ZEKARIA 9
9
Chenpa Mele Nouso Tü Mikhem
1Nung Apaou ün ngiongem noin:
Apaüh Hadrak hai goumchi naiuso Damaska noknio thaiutha angja kiu au khemlouwaniu. Israel hai mele lu tsüdekü, Siria hai noknio ateng nouso lüko Apaou ün noin. 2Hadrak elung ai noitsün Hamat, lüko apa ün noin, naiuso Tair si Sidon noknio nouso ngüso ayang amonting lüko chikü hakü apa ün noin. 3Tairüh meshen thaiutha ehüke shanlou-iu naiuso tangkason si chaiou lakkeng nouso beisikin achinyan ko ti amomo tsünoikü kamsaniu! 4Lüko apaüh taiu nou alum Apaou nou kankü khuwane. Apaüh nung jengtsaiu nouso khiamnok nai yakthiowane naiuso noknio nou moisemkü jekthiowane.
5Askelon hai noknio nou nung epkü hattat-e, Gaza hai noknio nou nung eppe naiuso akia asong iula-e, Nungti Ekron, apa ayangtaiu nouso mowane. Gazaüh apa nokpao miowane, naiuso Askelon aodangkü leane. 6Asdod nai alaowe khaiunia le nouso kih-e. Apaou nou ngioji, “Nung abülom Filistia hai ngü lonyap kiu-e. 7Ngüsoüh loto she sunkü nou nyih tsüdekünai amao akiaptsün chihsi- khiam tsüheshiu shi-e. Apoi nouso apem jü khaiunia ongko haoson tsak Yihuda hai kau nai pothso tsak khekkü iula-e. Jebus haiüh chhikü shitsünli, Ekron nung jü khaiunia haoson tsak iula-e. 8Süpaihoi akhu ashi tsüyankei-iau ngü jügoh da jime. Loto angja kiutsün nokpao hau ngü jü khaiuniaso tü thangmangi-au tsükiu-e. Ngü jü khaiuniaso titi omhekü noin nung epiu.”
Ashiau Noi Nou Nokpao
9Zion thsoso, lümongling, lümongling!
Asam Yirusalem khaiuniaso, amongling nou lüwe!
Athaplu, anokpao adongai shiji!
Apa ashioloutsün atsokteng nai ashio epkü shiji,
gado thso tsak chiai tsamloukü moknoikü apa shiji.
Gado thso tsak chiai apa shiji.
10 Apaou nou ngioji,
“Israel ainou ehli tsamkei nouso ngü louwane,
naiuso Yirusalem ainou mokthso nouso lou-e;
ehli nai kankeikü shitsün uokop-pai nouso lothean-e.
Anokpaoüh mele nouso ongko nokmei shane;
apaüh khiamnok ainou khiamnok saokü nokshing shinge,
naiuso Eufrates Haiu ainou goumchi athon saokü nok-shinge.”
Goa ün Khaiuniahoi Ayan Shanshitsün
11“Apaou nou ngioji,
Aloat chaithio she tsangkü thaoluttsün,
jü athalou-e ngiokhem nou asam ko noi nou shioko,
Ngü akhaiunia awailiang khanthan akhothio ainou sokthame.
12Asam thaloukü khuwantsünso sauhai lo ayang epiu lülaoshi;
asam aalouthang ai lülaoshi.
Asam omhetsün chikü thaiutha nou haoson nime,
phopkü kiushi-e ta ngü asam tü ngioji.
13Ngü Yihuda nung süpai tsak ün uokop-pai khekkü,
naiuso Israel nung uokop-chon nouso khekkü kankei-e.
Ngo Zion khaiunia nouso Greece haiko
ehli au salaiu tsak khekkü kankei-e.”
14 Apaou nou apa khaiuniaso khütha nai sungh-e,
apaüh apa chon ahsalap khekkü koppe.
Akhengting Apaou nou jangongmat nai;
ajepekki ainou apa ah-ou-ahsheih nai shi-e.
15 Apaou Akongting nou apa khaiunia solou-e,
naiuso ngüsoüh ngüso ehso lomo-e.
Thengtuk hoi khekkü ehlithang nai ngüso sangh asong nou we-e;
küta ngüso ehso she loushi-e;
naiuso nungh amthang nai chio tsak ainou aloat chaithio she
tsangitsün khekkü noi-e.
16Tilai nungh ajekhaiu shi-e,
onnemok jimtsün tsaküh apa onnemok angja ainou kipsantsünli,
Apaou nou apa khaiuniaso kipsane.
Chaiou kandio tsak outsün khekkü,
apa goumchi nai ngüso oukü je-e.
17Nungaito nung goumchi titi alengmei naiuso amei noi-e!
Nungko sungtsün chih naiuso theng nouso tsangkü,
oumhoi kongsimongkü noi-e.
Currently Selected:
ZEKARIA 9: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
