnan; yihtöre anga-aṅ nö el chūök kumyung, ngaich ve-eny nang Pôl. 17Ngaich hĕng tak havëti ang Pôl, tö yöngṙen yik töhēngòng kumyung; ngaich ngö ṙô, Kētö ngòh man tarik, ip mākūö kumyung; tön yô-òv ap ṙô ò nö in ò. 18Ngaich ngô-òṅ anga-aṅ tö ò; ngaich kētu nö ik mākūö kumyung; ngaich ngö ṙô ök yöngṙen yik töhēngòng kumyung, Havëtu chin taheui tö Pôl, ap tö kē-ĕ; ngaich ve-ekūö chu anga-aṅ, nö hōten chu, kētö ngòh tarik nö in meh. 19Ngaich ök mākūö kumyung nö kēḵ kël ò, ngaich ṙūöngen ò, ulāikenre ngaich nö hatönan, nö ngö ṙô, Asuh ap ṙô meh, ve-eny nang chu? 20Ngaich ngö ṙô anga-aṅ, Halēnöre yip Yahūti nö hòṅ ve-ekūö meh, öm kēten Pôl huṙöich, i yip kamhôṅka, nö sā tö hòṅ hēk nö halöökṙenre nö hatönan. 21Uh man lökten hōḵo ṙô cha; tön saṙaklöng tum tak yip tarik tö tö fën anāi tö hòṅ hayūnan, yip ramūtngö vahre yē cha nö nyā, òk inrē, hanöng saha tī cha nö fëlngen Pôl. Lēn yip nö ngaich töngamuh, hökkö ap ṙô aṅ in meh. 22Ngaich ök mākūö kumyung nö hökngen ök tarik nö kiröönngöre; sōten ò nö vahënyu nang tö tarik, tö ò nö hameuktö e nö in ò.

Chuh Kūö Filik Ök Mahayöngö Pôl

23Nët tak havëti ngaich anga-aṅ, töyöngṙen tö hēngòng kumyung, ngaich, ngö ṙô, Nëtòng halēn nan tö kumyung nö kiröönngöre tölngö Kaisarī, sat anāi aṅ uk kōra, nëtòng yip tövöiyu, ip tömachūötör köṅny ṙô, tö hatööm. 24Ngaich hōten cha anga-aṅ inrē nö meuk chūök Pôl tö kōra, hòṅ cha nö kēten ò, nö öt pinlānguṙen nö ip mahayöng Filik.

25Ngötī anga-aṅ nö kūichngö līpöre, 26Salām, ngam tölngö tö-akaha mahayöng Filik, ang Klòtiös, Lusīös. 27Tö kē-ĕ ön ngòh tarik tö yip Yahūti; ngaich nö hòṅ fëlngen ò cha-a; hē chu yihtöre in cha, holtö kumyung, ngaich kēḵ an; pò chu ngaich akahalōn tö ò nö aṅ Rōma. 28Ngaich hòṅ akahalōn chū-ö töp lökten cha nö vënyen ò, ngaich kēten ò i yip kamhôṅka. 29Ngaich kôtökūö chū-ö tö ò nö vënyu nöng i inlahen ap kui cha; öt fāluṙen pöri anga-aṅ töp löktenre nö kumpaha, hēk kalonghötvö. 30Ngaich hē chu vënyu nang tö yip tarik nö hòṅ fëlngen ò, iṙūö tīnngen ò chū-ö nö in meh; tölṙô yip vamënyen ò inrē, nö yihtöre nö i kūö meh. Salām.

31Ngaich yik kumyung nö kē-ĕ Pôl, nö sā tinöölô cha; ngaich kēten ò, tö hatööm, nö i Antipatrīs, 32Ngaich im huṙöich, yik aṅ uk kōra nö ṙā-ai nö söömngen ò; ngaich havantöre cha-a nö i chūök kumyung. 33Chalô cha-a nö i Kaisarī; ngaich kētö ök līpöre nö ik mahayöng; kēten Pôl inrē nö i kūö ò. 34Keuheūthëṙô anga-aṅ nö ve-ekūö e, ngaich hatönan tö panam ò. 35Ngaich hē ò nö akahalōn tö ò nö aṅ Kilikī; ngaich ngö ṙô, Hòṅ hang falngen meh chin min, yē yip vamënyen meh nö yih. Ngaich hōten ò anga-aṅ nö aṅtu nö el ök patī Heròt.

Currently Selected:

INLAHEN 23: CANIBSI

Highlight

Copy