ZEKARIA 11
11
1Lebanon, ni nou cedar pai nouso jekthiowanau aküo nouso asopan!
Amongthe Nokpao Loiantsün
2Cipris-pai nouso shapkü lümongsaiu-
tiautenai cedar pai nouso loianiu;
nung pai ongko pai nouso lotheaniu!
Bashan nai noitsün lampai nouso shapkü lümongsaiu,
tiautenai liutsa langmong nouso sathiowaniu!
3Nokpao nousoüh amongkia nai sangh asong nou weji, tiautenai ngüso ajinka mowaniu!
Chongkhao nouso ngaotsün tü anglu;
tiautenai Yordan Haiusai ngüso kihtsün lotheaniu!
Onnemok Jimtsün Nime
4 Apaou jü Goaüh ngü tü ngiom, “Aloat au noitsün onnemok hoi tsak tü jimtsün nungüh chhiau chhi haoson nou lüchhi. 5Ngüso ün Apaou nousoüh ngüso loatji, naiuso alohat ti tsükiu. Ngüsoüh nyih jan nai ngioji, ‘Apaou lülomsan! Sam memei noin!’ Ngüso tü jimtsünsoüh lüko ngüso chiai atsüojinyang tsünoi.”
6(Apaou nou ngiom, “Ngü loto sautütso goumchi nai atsüojinyang tsünoishi-e. Ngü jüpemüh khaiunia apem ngüso nokpaohoi oukongai thiowane. Nung nokshinghoi nou- soüh goumchi nou lotheane, naiuso ngü ngüso oukong ainou tsükipsane.”)
7Sauhaiüh onnemok tuhkü jan, ngüsoüh jümephaiu lou, naiuso ngü Aloat au noitsün onnemok hoi tü jimau iula. Ngü pailai nime lou: nung pailai tsak nou tü “Atsüojinyang” naiuso amao tsak nou tü “Ajeiai” ta jon. Naiuso ngü onnemok hoi pao- tsang. 8Ngü tü chinyantsün amao onnemok jimtsün hoi süme nouso ko ngü mongmat, naiuso ngü ngüso alei tsakkolu apem wanan khem. 9Nungaih ngü onnemok hoi nouso tü ngiom, “Ngü loto asam jimtsün tsütheshi-e. Eanau noitsünso lü ean-i. Sübao amowanau noin lümowan-i. Apoi nouso lüko tsak si tsak lülomowan-i.” 10Nungaih ngü “Atsüojinyang” ta jontsün pailai thalouküta Apaou nou mele apem ko athalou-e shantaiutsün lomowan au nung longekkü wan. 11Nungtiphe athalou-etsün nung ajekhaiu ko lothekü wan. Sauhaiüh onnemok tuh naiuso jan, ngüso ngü tü thaplutkü noiküla, naiuso ngü ti chhiji nung tsangkü Apaou nou chiteji ta ngüsoüh ngela. 12Ngü ngüso tü ngiom, “Asamüh mongchio naito, jü mephaiu mai ngü hau akiu. Tsü- mongchio naito, nungso lütaiuwan.” Nungtiphe ngüsoüh jü mephaiu mai tangkason aosam ngü hau kiu.
13 Apaou nou ngü tü ngiom, “Nungso amkham tsam chaitaiu nai lüthio.” Nungtiphe ngüsoüh ngü maikü epiu ta yangtsün tangkason aosam loküta nungso amkham tsam chaitaiu nai taiu. 14Nungaih ngü “Ajeiai” ta jontsün pailai nime nou longek, naiuso Yihuda si Israel ajeiai noitsün pai-an.
15Nungaih Apaou nou ngü tü ngiom, “Loühjam, lotao naito tsümaikün onnemok jimtsün ün haoson tsakli lüchhi. 16Ngü jü onnemok hoi paotsangau onnemok jimtsün tsak taiukiu, lüko apaüh alothe tsangkü lohatkü noitsün onne- mok tü tsühachu; amowantsünso tü tsüyam, atawai nouso tsülomeikiu, tsüdekünai a-onmei nouso tü lüko tsütsad. Nung liko apaüh atsating onnemok nyih heji, naiuso nungso athsan nouso phatsankü wanji. 17Nungh athe au tsünoikün onnemok jimtsün inyate! Apaüh meshen onnemok hoi leankü khuwaniu. Apa oukong athum ehli nou lothean. Apa phemtso wonane, naiuso niovei uai nou niopek iula-e.”
Currently Selected:
ZEKARIA 11: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
