ZEKARIA 10
10
Apaou Nou Akipsanau Thalouji
1Pon nouko thsanyan nyim taonai ah ou thaiutha Apaou tü lüsang. Khaiunia pungkü hau eiu sangnyakü noi-iau ah ou naiuso thengmia hongtsün nung Apaou nou noin. 2Khaiuniahoi nou sotsom naiuso aküo ngiokiutsünso tü sangji, lüko ngüsoüh thashitsün nungso yaang naiuso atsüotsüde. Ajantsoüh miamian nou lothatkiuji, lüko nungüh asam atsüotsüdekünai nialükhunji; ngüsoüh mongloutsam kiutsün nung ti atheau tsünoi. Nungtiphe khaiuniahoi nou iantsün onnemok hoili yam tsüngeloukü tsakeiji. Ngüso angja nai noin tiautenai ngüso ün ahei tsünoi.
3“Jü khaiuniaso tü nokshingtsün gohmao khaiunia nouso tü ngo mongmatji, naiuso ngo ngüso hau angja kiu-au noin, ta Apaou nou ngioji. Yihuda khaiuniahoi nouso ngü nou noin, naiuso ngo, Apaou Apemshiotsün nou ngüso paotsange. Ngüso ngü nou ehli mokthso akongting noi-e. 4Ngüso ong ainou jü khaiunia niakei-au nokshinghoi, aheihoi, naiuso süpai aniakeihoi sunge. 5Yihuda khaiuniahoi nung süpaihoi sübao nou ngüso ehoi yamkheng temchei nai ngamthio- wantsünli akongting tsak noi-e. Apaou nou ngüso ko hakü noiphe ngüsoüh mokthso chiai noitsün ehoi shiolou-e.
6“Ngo Yihuda khaiuniahoi oukongkü shan-e;
Ngo Israel khaiuniahoi kipsan-e.
Ngo ngüso tü atsüojinyang noikü ngüso nialoukü shishi-e.
Ngo ngüso tilaitso tsüwananli ngüso noishi-e.
Ngo ngüso ün Apaou Goa noin; ngo ngüso misao thala-e.
7Yihuda khaiuniahoi nouso süpaihoili kongkü noi-e,
theng shiukü monglingtsün khaiuniahoili ngüso noi-e.
Nung ashioloutsün ngüso thsaosithsosoüh yangshi-e
küta Apaou nou ti chhin nung thaiutha ngüso monglingat-e.
8“Ngo jü khaiuniaso jonkü ngüso lokam-e.
Ngo ngüso kipsan-e
naiuso ngüso noikü shitsünli aweau tsüshiokü shan-e.
9Ngo ngüso mele nouso ongai pengpunan-i lüko,
külüko laiukü ainou lüko ngüsoüh ngo yangshi-e.
Ngüso si ngüso thsoso aasan-e naiuso aikü laokü shishi-e.
10Ijip naiuso Asiria ainou ngo ngüso nialoukü shi-e küta ngüso meshen shingkhannio nai kihloushi-e.
Ngo ngüso Gilead naiuso Libanon ai lüko noilou-i-e;
goumchi athum nung khaiuniahoi nou mian-e.
11Ngüso tilai angja khiamnok nou yan-e,
Ngo, Apaou nou nung khiampek nou tü shiuh-e,
naiuso Nail Haiu akheiting saokü wailakü khu-e.
Abülom Asiria nung lonyappe,
naiuso akongting Ijip ün apa oukong mowan-e.
12Ngo jü khaiunia oukongkü shan-e;
ngüsoüh jü ngio angkü ngo amkham-e.”
Nung Apaou nou ngiowaniu.
Currently Selected:
ZEKARIA 10: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
