NEHEMIA 9
9
Khaiuniahoi Nou Ngüso Angei Shananji
1-2Nung alei kolu ajekhaiu kheikü püle nouko nai Israel hai ngüso angei thaiutha amongsaiu hankü keithon loau kamshi. Nungko ngüso melemaohai ainou ngüso chija pungekü noiküla. Ngüsoüh amongsaiu ii nou nethe denkü khaiu ai pu nou lamlutkü han. Küta ngüso tsakü ngüso paosiposoüh sunlotsün angei shananao tsalou. 3Naiuso gondao süme thatso Apaou ngüso Goa Ngiokhem ngüso hau veten, naiuso gondao süme thatso ngüsoüh angei shanan küta ngüso Goa Apaou nou amkham.
4Nungko Levihoi thaiutha puo tsak lataiuküla naiuso nung chiai Jeshua, Bani, Kadmiel, Shebania, Buni, Sherebia, Bani, naiuso Kenani so tsa. Nungaih ngüsoüh ngüso Goa Apaou tü sangh asong nou wekü misao lou.
5Jeshua, Kadmiel, Bani, Hashab- neia, Sherebia, Hodia, Shebania, naiuso Pethahia- Levihai nungsoüh amkhamau thaiutha jon:
“Atsa küta Apaou a-Goa nian lülomsan;
apa athontsüyangkü lülomsan!
Nianlom asongting naiuso atsokting,
sübao khaiuniale nou kiutsün nouto tsüthasaoting lüko,
khaiunia pungkü hau apa ajinka nian alomsan-i.”
Angei Shankiutsün Misao
6Nungthanko Israel khaiuniahoi nou nung misao sao:
“Apaou, ni naiuso nilu Apaou noin;
Ni aün nouso naiuso maou nai kianthsüo nouso shan.
Ni goh si khiamnok naiuso nungko noitsün alum shan;
ni nung chikü hau aah nou kium.
Aün oukong nousoüh akhako kauthio küta nitü amji.
7Ni, Apaou Goa, sauüh Abram chosan,
küta Babilon hai goumchi Ur ainou apa niansan;
ni apa nian Abraham ta li-e kiu.
8Ni da mong kiutsün mongpem ni apa da epsan,
küta ni apako athaluetsün tsak shan.
Ni apa hau Kananhai goumchi,
Hit naiuso Amorhai goumchi,
Periz hai, Jebus hai, Girgas hai goumchi nung,
apa thsaosithsoso kih au goumchi tsak kiuau thalou.
Ni thaloutsün ni thawaokü chhin,
tiautenai ni mongkiutsün ngiotsüo noin.
9“Ni Ijip goumchi nai sam paosiposo titi omheküla nung ep;
Asheng Khiamnok nouko nai ngüsoüh ahachu thaiutha wetsün lula.
10Ni nokpao, apa asonghoi,
naiuso apa goumchi khaiuniahoi thako
athanga ii nouso chhikü noiküla.
Tiautenai ngüsoüh akhaiuniaso titi thangmang nung ni ngen.
Ni shiolom küta lonyi saokü aniansong noin.
11Khiamnok nou thsatkü akhaiuniaso hau ni yam tsak sopkiu,
küta ngüso gohwai chiai nialokü khun.
Khiamnok khiampek nai lungtso tsak sathiotsünli,
sauhaiüh ngüsotü komküla ngüso chikü khiampek nou limlowan.
12Ni ngüso anyi taoko thengmia tsaküh niakei,
naiuso asoh taoko ngüso yam inkheam tsaküh awon kiukü niakei.
13Ni ainou Sinai King ko saom,
ni akhaiuniaso ko chite,
naiuso ngüso hau ngiotsüo ngiokhem,
nouso si atsande amei nouso kiu.
14Ni ngüso tü chinyatnyi nou siokü taiuau tsande,
naiuso ni yathsüotsün Mosa tsangkü ngüso hau Ngiokhem nouso kiu.
15“Tilai ngüso naiukü noiküla,
ni ngüso hau aün ainou themtsai kiu,
naiuso tilai ngüso khiam nou lekü noiküla,
lung tsak ainou khiam ashiu au kiu.
Ni ngüso athaloutsün gohthang thaloau ngiom.
16Lüko sam paosiposo abülom nou kotsüthiokü iula,
kü ni nou athoilut ngio nouso ang-au nan.
17Ngüsoüh angio tsü-ang;
ngüsoüh ni chhitsün chikü beyan;
ni ii athanga chhisiyakü shitsün ngüsoüh beyaniu.
Ngüso abülom tsangkü ngüso Ijip nai niakü khuau ahei tsak chosan.
Lüko ni awankiutsün Goa tsak noin;
ni atsüojin yangkiutsün naiuso ouk kiutsün noin,
naiuso amongmat nai yamlukü noin.
Ni nou atsüojinyang thatü song;
naiuso ni ngüso tsülean.
18Ngüsoüh jangtsopong khekkü sotsom tsak shan,
küta ngüso Ijip ainou niasantsün Goa nung noin ta ngio.
Ngüsoüh ni titithatso lochi lotsao Apaou!
19Lüko ni ngüso liutsa lang nai tsüwanan,
tititenai ni nou atsüojinyang asong noin.
Ni thengmia tsüdekünai in kankü tsükhuwan,
nungüh ngüso hau anyi si asoh yam nou hankü noiküla.
20Ni mongmei tsangkü ngüsoüh chhiau noitsün ngüso hau chiten;
ni ngüso manna nou tsad naiuso ashiu au khiam kiu.
21Liutsa nai pon aopüle chikü ni ngüsoüh pohtsün apem ngüso hau kiu;
ngüso neshe tilaitso tsünyian;
naiuso ngüso hok pumkü tsü-iula.
22“Ni ngüso hau ngüso komkü noitsün mele nouso shiolo-i,
Ngüsoüh Sihon nokshing Hesbon goumchi shiolo,
naiuso Og nokshing Bashan goumchi shiolom.
23Ni ngüso hau maou nai kianthsüo nousoli thsoso piakü kium,
naiuso ngüso hau nung goumchi shioloküta nungko kihlo-in,
nung ngüso hau kiuau ni ngüso paosiposo ta thaloukü noiküla.
24Ngüsoüh Kanan goumchi shiolo.
Nungko kihtsün khaiuniahoi ni shiolo.
Ni akhaiuniaso hau Kanan goumchi,
khaiunia naiuso nokpao nouso tü,
ngüso mongchiotsünli chhiau oukong nou kium.
25Akhaiuniasoüh pejeikü noitsün noknio nouso,
gohtsa goh nouso,
chaiou jengtsaiu nou meankü noitsün tsam nouso,
thaiukü taiutsün khiam temkhao nouso,
Olip pai shep pai nouso,
naiuso sainaoshep eiu nouso thalowan.
Ngüso apemüh aiutsün heshiu küta tsakü iula;
ni ngüso hau amei kiutsün chikü nouko ngüso monglengat-iu.
26“Lüko akhaiuniasoüh ni tü khengshi naiuso angio tsü-ang;
Angiokhem nouso tü ngüsoüh phi sheilut.
E-po sauhaiüh ngüso tü adongai laokü shiau lotsüo,
nungso ngüsoüh loatkü wan.
Nungsoüh ni atao pungkü lochi lotsao,
27nungtiphe ni ngüso ehoi hau shiolo-in;
naiuso ngüso hau shing-i.
Ngüso angja nai ngüsoüh nitü ahachu au jon,
naiuso ni ngüso tü aün ainou thalan.
Sauhaiüh ngüso ehoi ainou ngüso kipsan,
nung aheihoi dongai ni atsüojinyang asong nou hongshin.
28Tilai atsüomei tao shishin,
ngüsoüh tsülaokü angei sunlo shin,
naiuso loüh ni ngüso ehoi hau ngüso shiolowan-in.
Nungti tilai ngüso mong phokleküta ngüso kipsanau ni tü sang,
ni aün ainou lulaküta,
atao pungkü nai ni ngüso atsüojinyang asong nou kipsan.
29Ni ngüso tü ni tsandetsün ang-au lotsüokiu,
a-Ngiokhem taiutsün aa yam noi lüko,
abülom nou ngüsoüh angiokhem nouso wanan.
Mongkongkü naiuso kotsüthiokü,
ngüsoüh angio ang-au tsümongchio.
30Ponsipon ni mongau laiukü ngüso lotsüokiu,
ni e-po nouso she-iao mongchiosan-i,
lüko akhaiuniaso noukek noiküla,
nungtiphe ni ngüso amao mele nouso hau shiolowan-i.
31Naiuso ni nou atsüojinyang asong shioko,
ngüso tsülean tsüdekünai tsülomowan.
Ni atsüojin naiuso atsüojinyang kiutsün Goa noin!
32“Goa, sam Goa, ni titi asong!
Titi ahat au, titi oukongting!
Ni athalou-etsün dongtü taiuji.
Asiria nokpao hoi nou sam thangmangtsün tao ainou,
lo saokü nouko sam tititso omhekü shin!
Sam nokpaoso sam aheiso sam mesonso sam e-po nouso,
sam paosiposo, naiuso sam khaiuniaso chikü omhekü shin.
Sam titengkü omhekü shin nung labean!
33Ni sam hau angja nou ayam thakü nai kium;
samüh angei sunlo lüko, nito ngiotsüo noiküla.
34Sam paosiposo, sam nokpaoso sam aheiso,
naiuso sam meson hoisoüh a-ngiokhem tsükankei.
Ngüsoüh ni thoiluttsün
naiuso tsüoloau ngiotsün tü tsü-ang.
35Ni nou ouk tsangko nokpao nousoüh akhaiuniaso tü nokshing shing,
ngüso ni kiutsün gohmei nai kihtsün taoko lüko,
ngüsoüh angei ainou tsüphokle naiuso ni tsüyathsüo.
36Naiuso lo ni kiutsün goumchi nai sam sua noin,
sam hau eheshiu kiutsün nung gohtsa goh nou noin.
37Goumchi nai tititso sungji nung nokpao nouso dongai khuji,
nung sam angei shioko ni kiutsün noin.
Sam naiuso sam thainian tü ngüsoüh mongchiotsünli chhiji.
Sam angja naiuso ayangelat asong nai noin,
tiautenai ngüsoüh sam thainian tü ngüso mongthat kankeiji!”
Khaiuniahoi Nou Athalou-e Tsak Shanji
38Nung chikü thawaokü shitsün shioko sam, Israel haiüh satkü taiutsün ngiomong shinge tsak shan, naiuso ahei hoi, Levi hoi, naiuso sam meson hoi nousoüh nung tü ngüso aleng ii thanglut.
Currently Selected:
NEHEMIA 9: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
